Ny Fomba Fanaovana Mpianatra Amin’​ny Alalan’​ny Boky Fahalalana

¹ Ny tanjona faniry iray ho an’​ny Kristiana rehetra dia ny hampianatra ny fahamarinana amin’​ny hafa sy ny hanao mpianatra ireo izay ‘mirona araka ny mety ho amin’​ny fiainana mandrakizay’. (Asa. 13:​48, NW; Matio 28:​19, 20). Ny fandaminan’​i Jehovah dia nametraka eo am-pelatanantsika fitaovana mahatalanjona iray mba hanatanterahana izany — ny boky Fahalalana Izay Mitarika ho Amin’​ny Fiainana Mandrakizay. Ny lohateniny dia manasongadina ny maha-tena zava-dehibe ny fampianarana Baiboly any an-tokantrano, satria ny fiainana mandrakizay dia ­miankina amin’​ny fandraisana fahalalana an’​i Jehovah, ilay hany Andriamanitra marina, sy an’​ilay Zanany, i Jesosy Kristy. — Jaona 17:⁠3, NW.

² Ny boky Fahalalana ankehitriny no zavatra vita an-tsoratra lehibe indrindran’​ny Fikambanana izay hampiasaina mba hitarihana fampianarana Baiboly any an-tokantrano. Amin’​ny fampiasana azy io, dia afaka mampianatra ny fahamarinana amin’​ny fomba tsotra sy mazava ary fohy isika. Izany dia hanampy mba hanohinana ny fon’​ireo izay ampianarina. (Lioka 24:32). Mazava ho azy fa ilaina ny hampiasan’​ilay mpampianatra fomba fampianatra tsara. Mba hahatongavana amin’​izany, dia nomanina itỳ takelaka fanampiny itỳ mba hanomezana fanoloran-kevitra sy fampahatsiahivana momba ny fomba fampianatra izay voaporofo fa mandaitra. Amim-pahaiza-manavaka, sy mifanaraka amin’​ny toe-javatra misy ny tsirairay, dia mety ho afaka hampihatra miandalana ny sasany na ny rehetra amin’​izay atolotra ato ianao. Tahirizo itỳ takelaka fanampiny itỳ, ary ivereno jerena matetika. Mety hanampy anao hahita vokatra kokoa eo amin’​ny fampiasana ny boky Fahalalana mba hanaovana mpianatra, ny hevitra samihafa ato anatiny.

³ Mitariha fampianarana Baiboly mandroso miandalana any an-tokantrano: Manàna fahalianana marina manokana amin’​ilay olona ampianarina, toy ny hoe olona mety ho tonga mpianatra kristiana sady rahalahy na anabavy ara-panahy iray izy. Aoka ianao ho feno hafanana sy fisakaizana ary risi-po. Amin’​ny fahaizanao mihaino, dia afaka mahafantatra an’​ilay olona ianao — ny fiainany tamin’​ny lasa sy ny tarehin-javatra misy azy eo amin’​ny fiainana — zavatra izay hanampy anao hanavaka ny fomba tsara indrindra hanampiana azy ara-panahy. Aoka ianao ho vonona hanolotra ny tenanao ho tombontsoan’​ilay olona ampianarina. — 1 Tes. 2:⁠8.

⁴ Raha vao tafaorina ny fampianarana iray, dia tsara kokoa raha ianarana araka ny filaharany ireo toko ao amin’​ny boky Fahalalana. Izany dia hamela an’​ilay olona ampianarina hahazo fahatakarana miandalana ny fahamarinana, satria ilay boky dia mamelabelatra foto-kevitra amin’​ny filaharana mirindra indrindra. Hazòny ho tsotra sy mahaliana ilay fampianarana mba hahavelombelona azy sy handrosoany. (Rom. 12:11). Miankina amin’​ny toe-javatra sy ny fahaizan’​ilay olona ampianarina, dia mety ho azonao atao ny hamita toko betsaka indrindra amin’​ny fotoam-pianarana maharitra adiny iray eo ho eo, nefa tsy hihazakazaka mandritra ny fianarana. Hanao fandrosoana tsara kokoa ireo olona ampianarina rehefa samy manaja ny fotoana nifanaovana isan-kerinandro ilay mpampianatra sy ilay olona ampianarina. Araka izany, dia mety ho azo atao, amin’​ny ankamaroan’​ny olona, ny hamita ireo toko 19 amin’​ilay boky ao anatin’​ny enim-bolana eo ho eo.

