Manolora Gazety Rehefa Manompo
1 “Mahaliana, tonga amin’ny fotoana ilana azy, ary mampahery.” “Ny gazety mampahery indrindra novakiko hatramin’izay.” Mahalaza tsara ny fahitan’ny mpamaky maneran-tany Ny Tilikambo Fiambenana sy ny Mifohaza! ireo teny ireo. Voaporofo tokoa fa fitaovana tena tsara hitoriana ny vaovao tsara amin’ny “karazan’olona rehetra” ny gazetintsika.—1 Tim. 2:4.
2 Nahazo gazety Mifohaza! niresaka loha hevitra nahaliana azy, ny mpandraharaha iray nino ny Andriamanitra telo izay iray. Nisy gazety Ny Tilikambo Fiambenana niaraka tamin’ilay izy, ka novakiny koa tatỳ aoriana. Nahatonga azy handinika tsara indray momba ilay zavatra ninoany ny lahatsoratra iray tao anatiny. Lasa liana tamin’ny fahamarinana izy, ka natao batisa enim-bolana tatỳ aoriana. Nahazo tsy tapaka ny gazetintsika ny lehilahy hafa iray, nefa tsy namaky azy ireny mihitsy. Ny vadiny no namaky izany, na dia nandositra ny Vavolombelon’i Jehovah aza. Nanohina ny fon’io vehivavy io ny fampanantenan’ny Baiboly fa ho lasa paradisa ny tany, ary ho feno olo-marina. Lasa mpanompon’i Jehovah izy sy ny zanany lahy ary ny rahavaviny, tatỳ aoriana.
3 Atolory miaraka: Hita avy amin’ireo zava-nitranga ireo, fa tsy fantatsika hoe iza no hamaky ny gazetintsika, na inona no loha hevitra mety hahaliana ny olona. (Mpit. 11:6) Tsara foana àry raha atolotra miaraka ny Tilikambo Fiambenana sy ny Mifohaza!, na dia iray ihany aza, amin’ny ankapobeny, no hasongadintsika. Azo atao, indraindray, ny manolotra gazety maromaro, rehefa manao fiverenana mitsidika.
4 Tsara raha manokana andro iray hizarana gazety, isika, isan-kerinandro. Nofidina ho “Andron’ny Gazety” ny asabotsy, ao amin’ny Kalandrien’ny Vavolombelon’i Jehovah 2005. Mety ho andro hafa anefa no atokan’ny mpitory sasany hanaovana izany, arakaraka ny toe-javatra misy azy sy ny toe-javatra eo an-toerana. Anisan’ny fandaharam-potoananao isan-kerinandro ve ny fizarana gazety?
5 Manàna tanjona: Hazoto kokoa hametraka gazety isika, raha faritantsika mialoha ny isan’ny gazety hapetratsika isam-bolana. Efa misy olona fanateranao gazety ve? Manolotra gazety amin’izay olona hitanao eny amin’ny fanompoana ve ianao? Afaka manolotra gazety ve ianao, rehefa mitory eny an-dalana sy any amin’ny faritany be toeram-piasana ary any amin’ny toerana falehan’ny olona? Mitondra gazety ve ianao, rehefa manao dia sy miantsena ary mamonjy fotoana any amin’ny toerana iray? Izarao Ny Tilikambo Fiambenana sy Mifohaza! ny olona amin’ny fotoana rehetra azo anaovana izany, mba handraisany soa.
6 Azontsika atao tanjona koa ny mametraka ireo gazety efa elaela tany amintsika. Mbola sarobidy foana ny fanazavana ao anatiny, na dia tsy voapetraka ao anatin’ny iray na roa volana aorian’ny ivoahany aza ilay izy. Zarao amin’ny olona liana izy ireny. Tonga “amin’ny fotoana mety” Ny Tilikambo Fiambenana sy ny Mifohaza!, ho an’ny olona an-tapitrisany. (Matio 24:45) Aoka àry isika hampiasa azy ireny hanampiana olona maro kokoa hahalala sy hanompo an’i Jehovah.
[Fanontaniana]
1, 2. Inona no soa nentin’ny Tilikambo Fiambenana sy ny Mifohaza! teo amin’ny olona?
3. Inona no mahatsara ny hoe atolotra miaraka ny gazety?
4. Inona no azontsika atao mba hahafahantsika hizara gazety?
5. Rahoviana isika no afaka mametraka gazety, ary inona no hanampy antsika hanao izany?
6. Ahoana no azontsika ampiasana tsara ny gazety efa elaela?