Nahoana Isika no Miverina Hatrany Foana?
1 Efa mba nametraka izany fanontaniana izany tamin’ny tenanao ve ianao, angamba teo am-piomananao hanompo tamin’ny andro iray? Any amin’ny faritra sasany amin’ny faritanintsika izay iasana amin’ny fomba miverimberina, ireo tompon-trano dia mety hahalala hoe iza isika, ka handà antsika avy hatrany. Vitsy monja no mety handray tsara. Na dia izany aza, dia misy antony mahery maro mahatonga antsika hiverina hatrany foana.
2 Voalohany aloha, dia nodidiana isika mba hanohy hitory ny hafatra momba ilay Fanjakana mandra-pahatongan’ny farany. (Matio 24:14; 28:19, 20). Ny mpaminany Isaia dia nanontany hoe hafiriana izy no tsy maintsy hanohy ny asa fitoriany. Voarakitra an-tsoratra ao amin’ny Isaia 6:11 ny valin-teny azony. Tsy misy isalasalana ny amin’izany — nilazana izy mba hiverina hatrany foana tany amin’ny olona, hitondra ny hafatr’Andriamanitra. Toy izany koa amin’izao andro izao, na dia mety handà antsika aza ny olona, i Jehovah dia manantena ny hanohizantsika hitsidika ireo ao amin’ny faritanintsika. (Ezek. 3:10, 11). Andraikitra masina nankinina tamintsika izany. — 1 Kor. 9:17.
3 Ny antony iray hafa hiverenantsika hatrany foana dia hoe manome antsika fahafahana hampiseho ny halalin’ny fifikirantsika amin’i Jehovah izany. (1 Jaona 5:3). Ankoatra izany, rehefa misaintsaina izay tahirizin’ny hoavy tsy ho ela ho an’ny olombelona isika, ahoana moa no ahafahantsika hitan-tena tsy hiezaka hampitandrina amim-pitiavana ny mpiara-belona amintsika? (2 Tim. 4:2; Jak. 2:8). Ny fahatokiana asehontsika eo am-panatanterahana ilay asa nanendrena antsika, dia manome azy ireny fahafahana amin’ny fomba miverimberina, handray ny hafatr’Andriamanitra milaza famonjena. Amin’izay izy ireny dia tsy ho afaka hilaza hoe tsy nahazo fampitandremana. — Ezek. 5:13.
4 Ho fanampin’izany, dia tsy fantatsika mihitsy hoe rahoviana no hiova fo ny olona sasany. Afaka mitarika ho amin’izany ny fiovan’ny tarehin-javatra misy azy ireny manokana, na ny loza mihatra amin’ny fianakaviany, na ny toe-javatra maneran-tany izay mahatonga azy hieritreritra amim-pitandremana ny amin’ny hoaviny. Etsy an-danin’izany koa, izay zavatra lazaintsika eo am-baravarany dia mety hahatonga fandraisana tsara. (Mpit. 9:11; 1 Kor. 7:31). Afa-tsy izany koa, dia mifindra monina ny olona. Mety hahita mponina vaovao ao amin’ny faritanintsika isika, dia olona izay handray ny vaovao tsara — angamba olon-dehibe tanora izay mitokan-trano izao, ary mieritreritra amim-pitandremana momba ny zava-kendren’ny fiainany.
5 Hiverina hatrany foana ve isika? Eny! Manome antsika antony manosika maro hiverenana any amin’ny olona hatrany hatrany, ny Soratra Masina. Amin’ny farany, rehefa ho vita ny asa fitoriana, dia hitahy antsika i Jehovah noho ny ezaka nitohy nataontsika teo amin’ny fanompoana, ary hitahy an’ireo nandray tamim-pankasitrahana ny vaovao tsaran’ilay Fanjakana izy. — 1 Tim. 4:16.