⁵ Atombohy amin’​ny fanamarihana fohy, izay handrisika ny fahalianana ho amin’​ilay fanazavana ny fotoam-pianarana tsirairay. Ho voamarikao fa ny lohatenin’​ny toko tsirairay no loha heviny, izay ilaina hoantitranterina. Manavaka hevi-dehibe iray ny lohatenikely tsirairay, ka manampy anao hifantoka amin’​ny loha hevitr’​ilay toko. Mitandrema mba tsy hiteny be loatra. Miezaha kosa mampiteny an’​ilay olona ampianarina. Ny fametrahana fanontaniana fitarihana ny saina voafaritra tsara amin’​ilay olona ampianarina, miorina amin’​izay zavatra efa fantany, dia hanampy azy hanjohy hevitra ary ho tonga amin’​ny famaranan-kevitra marina. (Matio 17:​24-26; Lioka 10:​25-37; jereo ny Boky ho An’​ny Sekoly, pejy 51, fehintsoratra 10.) Araho akaiky ny fanazavana vita pirinty ao amin’​ny boky Fahalalana. Ny fampidirana tsipiriany amboniny dia mety hampanadino na hanamaizina ny hevi-dehibe sy hanalava ilay fampianarana. (Jaona 16:12). Raha mipoitra ny fanontaniana iray izay tsy miompana amin’​ilay foto-kevitra ianarana, amin’​ny ankamaroan’​ny toe-javatra, dia ho afaka hamaly azy io ianao amin’​ny faran’​ilay fotoam-pianarana. Izany dia hamela anao hamita ilay fianarana ho an’​ny herinandro, nefa tsy hihataka amin’​ny foto-kevitra. Hazavao amin’​ilay olona ampianarina fa amin’​ny farany ny ankamaroan’​ny fanontaniany manokana dia ho voavaly, arakaraka ny fandrosoan’​ny fianarana. — Jereo Boky ho An’​ny Sekoly, pejy 94, fehintsoratra 14.

⁶ Raha mifikitra mafy amin’​ny finoana ny Trinite, ny tsy fetezan-ko fatin’​ny fanahy, ny afobe mirehitra, na ny foto-pampianaran-diso hafa ilay olona ampianarina, ka tsy mahafa-po azy izay atolotra ao amin’​ny boky Fahalalana, dia ho afaka hanome azy ny boky Fanjohian-kevitra ianao na zavatra vita an-tsoratra hafa izay mandinika ilay foto-kevitra. Lazao azy fa handinika ilay foto-kevitra miaraka aminy ianao rehefa avy nieritreritra momba izay novakiny izy.

⁷ Ny fanombohana sy ny famaranana ny fianarana amin’​ny vavaka mba hahazoana ny fitarihana sy ny fitahian’​i Jehovah, dia manome fahamendrehana an’​ilay fisehoan-javatra sy mahatonga hanana toe-tsaina feno fanajana ary misarika ny saina ho amin’​i Jehovah ho ilay tena Mpampianatra. (Jaona 6:45). Raha mbola mampiasa paraky sy sigara ilay olona ampianarina, amin’​ny farany, dia mety hila hangataka azy ianao mba hifady azy io mandritra ny fianarana. — Asa. 24:16; Jak. 4:⁠3.

⁸ Mampianara amin’​ny fomba mandaitra amin’​ny alalan’​ireo andinin-teny sy fanoharana ary fanontaniana famerenana: Na impiry na impiry no mety ho efa nianarany ilay fanazavana teo aloha, ny mpampianatra kinga iray dia hijery indray ny fianarana tsirairay amin’​ny fanaovana ao an-tsaina ilay olona hampianariny manokana. Izany dia hanampy mba hiheverana mialoha ny sasany amin’​ireo fanontaniany. Mba hampianarana amin’​ny fomba mandaitra, dia ataovy mazava ao an-tsaina ireo hevi-dehibe ao amin’​ilay toko. Jereo ireo andinin-teny mba hahitana ny fomba iharany amin’​ilay fanazavana, ary manapaha hevitra hoe iza avy amin’​izy ireo no tokony hovakina mandritra ny fianarana. Asio fiheverana ny fomba ahafahanao mampianatra amin’​ny fampiasana ireo fanoharana sy fanontaniana famerenana amin’​ny faran’​ilay toko.

