Miantehera Amin’i Jehovah mba Hampitomboany ny Voa
1 “Izay aho vao nahazo ilay fifaliana tsy manam-paharoa nanampy hanorina kongregasiona vaovao. Izany dia nitaky ezaka tamim-pitandremana sy vavaka tsy an-kijanona ary fianteherana tamin’i Jehovah, ilay ‘mampitombo’, nandritra ny roa taona mahery.” Izany no nosoratan’ny mpisava lalana malina tsara iray, izay nianatra fa ilaina ny miantehitra amin’i Jehovah mba hitomboan’ny voa nafafy. (1 Kor. 3:5-9). Eo am-pikarohantsika ireo olona tia zavatra ara-panahy, isika koa dia mila ny fanohanan’Andriamanitra, raha tiantsika hamokatra ny fanompoantsika. — Ohab. 3:5, 6.
2 Mitaky fanolokoloana ny fitomboan’ny voa nafafy: Mila ny hokolokoloina ny voan’ny fahamarinana, raha tiana hitombo. Ny fiverenana mitsidika rehefa afaka iray na roa andro, dia miteraka vokatra tsara matetika. Aoka ianao ho feno hafanana sy fisakaizana. Ataovy izay tsy hahasanganehana ilay olona. Aza ianao foana no miteny. Avelao izy hahalala anao, ary asehoy fa manam-piheverana azy ianao.
3 Mandritra ny Jolay ka hatramin’ny Aogositra isika dia mampifantoka ny ezaka amin’ny fanolorana bokikely isan-karazany amin’ny olona hitantsika. Kanefa, mila manolokolo ny fahalianana rehetra hitantsika koa isika, na nisy zavatra napetraka na tsia. Manao izany isika amin’ny alalan’ny fiverenana mitsidika sy amin’ny fanolorana fampianarana Baiboly. (Matio 28:19, 20). Mba hahatongavana amin’izany, dia azo ampiasaina mba hanombohana fampianarana ny bokikely Takina. Mety hanampy anao ireto fanoloran-kevitra efatra manaraka ireto.
4 Raha olona manahy ny amin’ny toe-javatra miharatsy hatrany no niresahanao, dia ho azonao atao ny hanohy ilay resaka amin’ny filazana hoe:
◼ “Mino aho fa manahy toy ny tenako koa ianao, ny amin’ny fitondran-tenan’ny olona mikororosy. Mahare tatitra mampalahelo isika momba ny herisetra an-tokantrano, izay miafara amin’ny fitondrana ratsy ny zanaka sy ny ray aman-dreny ary ny vady. Ary toa tsy mampaninona olona maro ny mandainga na mangalatra, raha ahitan’ny tenany tombontsoa izany. Mihevitra ve ianao fa miraharaha ny amin’ny fomba iainan’ny olona ny fiainany Andriamanitra? [Avelao ilay olona hamaly.] Andriamanitra dia nanorina fari-pitsipika sasany mba harahin’ny olombelona, ary tsy mavesatra amintsika izy ireo, raha ny tena izy.” Vakio ny 1 Jaona 5:3. Avy eo, dia manolora ny bokikely Takina, ary sokafy ny lesona faha-10. Vakio ny fehintsoratra voalohany. Tondroy ireo teny amin’ny soramandry eo am-piandohan’ny fehintsoratra 2-6, ary anontanio ilay tompon-trano hoe fanao inona no heveriny fa tena manimba ny olona. Vakio ilay fehintsoratra mifandray aminy ary mijere andinin-teny iray na roa, raha mamela hanao izany ny toe-javatra. Farano amin’ny famakiana ny fehintsoratra faha-7, ary avy eo dia manaova fandaharana mba hiverenana sy hanohizana ilay resaka.
5 Amin’ireo izay miahy ny amin’ny fiainam-pianakaviana, dia ho azonao atao ny hilaza zavatra toy izao:
◼ “Mihevitra ve ianao fa mety ny manampo fa hanome antsika ireo fitaovana ilaintsika mba hanorenana fiainam-pianakaviana vanona ny Mpamorona?” Avelao izy hamaly. Asehoy ny bokikely Takina, sokafy ny lesona faha-8, ary hazavao fa izy io dia mirakitra fotopoto-pitsipika avy ao amin’ny Baiboly ho an’ny mpianakavy tsirairay. Lazao fa vonona ianao hampiseho ny fomba fampiasa ilay bokikely miaraka amin’ny Baiboly, mba handraisan-tsoa be indrindra avy aminy. Araho ireo toromarika hita eo amin’ny pejy faha-2. Manaova fandaharana mba hiverenana sy hanohizana ny fianarana ilay lesona, na raha efa vitanareo ilay izy, mba hianarana lesona iray hafa ao amin’ilay bokikely ka hofidin’ilay tompon-trano.
6 Indro misy tari-dresaka mivantana ho azonao ampiasaina mba hanolorana ny fandaharam-pianarana Baiboly ataontsika. Asehoy ny bokikely “Takina”, ary milazà hoe:
◼ “Itỳ bokikely itỳ dia mirakitra fandaharam-pianarana feno tsara, izay mahafaoka ireo fampianarana fototry ny Baiboly. Isaky ny pejy ianao dia hahita valiny ho an’ny fanontaniana izay nanahirana ny sain’ny olona nandritra ny an-jatony taona maro. Ohatra, Inona moa no fikasan’Andriamanitra ho an’ny tany?” Sokafy ny lesona faha-5, ary vakio ireo fanontaniana eo am-piandohan’ilay lesona. Anontanio ilay tompon-trano hoe iza amin’ireo no tena mahaliana azy, ary avy eo dia vakio ny (ireo) fehintsoratra mifanandrify aminy, ka vakio ireo andinin-teny mety tsara. Hazavao fa hahafa-po sy ho mora hita toy izany koa ny valiny ho an’ireo fanontaniana hafa. Manolora hevitra ny hiverina indray mba hiresaka momba ny fanontaniana iray sy ny valiny.
7 Na mety ho tianao kokoa ny hanandrana tari-dresaka notsorina mba hanombohana fampianarana Baiboly, amin’ny filazana hoe:
◼ “Fantatrao ve fa amin’ny fakana minitra vitsivitsy monja, dia ho afaka ny hahita ny valiny ho an’ny fanontaniana ara-baiboly lehibe iray ianao? Ohatra, ...” Avy eo dia milazà fanontaniana iray izay hita eo am-piandohan’ny lesona iray amin’ilay bokikely, dia fanontaniana izay heverinao fa hanintona ilay olona. Mba hahazoana hevitra ho azonao ampiasaina, dia jereo ny fehintsoratra 15 sy 16 ao amin’ny takelaka fanampiny amin’ny Fanompoantsika Ilay Fanjakana volana Martsa 1997, mitondra ny lohateny hoe “Misikìna Fahasahiana mba Hanao Fiverenana Mitsidika”.
8 Anisan’ny hoe manaiky ho “mpiara-miasa” amin’Andriamanitra ny fanekena amim-pifaliana ilay zava-tsarotra hanao fiverenana mitsidika sy hitarika fampianarana Baiboly. (1 Kor. 3:9). Rehefa miezaka mafy mba hanolokolo ny fahalianana hitantsika isika, ary avy eo dia miantehitra amin’i Jehovah mba hampitombo azy io, dia hahita ilay tena fahafaham-po tsy hita amin’ny fanaovana asa hafa.