Tsarovy sy Ankasitraho ny Vidim-panavotana
1, 2. Nahoana isika no tokony hahatsiaro sy hankasitraka ny vidim-panavotana?
1 Ho fankatoavana ny didin’i Jesosy Kristy, dia hivory mba hahatsiaro ny nahafatesany ny Kristianina maneran-tany, amin’ny asabotsy 22 Martsa 2008 aorian’ny filentehan’ny masoandro. (Lioka 22:19; 1 Kor. 11:23-26) Manao izany isika satria tena mankasitraka ny zava-nitranga tamin’io fotoana io, 1 975 taona lasa izay. Tsy nivadika mihitsy i Jesosy rehefa nampijalina sy novonoina teo amin’ny hazo fijaliana. Nanamasina ny anaran’ny Rainy izy tamin’izany, sady namaly tamin’ny fomba tsara indrindra ny fiampangan’i Satana.—Joba 1:11; Ohab. 27:11.
2 Lasa nanan-kery ny fifanekena vaovao noho ny ra nalatsak’i Jesosy. Azo nekena ho zanak’Andriamanitra àry ny olombelona tsy lavorary, ary afaka manantena hiara-manjaka amin’i Kristy ao amin’ny Fanjakany any an-danitra. (Jer. 31:31-34; Marka 14:24) Niharihary koa ny halalin’ny fitiavan’Andriamanitra ny olombelona rehefa nanome ny Zanany malalany ho sorona izy, araka ny nohazavain’i Jesosy tamin’i Nikodemosy.—Jaona 3:16.
3. Inona no soa horaisin’ireo manatrika ny Fahatsiarovana?
3 Asao ny hafa: Mampirisika antsika hanao lisitra ny olom-pantatsika sy hanasa azy ireo Ny Fanompoantsika Ilay Fanjakana Janoary. Efa nanomboka nanasa an’ireo olona nataonao lisitra ve ianao? Misy ezaka manokana mba hanasana ny olona hanatrika ny Fahatsiarovana, manomboka ny 1 Martsa. Manao fandaharana mba handraisana anjara faran’izay betsaka amin’izany ve ianao? Handre fanazavana avy ao amin’ny Soratra Masina ireo manatrika ny Fahatsiarovana. Ho afaka hanatanjaka ny finoany ny vidim-panavotana izany, ka hitarika azy ho amin’ny fiainana mandrakizay.—Rom. 10:17.
4. Nahoana isika no tokony ho tonga aloha amin’ny Fahatsiarovana?
4 Tokony hiezaka ho tonga aloha isika, raha afaka manao izany, mba hiarahaba tonga soa an’ireo nasaina. Maro be matetika no tonga manatrika ny Fahatsiarovana, ka tena ilaintsika ny maneho fiheverana manokana an’ireo vaovao sy ireo efa manatrika fivoriana tsindraindray.
5. Ahoana no hanomananao ny fonao ho amin’ilay fankalazana?
5 Omano ny fonao: Misy andinin-teny natao hovakina amin’ny vanim-potoan’ny Fahatsiarovana, manomboka ny 17 Martsa. Hita ao amin’ny Fandinihana ny Soratra Masina Isan’andro 2008 sy ny Kalandrie 2008 izany. Ho vonona ho amin’ny fankalazana ny Fahatsiarovana ny fonao, raha misaintsaina ireo fisehoan-javatra lehibe nitranga nandritra ireo andro farany niainan’i Jesosy teto an-tany ianao. (Ezra 7:10) Rehefa misaintsaina amim-bavaka an’ireny fitantarana ireny ianao, dia vao mainka hitombo ny fankasitrahanao ny fitiavan’i Jehovah sy ny fitiavan’ny Zanany, noho izy ireo nanome ny vidim-panavotana.—Sal. 143:5.
6. Inona no soa horaisintsika raha miezaka mankasitraka bebe kokoa ny vidim-panavotana isika?
6 Enga anie isika rehetra hiomana tsara sy hanampy ny hafa ho vonona ho amin’ny Fahatsiarovana, eo am-piandrasana an’io fotoan-dehibe io. Hihatsara ny fifandraisantsika amin’i Jehovah sy ny Zanany, raha mahatsiaro sy mankasitraka ny vidim-panavotana isika. (2 Kor. 5:14, 15) Handrisika antsika hanahaka an’i Jehovah sy ny Zanany izany, ka hanjary ho tia ny hafa sy hahafoy tena isika.—1 Jaona 4:11.