Fampianarana Baiboly Mamokatra Mpianatra
1 “Inona moa no misakana ahy tsy hatao batisa?”, hoy ny fanontanian’ny ionoka Etiopiana iray, rehefa avy “nitory an’i Jesosy taminy” i Filipo. (Asa. 8:27-39). Raha ny amin’ilay ionoka, dia efa nanana fitiavana ny soratra ara-tsindrimandrin’Andriamanitra izy, ka rehefa avy nahazo fanampiana ara-panahy avy tamin’i Filipo izy, dia vonona ny ho tonga mpianatra. Kanefa tsy ny olona rehetra no miaiky fa mila ny mandinika ny Soratra Masina ny tenany.
2 Soa ihany ny fandaminan’i Jehovah fa nanome ilay bokikely vaovao hoe Boky Iray ho An’ny Olona Rehetra, mba hampirisihana ny olona handinika ny hafatry ny Baiboly ho an’ny androntsika. Ny fanazavana ao amin’ilay bokikely dia tokony hanintona ny olona tso-po izay mety ho nahita fianarana nefa tsy mahalala firy momba ny Baiboly. Io fitaovana faran’izay tsara io, dia natao handrisihana ny olona mba haniry handinika ny Baiboly.
3 Rehefa manomboka fampianarana Baiboly iray ianao, dia hanampy ny hijerena indray ireo fanoloran-kevitra faran’izay tsara hita ao amin’ny takelaka fanampiny amin’ny Fanompoantsika Ilay Fanjakana Jona 1996, momba ny fitarihana fampianarana Baiboly mandaitra amin’ny boky Fahalalana. Rehefa mandeha ny fianarana, dia diniho ny fandrosoana nataon’ilay mpianatra, mba hahafahanao hamantatra izay faritra ilana fiheverana bebe kokoa. Ampirisiho ilay mpianatra hanomana mialoha ny fianarany, ka hijery ireo andinin-teny. Ny fanazavana ataony amin’ny fiteniny manokana dia mety hanome taratry ny fankasitrahany lalina ny fahamarinana. Mazàna ireo izay mandroso haingana, dia ireo izay mamaky ny zavatra vita an-tsoratra hafan’ny Fikambanana sy manatrika tsy tapaka ireo fivorian’ny kongregasiona. Ampirisiho izy hiresaka amin’ny hafa, momba izay ianarany. Asehoy azy amin-katsaram-panahy izay ilainy hatao mba handrosoana ara-panahy. Tsy tokony hitarika fampianarana tsy misy farany amin’ireo izay tsy mety manapa-kevitra, isika. Tokony hanapa-kevitra samirery ny hianatra sy hiandany mafy amin’ny fahamarinana ary handroso ho amin’ny fanoloran-tena sy ny batisa, ireo mpianatra.
4 Any amin’ny tokantrano sasany, dia fianarana mihoatra ny iray no tarihina, satria tsy miara-mianatra ireo mpianakavy samihafa ao. Kanefa, amin’ny ankamaroan’ny toe-javatra, dia mety ho tsara kokoa ny mitarika fampianarana Baiboly amin’ilay fianakaviana miaraka, satria hampifanatona ilay fianakaviana eo amin’ny ara-panahy, izany.
5 Ny didin’i Jesosy dia ny handehanantsika hanao mpianatra. (Matio 28:19). Mba hanaovana izany, isika dia tsy maintsy mitarika fampianarana Baiboly izay manampy ireo mpianatra ho tonga amin’ilay dingana mety hanontanian’izy ireo hoe: “Inona moa no misakana ahy tsy hatao batisa?”