Zavatra Be dia Be Hatao Foana
1 Olona be zavatra hatao ny vahoakan’i Jehovah. Manana adidy maro isika mifandray amin’ny fianakaviantsika sy ny asantsika ary ny fianarantsika. Ary ambonin’ny zavatra rehetra, dia misy “zavatra be dia be hatao foana ao amin’ny asan’ny Tompo”. (1 Kor. 15:58, NW). Tsy maintsy manomana sy manatrika ireo fivorian’ny kongregasiona atao isan-kerinandro isika. Ampirisihina isika mba tsy hamela herinandro iray handalo ka tsy ho nandraisantsika anjara tamin’ny asa fanompoana. Tsy maintsy misy fotoana ampy hatokana tsy tapaka ho amin’ny fianaran’ny tena manokana sy ny fianakaviana ny Baiboly. Ireo loholona sy mpikarakara momba ny asa dia manana asa fanendrena maro ao amin’ny kongregasiona. Indraindray isika dia angatahina mba hanampy olona mendrika izay mila fanampiana.
2 Misy fotoana izay mety hahatsapan’ny sasany amintsika ho tototr’ireo zavatra rehetra tsy maintsy ataontsika. Kanefa, ireo olona be zavatra hatao indrindra dia afaka ny ho anisan’ireo olona sambatra indrindra, raha mihazona fandanjalanjana sy fahaiza-mametraka tsara ireo zavatra eo amin’ny toerany avy, izy ireo. — Mpit. 3:12, 13.
3 Ny apostoly Paoly dia olona iray izay nanan-javatra be dia be hatao. Teo am-pikarakarany ireo zavatra nilain’ny tenany manokana tamin’ny fanaovana ny asan’ny mpanao lay, dia nisasatra mihoatra noho ireo apostoly hafa izy. Tsy nitandro hasasarana izy teo amin’ny asan’ny mpitory ny filazantsara, nitory ampahibemaso sy isan-trano, no sady tsy nanao tsirambina ireo andraikiny tamin’ny naha-mpiandry ny andian’ondry azy. (Asa. 20:20, 21, 31, 34, 35). Na dia teo aza ny fandaharam-potoanany feno zavatra natao, dia may foana i Paoly ny hanao bebe kokoa teo amin’ny fanompoana an’i Jehovah. — Ampitahao amin’ny Romana 1:13-15.
4 Nihazona ny fandanjalanjany sy fo falifaly i Paoly tamin’ny fianteherana tamin’i Jehovah mba hahazoana hery. Hitany ho novalian-tsoa sy nahafa-po ny fanompoany. (Fil. 4:13). Fantany fa tsy hanadino ny asany Andriamanitra. (Heb. 6:10). Nanome tanjaka azy ny fifaliana nanampy ny hafa hahafantatra an’i Jehovah. (1 Tes. 2:19, 20). Ny toky fa takany ny fanantenany niorina tamin’ny Baiboly dia nanosika azy hitoetra ho nazoto niasa. — Heb. 6:11.
5 Tokony handinika ny soa ateraky ny asantsika koa isika. Ny maha-any amin’ireo fivoriana atao isan-kerinandro antsika sy ny fandraisantsika anjara amin’izy ireny dia mampahatanjaka sy mampahery ny hafa. (Heb. 10:24, 25, NW). Ireo ezaka mafy ataontsika mba hitondrana ny vaovao tsara any amin’ny olona rehetra dia mandray anjara amin’ny fandrosoan’ny kongregasiona, arakaraka ny anolokoloana ny fahalianana sy ifaneraseran’ny vaovao amintsika. (Jaona 15:8). Ny fanampiana ny hafa mila izany dia mampisy toe-tsain’ny fianakaviana mifamatotra akaiky ao amin’ny kongregasiona. (Jak. 1:27). Ankoatra izany, sahala amin’i Paoly, isika dia tsy tokony hanadino na oviana na oviana fa ny maha-be zavatra hatao amin’ny asa mahasoa dia mampifaly an’i Jehovah Andriamanitra. Heverintsika ho tombontsoa lehibe ny manompo azy. Amintsika dia tsy misy fomba fiaina tsara kokoa noho izany!
6 Misy soa fanampiny raisina avy amin’ny fananana zavatra be dia be hatao. Rehefa be zavatra hatao isika amin’ny fanarahana fahazarana ara-panahy mahasoa, dia toa mandeha haingana lavitra ny fotoana. Takatsika fa ny andro mandalo tsirairay dia mampanatona antsika akaiky kokoa hatrany ny tontolo vaovao, ka manaiky amim-pifaliana ilay fiainana feno ananantsika ankehitriny isika. Takatsika koa fa fahendrena ny fitoerana ho be zavatra hatao, satria mihena ny fotoana ananantsika hikatsahana zavatra araka an’izao tontolo izao tsy misy vokany. — Efes. 5:15, 16.
7 Azo antoka fa misy zavatra be dia be hatao ao amin’ny asan’ny Tompo. Afaka ny hitoetra ho sambatra anefa isika, raha manohy miantehitra amin’i Jehovah Andriamanitra sy i Jesosy Kristy, izay mahatonga ny fanompoantsika hamelombelona sy hovalian-tsoa. — Matio 11:28-30, NW; 1 Jaona 5:3.