⁹ Amin’​ny fampiasana amin’​ny fomba mandaitra ireo andinin-teny, ianao dia hanampy an’​ilay olona ampianarina hahatakatra fa tena mianatra Baiboly tokoa izy. (Asa. 17:11). Amin’​ny fampiasana ilay faritra voafefy hoe “Fantaro Tsara ny Baibolinao” ao amin’​ny pejy 14 amin’​ny boky Fahalalana, dia ampianaro azy ny fomba hahitana ireo andinin-teny. Asehoy azy ny fomba hamantarana ireo andininy voatonona ao amin’​ilay fianarana. Arakaraka ny amelan’​ny fotoana hanao izany, dia tadiavo sy vakio ireo andinin-teny voalaza izay tsy voatonona. Asao ilay olona ampianarina hilaza hoe amin’​ny ahoana izy ireo no manohana na manazava izay nambara ao amin’​ilay fehintsoratra. Antitrantero ny tapany fototra amin’​ireo andininy mba hahatakarany ny antony ho an’​ny hevi-dehibe amin’​ilay fianarana. (Neh. 8:⁠8). Amin’​ny ankapobeny, ilay mpampianatra dia tsy mila mampiditra, ao amin’​ilay dinika, andininy betsaka kokoa noho izay omen’​ilay boky. Lazao ny maha-sarobidy ny fahafantarana ny anarana sy ny filaharan’​ireo boky ao amin’​ny Baiboly. Mety hanampy an’​ilay olona ampianarina ny famakiana ny pejy 27-30 amin’​ny Ny Tilikambo Fiambenana 15 Septambra 1991.

¹⁰ Ny fianarana 34 ao amin’​ny Boky ho An’​ny Sekolin’​ny Fanompoana Teokratika dia manazava fa ny fanoharana dia manaitra ny fomba fisainana ary manamora ny fahatakarana hevi-baovao. Mampiray ny fahiratan-tsaina sy ny fihetseham-po izy ireny, hany ka ampitaina amin-kery ilay hafatra, zavatra izay tsy azo atao matetika raha amin’​ny fanambarana zava-misy tsotra. (Matio 13:34). Manana fanoharana maro ahitam-pianarana izay tsotra nefa mahery, ny boky Fahalalana. Ohatra, ny fanoharana iray ao amin’​ny toko 17 dia manorina fankasitrahana ny fomba anomezan’​i Jehovah, amin’​ny heviny ara-panahy, sakafo sy fitafiana ary fialofana amin’​ny alalan’​ny kongregasiona kristiana. Ireo sary tsara tarehy ao amin’​ny boky Fahalalana, dia azo ampiasaina amin’​ny fomba mandaitra mba hanairana ny fihetseham-po. Eo ambanin’​ilay lohatenikely hoe “Ny fitsanganana amin’​ny maty hahafaly”, ao amin’​ny pejy 185, dia hahery kokoa ny fiantraikan’​ny fehintsoratra 18 rehefa asaina hanao jery todika ny sary ao amin’​ny pejy 86 ilay ­olona ampianarina. Izany dia mety hanosika azy hieritreritra momba ny fitsanganana amin’​ny maty ho zavatra tena hisy eo ambanin’​ny Fanjakan’​Andriamanitra.

¹¹ Ireo olona ampianarina Baiboly dia mila manao fandrosoana ara-panahy isaky ny fianarana tsirairay. Noho izany antony izany, dia aza hadinoina ny mametraka ny fanontaniana famerenana ao amin’​ilay faritra voafefy hoe “Tsapao ny Fahalalanao”, izay miseho any amin’​ny faran’​ny toko tsirairay. Aza mianina amin’​ny fanazavana ara-tsaina fotsiny amin’​izay nianarana. Ny maromaro amin’​ireny fanontaniana ireny dia natao mba hilazana valin-teny manokana avy amin’​ny fo. Ohatra, jereo ny pejy 31 izay anontaniana an’​ilay olona ampianarina hoe: “Toetran’​i Jehovah inona avy no manintona anao indrindra indrindra?” — 2 Kor. 13:⁠5.

