“Ny Finoana dia avy Amin’ny Zavatra Re ”
1 Rehefa mahita olona “mirona araka ny mety ho amin’ny fiainana mandrakizay” isika, dia tena ilaina ny hanatanjahana ny finoan’izany olona izany an’izay reny. (Asa. 13:48, NW; Rom. 10:17, NW ). Mba hahatongavana amin’izany, dia tokony hanolokolo ny fahalianana hita tamin’ny fametrahana gazety isika amin’ny fiverenana mba hitondrana ny nomerao farany sy mba hifampiresahana misimisy kokoa. Kanefa, ataovy ao an-tsaina ny tanjona, dia ny hanomboka fampianarana amin’ilay boky hoe Fahalalana Izay Mitarika ho Amin’ny Fiainana Mandrakizay. Indreto misy fanoloran-kevitra sasantsasany izay mety hanampy anao:
2 Rehefa manao fiverenana mitsidika any amin’izay niresahanao momba ilay lahatsoratra hoe “Derao Ilay Mpanjakan’ny Mandrakizay!” ianao, dia afaka manomboka amin’izao fomba izao:
◼ “Fony isika niresaka farany, dia nandinika porofo mandresy lahatra sasany izay manamarina fa misy Andriamanitra tsitoha iray. Kanefa, tsy ampy ny fahalalana fotsiny ny fisiany. Mila mahafantatra ny anarany isika. Iza no anarana iantsoanao an’Andriamanitra? [Avelao ilay olona hamaly.] Olona an-tapitrisany maro no miantso azy fotsiny hoe ‘Tompo’ na ‘Andriamanitra’, izay anaram-boninahitra tsy manondro na iza na iza. Fanampin’izany, dia tiany ny hahafantarantsika azy amin’ny anarany. [Vakio ny Salamo 83:18.] Milaza zavatra betsaka kokoa amintsika momba an’i Jehovah Andriamanitra ny Baiboly, araka ny hazavaina ao anatin’itỳ boky itỳ.” Asehoy ilay sary ao amin’ny pejy faha-29 amin’ny boky Fahalalana, ary vakio ilay fanazavana eo ambaniny. Rehefa avy niresaka momba ny fehintsoratra telo voalohany eo amin’ny toko faha-3 ianao, dia ho efa nanomboka fampianarana iray!
3 Ho an’ireo izay niarahanao nandinika ilay lahatsoratra hoe “Ny Antony Hahatonga ny Fivavahana eo Amin’izao Tontolo Izao Hifarana”, dia mety haniry hanolokolo ny fahalianana ianao amin’ny filazana hoe:
◼ “Rehefa avy namaky ilay lahatsoratra ianao, dia mety ho nanohina anao ilay hoe tsy afaka mijery ny fivavahana rehetra amin’ny fomba mitovy isika. Samy misy ny fivavahana marina sy ny fivavahana diso. Izany dia mampipoitra ilay fanontaniana araka ny fandrindran-kevitra hoe: Ny fanompoam-pivavahan’iza no eken’Andriamanitra? Ny valiny dia nomen’i Jesosy, sady asongadina ato amin’itỳ boky itỳ.” Avadiho ho eo amin’ny toko faha-5 ny boky Fahalalana, ary vakio ny fehintsoratra faha-4 sy ny Jaona 4:23, 24. Avy eo dia manontania hoe: “Hanaiky fampianarana Baiboly maimaim-poana atỳ an-tokantranonao ve ianao?” Raha eny no valiny, dia avadiho ho eo amin’ny toko voalohany ilay boky ary atombohy ilay fampianarana.
4 Raha niresaka tamin’olona izay be zavatra natao tamin’ny fitsidihana voalohany ianao, dia ho azonao atao ny hilaza izao, rehefa miverina:
◼ “Nitsidika anao aho vao haingana ary namela gazety Ny Tilikambo Fiambenana sy Mifohaza! Manorina fanajana ny Baiboly sy ny tari-dalana ara-pitondran-tena raketiny ireny gazety ireny. Noho izaho mihevitra fa tena ilain’ny rehetra ny mahatakatra ny Tenin’Andriamanitra, dia niverina aho mba hampisehoana aminao zavatra izay hanampy anao hanao izany.” Asehoy ny boky Fahalalana, ary sariho ny saina ho amin’ireo loha hevitra eo amin’ny pejy faha-3. Anontanio hoe toko inona no hitany fa mahaliana indrindra, mankanesa any amin’izay toko izay, ary atombohy ilay fampianarana.
5 Ho lehibe ny fifaliantsika raha afaka ‘mamoha ny varavaram-pinoana ho an’ny hafa’ isika, varavaram-pinoana izay mitarika ho amin’ny fiainana mandrakizay. — Asa. 14:27; Jaona 17:3.