Araho tsy misy hataka andro ny fahalianana hita
1 “Velezo ny vy dieny mafana.” Maro no mahafantatra tsara io fitenenana io izay mampirisika ny tsy hangatahana andro mba hamitana ireo zavatra ilaina. Hita amin’izao fanandraman-javatra manaraka izao fa azontsika ampiharina amin’ny fanompoantsika koa io fotopoto-pitsipika io.
2 Nametraka boky tamin’ny lehilahy iray ny anabavy iray ary nampanantena azy io fa hiverina. Nifandiso ny anabavy hafa iray ka nandondòna tamin’io trano io ihany adiny iray tatỳ aoriana. Tonga teo am-baravarana ilay rangahy nitondra ilay boky teny an-tanany ary nilaza taminy hoe: “Rehefa nilaza ianao hoe hiverina, dia tsy noheveriko hoe ho haingana be toy izao, fa mandrosoa ihany; efa vonona ho amin’ny fianarako aho.”
3 Na dia tsy ny fanaovana fiverenana mitsidika haingana toy izany aza no toe-javatra mahazatra, io fanandraman-javatra io dia manasongadina ny ilàna ho mailaka ny hanolokolo ny fahalianana hitantsika eo amin’ny fanompoantsika, tsy misy fanemorana ny fotoana ela loatra. Mandritra ny volana Martsa isika dia hanolotra ny boky Les Jeunes s’interrogent—Réponses pratiques na ny boky Ny fahatanoranao. Ireo zava-mitranga maneran-tany dia mampiharihary fa tena araka ny toetr’andro tokoa ireo boky ireo.
4 Mila fanampiana fanampiny ny olona: Mba hanampiana ny olona hahatakatra ny fanazavana ao amin’ireo boky ireo, ary koa mba hankasitrahany fa mifandray tsara amin’ny fiainany sy ny fiainan’ny zanany ary ny hoaviny izy ireo, dia mila ny manao fandaharana ho amin’ny fiverenana mitsidika isika, tsara kokoa raha ao anatin’ny andro vitsivitsy aorian’ilay fitsidihana voalohany. Amin’ny fomba ahoana no hanaovantsika izany? Mety hanampy anao hamantatra ny halalin’ny fahalianan’ilay olona ny fampahafantarana azy fa hiverina ianao.
5 Omano ny lalana ho amin’ilay fiverenana mitsidika: Tsy mora foana eo amin’izao tontolo izao ankehitriny ny mahazo fanekena ho amin’ny fanaovam-potoana iray, ary mety ho tsy tadidin’ilay tompon-trano koa ny hihazona ilay fotoana. Na dia izany aza, raha mandray an-tsoratra amim-pitandremana ny fotoana ho amin’ilay fiverenana mitsidika ianao ary avy eo dia manao izay hahazoana antoka fa hanao ilay fitsidihana — ao anatin’ny andro vitsivitsy raha azo atao koa — dia hiantsoroka ny andraikitrao hihevitra ilay fotoana amim-pitandremana ianao. Raha tsy ao an-trano ilay tompon-trano, dia ataovy azo antoka ny hanohy hanandrana hihaona aminy indray. Mety hahazo fampirisihana hihevitra ny fitsidihanao ho zava-dehibe izy rehefa mahita ny fahatapahan-kevitrao hahita azy ao an-trano.
6 Koa satria isika tsy afaka ny hahazo antoka tanteraka ny amin’ny fahalianana asehon’ny olona iray rehefa mitsidika azy voalohany, dia mandraisa an-tsoratra ny amin’ny hiverenana hitsidika na dia ireo izay tsy nampiseho afa-tsy fahalianana kely indrindra aza. Mitondra soa ny fanarahana tsy misy hataka andro izany fahalianana izany. Mety ho nanaitra ny fahalianan’ilay olona amin’ilay boky Les Jeunes s’interrogent na ilay boky Ny fahatanoranao ianao, ary rehefa miverina mitsidika azy ianao, dia mety ho gaga sady faly noho ny fandraisany anao amin’ny fomba tsara. Ataovy azo antoka àry ny hanaraka tsy misy hataka andro ny fahalianana hita!