Fandaharana Vaovao ho Amin’ny Andro Fivoriambe Manokana
1 Nampitombo ny fankasitrahantsika an’i Jesosy Kristy ny fianarantsika ny boky Ilay Lehilahy Niavaka Indrindra Teto An-tany. Araka ny mety, dia hamelabelatra ny foto-kevitra hoe “Aoka Isika Hanaraka Akaiky Ilay Ohatra Lehibentsika” ny fandaharan’ny andro fivoriambe manokana manomboka amin’ny Septambra, ka hanampy antsika hahatakatra amin’ny fomba feno kokoa ny hevitry ny hoe manaraka azy.
2 Na firy na firy taonantsika na naha-ela antsika tao anatin’ny fahamarinana, ireo rehetra hanatrika ilay fivoriambe dia hahazo fampirisihana mba hanahaka bebe kokoa an’i Kristy. Hanasongadina torohevitra ho an’ny tanora indrindra ny tapany amin’ny fandaharana. Hanome fanampiana azy ireo izany mba hiatrehany ireo tarehin-javatra sarotra mifandray amin’ny fianarana sy ny fialam-boly ary ny fitiavana zavatra ara-nofo. Hisy lahateny sy fitantarana zava-nitranga teo amin’ny fiainana ary fampisehoana hanasongadina ny fomba hanoherana ny fitaoman’izao tontolo izao sy ny fomba hanahafan’ny tena an’i Kristy. — 1 Pet. 2:21.
3 Ireo olona nanolo-tena vao haingana dia hanana fahafahana hanambara ampahibemaso fa mpanara-dia an’i Kristy izy ireo, amin’ny fanekena hatao batisa. Hisy lahateny mandrisika araka ny Soratra Masina momba an’io foto-kevitra io hatao alohan’ny fanaovana batisa. Ireo izay maniry hatao batisa amin’ny andro fivoriambe manokana dia tokony hampahafantatra ny faniriany amin’ny mpiandraikitra prezidà mba hananany fotoana ampy handaminana ireo loholona handinika ireo fanontaniana natao ho an’ireo mpilatsaka hatao batisa.
4 Hanolotra ny lahateny lehibe indrindra mitondra ny lohateny hoe “Ny Fanarahana Ilay Ohatra Lehibentsika — Mitondra Antsika ho Amin’inona moa Izany?” ny mpandahateny hasaina iray. Aoka ho azonao antoka fa hanasa ireo olona liana rehetra ho amin’io fandaharana mandrisika sy manatanjaka ny finoana io ianao. Tsy misy mihitsy lalana lehibe kokoa na hahazoana valisoa kokoa noho ny fanarahana an’i Jesosy Kristy, ilay Ohatra Lehibentsika. — Matio 19:27-29.