Ataovy eo Amin’ny Toerana Voalohany Ireo Zavatra Lehibe kokoa
1 Inona moa no anisan’ny zava-dehibe iankinan’ny fahasalamantsika ara-panahy? Azo antoka fa ho tafiditra amin’izany ny fianarana manokana, ny fanatrehana fivoriana, ny faharetana amin’ny vavaka, ny fifaneraserana tsara, ary ny fanompoana Kristiana. Tsy afaka mihazona fahasalamana ara-panahy tsara isika, raha tsy manao ny zavatra lehibe kokoa ho loha laharana eo amin’ny fiainantsika.
2 Kanefa, isika rehetra dia samy tsy maintsy miady amin’ny fanirian’ny nofo, sy mila fifehezana. (Gal. 5:17). Tsy tokony hihevitra na oviana na oviana isika hoe hitondra soa kokoa ho antsika ny fikatsahana ny fanirian’ny tenantsika manokana. (Jer. 17:9). Noho izany, raha tiantsika ny hiaro ny fontsika, ka tsy ho voafitaka, dia tena zava-dehibe indrindra ny fandinihan-tena. — Ohab. 4:23; 2 Kor. 13:5.
3 Diniho ny fonao: Afaka manao izany ianao amin’ny fanontanian-tena amim-pahatsorana toy izao: Moa ve aho maniry mafy ny hamaky ny Tenin’Andriamanitra? (2 Pet. 2:2). Moa ve aho mahatakatra ny maha-zava-dehibe ny fanatrehana ireo fivoriana rehetra alamin’ny kongregasiona? (Heb. 10:24, 25). Moa ve aho maharitra amin’ny vavaka? (Rom. 12:12). Moa ve aho mitady ny fifaneraserana amin’ireo olona araka ny fanahy? (Rom. 1:11, 12). Moa ve ny tenako mahatsapa ny adidiko hanambara ny vaovao tsara? (1 Kor. 9:16). Raha eny no valin’ireo, dia hampiseho izany fa maniry ny hametraka ireo zavatra lehibe kokoa eo amin’ny toerana voalohany ianao.
4 Diniho ny fahazaranao isan’andro: Mila ny manao zavatra mifanaraka amin’ny fandinihana ny fonao ianao, ka hanorina laharam-pahamehana eo amin’ny fampiasana ny fotoana. Izany dia mahafaoka ny fandaharana fotoana hamakiana tsy tapaka ny Baiboly sy ny nomerao tsirairay amin’ny Tilikambo Fiambenana sy ny Mifohaza!, sy hanomanana ireo fivoriana. Tsy maintsy anokanana fotoana ihany koa ny fiarahan’ny fianakaviana mianatra sy mivavaka. Asio fetrany ny fotoana lanina eo anoloan’ny televiziona na ny ordinatera. Aoka ianao ho tapa-kevitra ny hanatrika ireo fivoriana rehetra alamin’ny kongregasiona, handamina ny zavatra hafa rehetra arakaraka izany. Manaova fandaharana mba handraisan’ny fianakaviana manontolo anjara, amin’ny fanompoana eny amin’ny saha, isan-kerinandro.
5 Tsy isalasalana fa ny fametrahana ireo zavatra lehibe kokoa eo amin’ny toerana voalohany eo amin’ny fiainantsika dia ho antom-pifaliana ho antsika.