Manehoa Tena Fiahiana ny Fahalianana Rehetra Hita
1 Hifarana tsy ho ela ny fanambarana ilay Fanjakana atao maneran-tany. Aorian’izany, dia hiharan’ny fandringanana ireo rehetra “tsy mahalala an’Andriamanitra”. (2 Tes. 1:7-9). Noho izany, ny tena fiahiana ny fiainan’ny hafa dia manosika ny vahoakan’i Jehovah hitondra ny hafatra momba ilay Fanjakana any amin’ny olona betsaka araka izay azo atao. — Zef. 2:3.
2 Isam-bolana dia ora an-tapitrisany maro no lany itadiavana ireo maniry hihaino ny “teny soa mahafaly”. (Isaia 52:7). Noho ny fanolorantsika ireo zavatra vita an-tsoratra amin’ny volana, dia maro no mandray ny gazety Ny Tilikambo Fiambenana sy Mifohaza! na ny bokikely Inona no Takin’Andriamanitra Amintsika? Tokony hanosika antsika hanolokolo ny fahalianana rehetra hita, ny tena fiahiana an’ireny olona ireny. — Ohab. 3:27.
3 Mihazòna firaketana an-tsoratra araka ny marina: Zavatra betsaka kokoa no ho vita raha mirakitra an-tsoratra amin’ny fomba marina sy feno, ny fahalianana sy ny zavatra voapetraka ianao. Hanampy anao hahita vokatra kokoa amin’ny fiverenanao mitsidika, ny filazalazana toy ny anarana sy ny adiresin’ilay tompon-trano, ny andro sy ora nitsidihanao, ny zavatra vita an-tsoratra voapetraka, ary ny foto-kevitra noresahina. Afa-tsy izany koa, raha soratanao ny fanamarihana sasany nataon’ilay tompon-trano tamin’ny resaka nifanaovanareo voalohany, dia mety ho afaka hampiasa azy ireny amim-pahombiazana ianao, rehefa hanohy ny resaka amin’ny fiverenana mitsidika.
4 Aoka ianao ho mailaka hanao fiverenana mitsidika: Firy tamin’ireo nandray zavatra vita an-tsoratra taminao tamin’ny volana lasa no niezahanao notsidihina indray? Lasa ve ireo herinandro kanefa tsy nisy fifandraisana fanampiny? Ny tena fiahiana izay hahasoa azy ireny mandrakizay dia tokony hanosika anao hiverina haingana araka izay azo atao. Tsara kokoa raha ao anatin’ny andro vitsivitsy izany, amin’izay dia mbola hotsaroana tsara ao an-tsaina ilay resaka. Amin’ny fiverenana haingana mba hampitomboana ny fahalianany, dia mety ho afaka hisakana ny ezaka ataon’i Satana ianao, alohan’ny ‘hanesorany ny teny izay nafafy tao aminy’. — Marka 4:15.
5 Tena ilaina ny fiomanana: Miankina amin’ny fiomananao tsara ny fahombiazanao eo amin’ny fanaovana fiverenana mitsidika. Omano mialoha ny tari-dresakao, alohan’ny handehanana. Ny pejy farany amin’ny Ny Fanompoantsika Ilay Fanjakana Aprily 1997, dia manome fomba fampiseho maromaro izay ho azo ampiasaina amim-pahombiazana tsara, rehefa manolotra gazety na ny bokikely Takina, ianao. Ny zavatra manaraka dia ny fananana hevitra hampitaina, rehefa miverina ianao. Inona no azo lazaina rehefa hanolokolo fahalianana ianao? Ahoana no azo anombohana fampianarana Baiboly?
6 Rehefa manohy ny resaka momba izay ilaina hatao mba hanadiovana ny tany sy hanaovana azy ho toerana tsara hiainana ianao, dia ho azonao atao ny hiteny hoe:
◼ “Tamin’ny fitsidihako teo aloha, dia nanaiky isika fa misy dingana tena lehibe ilaina hatao alohan’ny hahatongavan’ny tany ho paradisa feno fiadanana. Heverinao ve fa manana izay ilaina ny olombelona mba hanatanterahana io asa io? [Avelao ilay olona hamaly.] Mariho, aza fady, hoe nahoana no tena ilaina ny hisalovanan’Andriamanitra amin’ny raharahan’ny olona.” Vakio ny Salamo 37:38. Avy eo, dia sokafy ny lesona faha-5 ao amin’ny bokikely Takina, ary mampiasà tapany sasany nofantenana ao amin’ny fehintsoratra faha-4-5, mba hampisehoana ny fomba hanatanterahan’Andriamanitra io faminaniana io. Tohizo amin’ny fanolorana fampianarana Baiboly amin’ilay bokikely.