¹² Ampiofano ireo olona ampianarina mba hiomana ho amin’​ny fianarana: Ny olona ampianarina iray izay mamaky mialoha ny fianarana sy manamarika ireo valin-teny ary mieritreritra momba ny fomba hilazana azy ireny amin’​ny fiteniny manokana, dia hanao fandrosoana ara-panahy haingana kokoa. Amin’​ny ­ohatra sy ny fampaherezana omenao, dia afaka mampiofana azy hiomana ho amin’​ny fianarana ianao. Asehoy azy ny bokinao, izay nanasongadinanao na nanipihanao ireo teny sy fitambaran-teny ­fototra. Hazavao ny fomba hahitana valin-teny mivantana amin’​ireo fanontaniana vita pirinty. Ny fanomanana toko iray miaraka amin’​ilay olona ampianarina dia mety ­hanampy azy. Ampirisiho izy hilaza ny ao am-pony amin’​ny fiteniny manokana. Amin’​izay ihany vao hanjary hazava raha azony ilay zavatra dinihina na tsia. Raha mamaky ny valin-teniny avy ao amin’​ny boky izy, dia afaka mandrisika ny fomba ­fisainany ianao amin’​ny fanontaniana azy ny fomba hanazavany ilay hevitra amin’​olon-kafa amin’​ny fiteniny manokana.

¹³ Ampirisiho ilay olona ampianarina hitady ireo andininy tsy voatonona mandritra ny fiomanany isan-kerinandro, satria mety tsy hisy fotoana hamakiana azy rehetra mandritra ny fianarana. Derao izy noho ny ezaka ataony amin’​ny fianarany. (2 Pet. 1:⁠5; jereo Ny Tilikambo Fiambenana 15 Aogositra 1993, pejy 13-14, mba hahitana fanoloran-kevitra fanampiny momba izay azon’​ilay mpampianatra sy ilay olona ampianarina atao mba hampitomboana fahalalana amin’​ny fampianarana Baiboly iray.) Amin’​izay fomba izay, ilay olona ampianarina dia voaofana hanomana sy hanome fanazavana misy heviny any amin’​ireo fivorian’​ny kongregasiona. Hianatra ny fomba hampitomboana fahazarana tsara amin’​ny fianarana manokana izy, ka izany dia hampahavonona azy hanohy hanao fandrosoana ao amin’​ny fahamarinana aorian’​ny fahavitan’​ny fianarany ny boky Fahalalana. — 1 Tim. 4:15; 1 Pet. 2:⁠2.

¹⁴ Tariho ho amin’​ny Fandaminan’​i Jehovah ireo olona ampianarina: Andraikitr’​izay manao mpianatra ny mitarika ny fahalianan’​ilay olona ampianarina ho amin’​ny fandaminan’​i Jehovah. Handroso haingana kokoa ho amin’​ny fahamatorana ara-panahy ilay olona, raha manaiky sy mankasitraka ny fandaminana, ary mahatsapa ny ilana ho anisan’​izy io. Irintsika ny hahitany fahafinaretana amin’​ny fifaneraserana amin’​ny vahoakan’​Andriamanitra sy ny hiandrandrany ny fiarahana amintsika ao amin’​ny Efitrano Fanjakana, izay ahafahany mandray ilay fanohanana ara-panahy sy ara-pihetseham-po atolotry ny kongregasiona kristiana. — 1 Tim. 3:⁠15.

