Ny Fahatsiarovana — Fisehoan-javatra Iray Tena Lehibe!
1 Amin’ny alahady 23 Martsa, aorian’ny filentehan’ny masoandro, dia hankalaza ny Fahatsiarovana ny nahafatesan’i Kristy isika. (Lioka 22:19). Fisehoan-javatra tena lehibe marina izy io! Tamin’ny fihazonana ny tsy fivadihany tamin’i Jehovah hatramin’ny fahafatesana, i Jesosy dia nanaporofo fa afaka mihazona fifikirana tanteraka amin’Andriamanitra ny olombelona, na dia ao anatin’ny fihenjanana mafy aza, ka hiaro ny zon’i Jehovah hanam-piandrianana. (Heb. 5:8). Fanampin’izany, ny fahafatesan’i Kristy dia nanome ilay sorona olombelona tanteraka nilaina mba hanavotana ny olombelona. Noho izy io koa dia ho afaka hanana fiainana mandrakizay ireo izay maneho finoana. (Jaona 3:16, NW ). Amin’ny fanatrehantsika ny Fahatsiarovana, dia afaka mampiseho ny fankasitrahan’ny fontsika ny fitiavan’i Jehovah sy ny soron’i Jesosy ho antsika, isika.
2 Ampirisihina ny rehetra mba hanaraka ny fandaharana famakiana Baiboly izay nalamina ho an’ny 18-23 Martsa, ary voasoratra ao amin’ny Kalandrien’ny Vavolombelon’i Jehovah 1997. Afa-tsy izany koa, ny fiarahan’ny fianakaviana mandinika ny toko faha-112-116 ao amin’ny boky Ilay Lehilahy Niavaka Indrindra Teto An-tany, dia hanampy antsika hifantoka amin’ilay herinandro lehibe indrindra teo amin’ny tantaran’ny olombelona.
3 Afaka mampitombo ny fotoana laninao eo amin’ny fanompoana ve ianao, mandritra ny vanim-potoan’ny Fahatsiarovana? Mpitory maro no hanararaotra amin’ny fomba feno ireo faran’ny herinandro dimy amin’ny Martsa, mba ho mpisava lalana mpanampy. Nahoana ianao raha manatevin-daharana azy ireo? Isika rehetra dia afaka manana anjara feno amin’ny fanantitranterana ny maha-zava-dehibe ny fanatrehana ny Fahatsiarovana. Koa satria alahady ilay izy, dia ho mora kokoa ho an’ny olona maro ny hanatrika. Aza hadinoina ny manasa ireo miara-mianatra ny Baiboly aminao sy ireo olona liana hafa, mba hiaraka amintsika. Vakio aminy izay voambara eo amin’ny pejy faha-127, fehintsoratra faha-18, ao amin’ny boky Fahalalana, momba ilay hany andro amin’ny taona tokony hankalazaina manokana.
4 Aoka ianao hiatrika io fisehoan-javatra lehibe indrindra amin’ny 1997 io, amin’ny fananana fankasitrahana lalina ny hevitry ny fahafatesan’i Jesosy ho antsika. Aoka ianao ho eo, amin’ny takarivan’ny 23 Martsa, rehefa hankalaza amim-pahatokiana ny Fahatsiarovana ny Kristiana marina hatraiza hatraiza.