Valin’ireo Fanontanianareo
◼ Ahoana no ahafahantsika manome valin-teny amin’ny fomba faran’izay mandaitra indrindra any amin’ireo fivoriana?
Tsy andrintsika ny hiaraha-mivory any amin’ireo fivorian’ny kongregasiona fanao isan-kerinandro. Any isika dia manana fahafahana haneho ny finoantsika sy hampahery ny hafa amin’ny fanomezantsika valin-teny. (Ohab. 20:15; Heb. 10:23, 24). Isika dia tokony hihevitra ny fanomezana valin-teny ho tombontsoa iray ary tokony hiezaka mafy mba handray anjara tsy tapaka. Ahoana no ahafahantsika manao izany amin’ny fomba faran’izay mandaitra indrindra?
Ny fanomanana no dingana voalohany. Ny famakiana sy ny fisaintsainana mialoha an’ilay zavatra ianarana dia zava-dehibe. Miezaha mahazo ny tena hevitr’izay zavatra omena ao. Na dia mety ho efa nodinihina aza tamin’ny lasa ilay loha hevitra, dia tadiavo izay hevitra rehetra novelabelarina bebe kokoa na nohamafisina, omena ao. Tadidio ao an-tsaina ny foto-kevitra ankapoben’ilay zavatra ianarana. Rehefa manomana valin-teny avy ao amin’ny zavatra vita an-tsoratra iray izay manasongadina fianarana manontolo ny boky iray ao amin’ny Baiboly, toy ny boky Fanambarana, dia miezaha mba hahita ny fomba ifandraisan’ny andininy iray manokana amin’ireo andininy manodidina azy. Ny fanarahana an’ireo fanoloran-kevitra ireo dia hanaitaitra ny fahaizanao misaina. Izy io dia hanampy anao hanomana valin-teny tsara sy hahita fifaliana amin’ny fandraisanao anjara.
Ny valin-teny tsara indrindra dia mivantana sy ambara amin’ny fomba tsotra ary miorina amin’ilay zavatra vita an-tsoratra ianarana. Ilay voalohany manome valin-teny dia tokony hamaly mivantana an’ilay fanontaniana, ka hamela ny hevitra hafa mba hanomezana valin-teny fanampiny. Halaviro ny valin-teny mitarazoka sy misafotofoto izay maka fotoana tafahoatra sy misakana ny hafa tsy handray anjara. Ambarao amin’ny fiteninao manokana ny hevitrao, toy izay hamaky be fahatany fotsiny ny valin-teninao avy ao amin’ilay zavatra vita an-tsoratra. Azo atao ho anisan’ny valin-teny fanampiny ny hevitra fonosin’ny andalan-teny ao amin’ny Soratra Masina voatonona. Henoy amim-pitandremana izay lazain’ny hafa, amin’izay dia ho afaka hanalavitra an’izay famerimberenana rehetra tsy ilaina ianao.
Tsara ny hanangananao ny tananao imbetsaka, fa tsy amin’ny fehintsoratra rehetra kosa anefa. Manasa ny ankizy mba handray anjara amin’ny valin-teny izahay. Raha mampiahotra anao ny maneho hevitra an-kalalahana, dia azonao atao ny mampahafantatra mialoha an’ilay mpitarika hoe iza amin’ireo fehintsoratra no ho tianao hanomezana valin-teny, ary azo inoana fa ho afaka hanome fahafahana anao hanao izany izy.
Isika rehetra dia tokony hanao ezaka amim-pahatsorana ny mba hanan-javatra hatolotra any amin’ireo fivorian’ny kongregasiona mahatafiditra fandraisana anjaran’ny mpanatrika. Tsarovy fa ny fahombiazan’ny fivoriana toy izany dia miankina be dia be amin’ny fahavononantsika hanome valin-teny sy ny fanaovantsika izany amin’ny fomba mandaitra. — Sal. 26:12.