¹⁵ Ilay bokikely hoe Ny Vavolombelon’​i Jehovah — Tafaray mba Hanao ny Sitrapon’​Andriamanitra Maneran-tany dia natao mba hampahafantarana amin’​ny olona ilay hany fandaminana hita maso ampiasain’​i Jehovah amin’​izao andro izao mba hanatanteraka ny sitrapony. Raha vao tafaorina ilay fampianarana, nahoana raha manome bokikely iray an’​ilay olona ampianarina? Vao eo am-piandohana ­mihitsy, dia aza mitsahatra manasa ilay olona ampianarina ho any amin’​ireo fivoriana. Hazavao ny fomba itarihana azy ireo. Azonao lazaina aminy ny lohatenin’​ny lahateny ampahibemaso ho avy na asehonao azy ny lahatsoratra hodinihina amin’​ny Fianarana Ny Tilikambo Fiambenana. Angamba mety hitondra azy mba hijery ny Efitrano Fanjakana ianao rehefa tsy misy fivoriana atao ao, mba hanamaivanana izay fanahiana rehetra mety hananany momba ny fandehanana voalohany any amin’​ny toerana vaovao iray. Mety ho afaka hitondra azy amin’​ny fiara ianao, na haka azy, na hifanao fotoana aminy mba ho any amin’​ny fivoriana. Rehefa manatrika izy, dia ataovy izay hahatsapany hoe raisina an-tanan-droa sy tsy sakodiavatra izy. (Matio 7:12). Ampifankahalalao amin’​ireo Vavolombelona hafa izy, anisan’​izany ireo loholona. Antenaina ny hanombohany hihevitra ny kongregasiona ho ny fianakaviany ara-panahy. (Matio 12:​49, 50; Marka 10:​29, 30). Ho azonao atao ny hametra tanjona hotratrariny, toy ny fanatrehana fivoriana iray isan-kerinandro, ary hampitombo miandalana ilay tanjona. — Heb. 10:​24, 25.

¹⁶ Arakaraka ny itohizan’​ny fianarana Baiboly any an-tokantrano amin’​ny alalan’​ny boky Fahalalana, dia antitrantero ireo tapany izay manasongadina ny ilana hifaneraserana tsy tapaka amin’​ny kongregasiona any amin’​ireo fivoriana. Mariho indrindra indrindra ny pejy 52, 115, 137-139, 159, ary koa ny toko 17. Lazao ny fahatsapan’​ny tenanao fankasitrahana ­lalina ny fandaminan’​i Jehovah. (Matio 24:​45-47). Manaova teny manorina momba ny kongregasiona eo an-toerana sy momba izay ianaranao any amin’​ireo fivoriana. (Sal. 84:10; 133:​1-3) Ho tsara raha ho afaka hijery ny tsirairay amin’​ireo vidéos an’​ny Fikambanana ilay olona ampianarina, ka manomboka amin’​ny Les Témoins de Jéhovah: un nom, une organisation. Mba hahazoana hevitra fanampiny momba ny fomba hitarihana ny fahalianana ho amin’​ny fandaminana, dia jereo Ny Tilikambo Fiambenana 1 Jona 1985, pejy 22-26, sy ny takelaka fanampiny tamin’​ny Ny Fanompoantsika Ilay Fanjakana Aprily 1993.

¹⁷ Ampirisiho ireo olona ampianarina hanao fanambarana amin’​ny hafa: Ny tanjontsika amin’​ny fiaraha-mianatra amin’​ny olona dia ny hanao mpianatra olona izay ho vavolombelona hanao fanambarana ho an’⁠i Jehovah. (Isaia 43:​10-12). Izany dia midika fa ilay mpampianatra dia tokony hampirisika an’​ilay olona ampianarina mba hiresaka amin’​ny hafa momba izay ianarany avy ao amin’​ny Baiboly. Izany dia azo atao amin’​ny fomba tsotra toy ny fanontaniana hoe: “Ahoana no hanazavanao io fahamarinana io amin’​ny fianakavianao?”, na hoe: “Andinin-teny inona no hampiasainao mba hanaporofoana izany amin’​ny namana iray?” Antitrantero ireo fehintsoratra fototra ao amin’​ny boky Fahalalana izay ampirisihana ny fanaovana fanambarana, toy ny pejy 22, 93-95, 105-106, ary koa ny toko 18. Amin’​ny fotoana mety, dia azo omena taratasy mivalona vitsivitsy ilay olona ampianarina hampiasainy amin’​ny fanaovana fanambarana tsy ara-potoana amin’​ny hafa. Tolory hevitra izy hanasa ny mpianakaviny hanatrika ny fianarany. Moa ve izy manana namana izay ho tia ny hianatra koa? Angataho izy mba hiresaka aminao momba ireo izay liana.