7 Raha niresaka momba ny Fanjakan’Andriamanitra ary nametraka ilay bokikely “Takina”, tamin’ny fitsidihana voalohany ianao, dia ho azonao atao ny hilaza zavatra sahala amin’izao, rehefa miverina:
◼ “Fony isika niresaka farany, dia nofantarintsika fa ny Fanjakan’Andriamanitra dia tena fitondram-panjakana izay hanapaka ny tany manontolo. Ny Baiboly dia mampiseho fa i Kristy Jesosy no ho mpanapaka azy io. Azonao saintsainina ve ny tombontsoa amin’ny fananana izany karazana fitondram-panjakana sy mpitarika izany?” Avelao ilay olona hamaly. Sokafy ilay bokikely Takina eo amin’ny lesona faha-6. Amin’ny fampiasana hevitra sasantsasany nofantenana ao amin’ny fehintsoratra faha-6-7 sy ny sary eo amin’ny pejy faha-13, dia asehoy izay hataon’ny Fanjakan’Andriamanitra ho an’ny olombelona amin’ny hoavy. Vakio ny Daniela 2:44, ary raha mety, dia ampahafantaro ny boky Fahalalana ary manolora fampianarana Baiboly.
8 Raha toa ianao ka nahita olona izay niaiky fa niteraka zava-manahirana ho an’ny taranak’olombelona ny fivavahana, dia ho azonao atao ny hanontany toy izao amin’ny fiverenana mitsidika:
◼ “Efa mba nanontany tena ve ianao hoe ahoana no ahafahantsika mahafantatra ny fivavahana ankasitrahan’Andriamanitra? [Avelao ilay olona hamaly.] Itỳ bokikely hoe Inona no Takin’Andriamanitra amintsika? itỳ dia manome ireo marika famantarana ny fivavahana marina.” Sokafy ny lesona faha-13, ary asongadino ireo hevitra dimy natao sora-mandry eo amin’ny fehintsoratra faha-3-7. Mety hanohy amin’ny filazana toy izao ianao: “Ankoatra ny fahitana ny fivavahana marina, dia tsy maintsy mamantatra izay takin’Andriamanitra amintsika tsirairay isika.” Vakio ny Jaona 4:23, 24. Manolora ny hiresaka bebe kokoa momba izany. Sokafy eo amin’ny lesona voalohany ilay bokikely, ary asehoy ny fomba fianarantsika.
9 Rehefa miverina ianao mba hanohy ny resaka momba ny fahasambaram-pianakaviana, dia ho azonao atao ny hilaza zavatra mitovy amin’izao manaraka izao:
◼ “Fony isika nihaona voalohany, dia niresaka taminao ny tsiambaratelon’ny fahasambaram-pianakaviana aho. Izany dia ny fampiharana ny torohevitra hita ao amin’ny Tenin’Andriamanitra, ny Baiboly. Raha ny amin’ny fikarakarana izay ilain’ny fianakaviana ankehitriny, inoanao ve fa lany andro, sa hoe araka ny toetr’andro, ny Baiboly?” Avelao hamaly ilay olona. Asehoy ny boky Fahalalana. Sokafy ny toko faha-2, ary vakio ilay tenin’olona averina eo amin’ny fehintsoratra faha-13. Amin’ny fampiasana ireo hevitra eo amin’ny fehintsoratra faha-3, dia manolora fianaram-pianakaviana mifototra amin’ny Baiboly.
10 Amin’ny firaketana an-tsoratra amin’ny fomba marina sy amin’ny fanaovana fiomanana tena ilaina, ary ny fiverenana haingana mba hampitomboana ny fahalianany, dia afaka mampiseho ilay karazana fitiava-namana izay hitarika azy ireo ho amin’ny lalan’ny famonjena, isika. — Matio 22:39; Gal. 6:10.