Mandraisa Soa Avy Amin’ny Sekolin’ny Fanompoana Teokratika Amin’ny 1996 — Fizarana Faha-3
1 Ny apostoly Paoly dia naniry ny hivavahan’ireo rahalahiny ho azy, mba hahazoany ny fahaizana hiteny ny vaovao tsara tamim-pahasahiana. (Efes. 6:18-20). Maniry hamboly izany fahaizana izany koa isika. Mba hahatongavana amin’izany, dia ankasitrahantsika ny fanampiana omen’ny Sekolin’ny Fanompoana Teokratika, izay ampirisihana ny mpanatrika fivoriana mahafeno fepetra rehetra mba hisoratra anarana.
2 Amin’ny maha-mpianatra antsika, isika dia mandray torohevitra natao ho an’ny tenantsika manokana, mba hanampiana antsika hanatsara ny fahaizantsika miteny sy mampianatra. (Ohab. 9:9). Afaka mandray soa koa isika avy amin’ny fihainoana ny torohevitra raisin’ny hafa, sy amin’ny fampiharana izay ianarantsika amin’ny tenantsika. Rehefa manomana anjara isika, dia tokony hianatra amim-pitandremana ilay zavatra nangalana ilay anjara mba hahazoana antoka fa araka ny marina ny fanazavantsika azy io. Tokony hifanaraka amin’ny famelabelarana ilay foto-kevitra ankapobe ireo hevi-dehibe sy ireo andininy ampiasaintsika. Raha misy olon-kafa tafiditra ao amin’ilay anjara, dia tokony haverimberina aloha ben’ny hampisehoana azy ao amin’ny sekoly ilay izy. Arakaraka ny anaovantsika fandrosoana, dia tokony hanao ezaka mba hitenenana an-tehaka isika, amin’ny fampiasana naoty fa tsy lahateny voasoratra manontolo kosa.
3 Izay rehetra manana anjara amin’ny sekoly dia tokony ho tonga aloha sy hanome ny taratasiny hoe Torohevitra Momba ny Lahateny ho an’ny mpiandraikitra ny sekoly ary hipetraka eny aloha amin’ilay efitrano. Ireo anabavy dia tokony hampahafantatra an’ilay mpiandraikitra ny sekoly mialoha hoe inona ny faritra nofidin’izy ireo ary hoe hitsangana sa hipetraka izy ireo hanao ny anjarany. Ny fiaraha-miasa amin’ireo lafiny ireo dia anisan’ny miteraka fandaharana misosa tsara ary manampy an’ireo izay mikarakara ny lampihazo hanao izay hahavonona ny zavatra rehetra mialoha.
4 Fanomanana ny anjara faha-2: Zava-kendrena iray amin’ny famakiana Baiboly ny hanampy ilay mpianatra hanatsara ny fahaizany mamaky teny. Ahoana no ahafahana manatratra izany amin’ny fomba tsara indrindra? Ny famakiana amin’ny feo avo sy miverimberina ilay zavatra hovakina no fomba tsara indrindra hahaizana azy tsara. Mba hahafantarana ny dikan’ny teny tsy mahazatra rehetra sy ny fomba fanononana azy marina, ilay mpianatra dia tokony hijery azy ireny ao amin’ny dikisionera. Izany dia mety hitaky koa ny hahafantarana ny dikan’ny marika amin’ny fomba fanononana ampiasaina ao amin’ilay dikisionera.
5 Afaka manampy an’ireo zanany tanora hanomana ny anjara famakian-teny ireo ray aman-dreny. Mety ho tafiditra amin’izany ny fihainoana rehefa manao famerenana ilay ankizy, ary avy eo dia ny fanomezana azy fanoloran-kevitra mahasoa mba hihatsarana. Mamela ny hisian’ny fampidiran-dresaka fohy sy famaranan-teny mifanentana, izay ampiharana hevitra fototra, ny fotoana voatokana. Amin’izay, ilay mpianatra dia mampitombo ny fahaizany miteny an-tehaka.
6 Ny mpanao salamo dia nangataka tamim-bavaka hoe: “Tompo ô, sokafy ny molotro, dia hanambara ny fiderana Anao ny vavako.” (Sal. 51:15). Enga anie ny fandraisantsika anjara amin’ny Sekolin’ny Fanompoana Teokratika hanampy antsika hanome fahafaham-po an’io faniriana io koa.