¹⁸ Amin’​ny fanatrehana ny Sekolin’​ny Fanompoana Teokratika sy ny Fivoriana Momba ny Fanompoana, ilay olona mety ho tonga mpianatra dia afaka mandray fampiofanana sy fanentanana fanampiny izay hanampy azy ho tonga mpitory ny vaovao tsara. Rehefa maneho fahalianana amin’​ny fisoratana anarana amin’​ny sekoly na amin’​ny fahatongavana ho mpitory tsy vita batisa izy, dia hampiharina ireo fotopoto-pitsipika voasoritra ao amin’​ny pejy 98 sy 99 amin’​ny boky Voalamina. Raha misakana azy tsy hahafeno fepetra ny lafiny iray amin’​ny fiainany, dia afaka manao fikarohana ao amin’​ireo zavatra vita an-tsoratry ny Fikambanana ianao mba hahazoana zavatra mahasoa mahakasika ilay raharaha sy mizara azy io aminy. Ohatra, ho sarotra amin’​ny olona ampianarina iray ny mandresy ny fanandevozan’​ny sigara sy paraky na ny zava-mahadomelina hafa. Ny boky Fanjohian-kevitra dia manondro ny antony mahery araka ny Soratra Masina hanalaviran’​ny Kristiana fahazarana manimba toy izany, ary ao amin’​ny pejy 437 dia manoritra fomba iray izay hita fa nahomby tamin’​ny fanampiana ny hafa hanafa-tena. Miaraha mivavaka aminy momba ilay raharaha, ka mampianara azy hampiorina ny fianteherany amin’​i Jehovah mba hahazoana fanampiana. — Jak. 4:⁠8.

¹⁹ Ny fomba fanaovan-javatra tokony harahina mba hamaritana raha mahafeno fepetra mba handray anjara amin’​ny fanompoana ampahibemaso ny olona iray na tsia, dia voasoritra ao amin’​ny Ny Tilikambo Fiambenana 15 Janoary 1996, pejy 16, fehintsoratra 6. Rehefa mahafeno fepetra ilay olona ampianarina, dia hahasoa ny hitarihana fanazaran-tena mba hanomanana azy ho amin’​ny andro voalohany hanaovany ny fanompoana eny amin’​ny saha. Amin’​ny fomba manorina, dia resaho ny fihetsika sy ny fanoheran’​ny olona, izay mahazatra eny amin’​ny faritaninareo. Asao hanomboka amin’​ny fitoriana isan-trano izy aloha, raha mbola azo atao koa, ary ampiofano miandalana amin’​ny lafiny hafa amin’​ny fanompoana. Raha hazoninao ho fohy sy tsotra ny fomba fampisehonao, dia ho mora aminy ny hanahaka anao. Aoka ianao hampiorina sy hampahery ary hampiseho hafaliana eo amin’​ilay asa, mba handraisany ny toe-tsainao sy hanomezany taratr’​izy io. (Asa. 18:25). Ny tanjon’​ny mpianatra vaovao iray dia tokony ho ny ho tonga mpitory ny vaovao tsara tsy tapatapaka sy be zotom-po. Angamba ianao afaka manampy azy hanao fandaharam-potoana azo ampiharina amin’​ny fanompoana. Mba handrosoany eo amin’​ny fahaizany manao ­fanambarana amin’​ny hafa, dia azonao atao ny manolo-kevitra azy hamaky Ny Tilikambo Fiambenana 15 Febroary 1985, pejy 15-26; 15 Oktobra 1988, pejy 9-20; 15 Aprily 1991, pejy 15-20; ary 1 Janoary 1994, pejy 20-25.

²⁰ Omeo ny antony manosika hirosoana ho amin’​ny fanoloran-tena sy ny batisa ireo olona ampianarina: Tokony ho azon’​ny olona tso-po iray atao ny mianatra zavatra ampy mandritra ny fianarana ny boky Fahalalana mba hanaovana fanoloran-tena ho an’​Andriamanitra sy hahafenoana fepetra mba hatao batisa. (Ampitahao amin’​ny Asan’​ny Apostoly 8:​27-39; 16:​25-​34.) Kanefa, alohan’​ny hahavoatosika ny olona iray hanao fanoloran-tena, dia mila mamboly fifikirana amin’​i Jehovah izy. (Sal. 73:​25-28). Mandritra ny fandehan’​ny fianarana, dia mitadiava fahafahana hamboly fankasitrahana ireo toetran’​i Jehovah. Lazao ny fihetseham-pon’​ny tenanao lalina ho an’​Andriamanitra. Ampio ilay olona ampianarina hieritreritra ny amin’​ny fambolena fifandraisana mafana sy manokana amin’​i Jehovah. Raha tena manjary mahafantatra sy tia an’​Andriamanitra izy, amin’​izay dia hanompo Azy amim-pahatokiana, satria ny fifikirana amin’​Andriamanitra dia misy ifandraisana amin’​izay tsapantsika momba an’​i Jehovah amin’​ny maha-persona azy. — 1 Tim. 4:​7, 8, NW; jereo ny Boky ho An’​ny Sekoly, pejy 76, fehintsoratra 11.

²¹ Mikeleza aina hanohina ny fon’​ilay olona ampianarina. (Sal. 119:11; Asa. 16:14; Rom. 10:10). Mila mahita izy hoe amin’​ny ahoana ny fahamarinana no mahakasika azy manokana, sy mila manapa-kevitra ny amin’​izay tokony hataony momba izay zavatra nianarany. (Rom. 12:⁠2). Tena mino ny fahamarinana izay aseho azy isan-kerinandro ve izy? (1 Tes. 2:13). Mba hahatongavana amin’​izany, dia afaka mampiteny an’​ilay olona ampianarina ianao, amin’​ny fametrahana aminy fanontaniana hahalalana fomba fijery sy mampiseho fahaiza-manavaka, toy ny hoe: Ahoana ny fihetseham-ponao momba izany? Ahoana no ahafahanao mampihatra izany eo amin’​ny fiainanao? Araka ny teny ataony, dia mety hanavaka ianao hoe aiza no ilana fanampiana bebe kokoa mba hanohinana ny fony. (Lioka 8:15; jereo ny Boky ho An’​ny Sekoly, pejy 52, fehintsoratra 11.) Ny fanazavana an’​ireo sary ao amin’​ny pejy 172 sy 174 amin’​ny boky Fahalalana dia manontany hoe: “Nanolo-tena ho an’​Andriamanitra tamin’​ny alalan’​ny vavaka ve ianao?” sy hoe: “Inona no misakana anao tsy hatao batisa?” Mety hanosika amin’​ny fomba mandaitra an’​ilay olona ampianarina hanao zavatra izany.

²² Ny fomba fanaovan-javatra tokony harahina rehefa maniry hatao batisa ny mpitory iray dia voasoritra ao amin’​ny Ny Tilikambo Fiambenana 15 Janoary 1996, pejy 17, fehintsoratra 9. Ny zava-kendrena tamin’​ny fanoratana ny boky Fahalalana dia mba hampiomana an’​ilay olona hamaly ireo “Fanontaniana ho An’⁠ireo Izay Maniry Hatao Batisa”, hita ao amin’​ny fizarana fanampiny amin’​ny boky Voalamina, izay hiarahan’​ireo loholona mandinika aminy. Raha nohamafisinao ny valin’​ireo fanontaniana vita pirinty tao amin’​ny boky Fahalalana, dia tokony ho voaomana tsara ilay olona ampianarina ho amin’​ny fandinihana ireo fanontaniana tarihin’​ireo loholona ho fiomanana ho amin’​ny batisany.

²³ Ampio ireo izay nahavita ny fianarana Baiboly any an-tokantrano: Tokony hantenaina fa, rehefa mahavita ny fianarana ny boky Fahalalana ny olona iray, ny fahatsoram-pony sy ny fahalianany lalina hanompo an’​Andriamanitra dia ho efa hanjary hiharihary. (Matio 13:23). Izany no antony anontanian’​ny lohatenikely farany ao amin’​ilay boky hoe: “Inona no hataonao?” Ireo fehintsoratra famaranana dia manintona an’⁠ilay olona ampianarina hifantoka amin’​ilay fifandraisana tokony ho efa namboleny amin’​Andriamanitra, sy amin’​ny ilana hampiharana ny fahalalana nianarany ary amin’​ny ilana hanaovan-javatra haingana mba hampisehoana ny fitiavany an’​i Jehovah. Tsy misy fandaharana ho amin’​ny fianarana zavatra vita an-tsoratra fanampiny miaraka amin’​ireo izay nahavita ny boky Fahalalana. Hazavao amin-katsaram-panahy sy mazava amin’​ny olona ampianarina izay tsy nandray tsara ny fahalalana an’​Andriamanitra, izay zavatra tsy maintsy ataony mba handrosoana ara-panahy. Ho azonao atao ny hihazona fifandraisana tsindraindray aminy, ka hamela hisokatra ny lalana mba hanaovany ireo dingana izay mitarika ho amin’​ny fiainana mandrakizay. — Mpit. 12:⁠13.

²⁴ Ny mpianatra vaovao iray izay manaiky ny fahamarinana ka atao batisa dia mbola mila mitombo bebe kokoa raha ny amin’​ny fahalalany sy ny fahazoany hevi-javatra, mba hiorina tsara tanteraka ao amin’​ny finoana izy. (Kol. 2:​6, 7). Tsy hanohy ny fampianarana Baiboly any an-tokantrano aminy ianao ­rehefa nahavita ny boky Fahalalana, fa afaka manolo-tena kosa mba hanome fanampiana ­manokana mety hilainy mba hahamatotra azy ara-panahy. (Gal. 6:10; Heb. 6:⁠1). Ary izy kosa, dia afaka mameno ny fahazoany hevi-javatra amin’​ny famakiana ny Baiboly isan’​andro, amin’​ny fianarana manokana Ny Tilikambo Fiambenana sy ny zavatra vita an-tsoratra hafa an’​ny “mpanompo mahatoky”, amin’​ny fanomanana sy fanatrehana ireo fivoriana, ary amin’​ny fiaraha-miresaka momba ny fahamarinana amin’​ny mpiray finoana. (Matio 24:​45-47; Sal. 1:⁠2; Asa. 2:​41, 42; Kol. 1:​9, 10). Ny famakiany ny boky Voalamina sy ny fampiharany izay voarakitra ao dia handray anjara tena lehibe amin’​ny fahatongavany ho voalamina amin’​ny fomba teokratika mba hanatanteraka amin’​ny fomba feno ny fanompoany. — 2 Tim. 2:⁠2; 4:⁠5, NW.

²⁵ Amboleo ny fahaiza-mampianatra: Nirahina ‘hanao mpianatra ny olona, sy hampianatra azy’ isika. (Matio 28:​19, 20). Koa satria ny fahaiza-mampianatra mifandray tsy azo sarahina amin’​ny fanaovana ­mpianatra, dia irintsika ny hikely aina hihatsara amin’​ny maha-mpampianatra antsika. (1 Tim. 4:16; 2 Tim. 4:⁠2, NW ). Mba hahazoana fanoloran-kevitra fanampiny ny amin’​ny fomba hambolena fahaiza-mampianatra, dia mety hirinao ny hamaky ny hoe “Ny Fomba Hambolena Fahaiza-mampianatra” sy ny hoe “Ny Fomba Hanohinana ny Fon’​ireo Mpihaino Anao” ao amin’​ny Boky ho An’​ny Sekoly, fianarana 10 sy 15; ny hoe “Enseignant, Enseignement” ao amin’​ny Auxiliaire pour une meilleure intelligence de la Bible, pejy 458; sy ny lahatsoratra ao amin’​ny Ny Tilikambo Fiambenana hoe “Ny Fahaiza-manorina Amin’​ny Fitaovana Tsy Mety May” sy ny hoe “Rehefa Mampianatra ­Ianao, Mitenena Amin’​ny Fo”, 1 Febroary 1985; sy ny hoe “Hainao ve ny Mamakafaka Amin’​ny Fomba Mandaitra avy Amin’​ny Soratra Masina?”, 1 Jona 1986; ary ny hoe “Ny Fomba Ahitana Fifaliana Amin’​ny Fanaovana Mpianatra”, 15 Febroary 1996.

²⁶ Eo am-piezahana mafy hanao mpianatra, amin’​ny fampiasana ny boky Fahalalana, dia mivavaha foana mba hitahian’​i Jehovah, ilay hany “mampitombo”, ny ezaka ataonao mba hanohinana ny fon’​olombelona amin’​ny vaovao tsaran’​ilay Fanjakana. (1 Kor. 3:​5-7). Enga anie ianao hahatsapa ny fifaliana mampianatra ny hafa hahazo sy hankasitraka ary hanao zavatra mifanaraka amin’​ilay fahalalana izay mitarika ho amin’​ny fiainana mandrakizay!