Fanasana Fahatsiarovana Hozaraina Maneran-tany!
1. Inona no ezaka manokana hatao alohan’ny Fahatsiarovana?
1 “Ataovy hatrany izao ho fahatsiarovana ahy.” (Lioka 22:19) Mankatò an’io didin’i Jesosy io ny mpanompon’i Jehovah. Hivory miaraka amin’ireo olona liana àry izy ireo, amin’ny 30 Martsa 2010, mba hahatsiaro ny nahafatesan’i Jesosy. Hisy fanasana manokana hozaraina maneran-tany manomboka ny 13 ka hatramin’ny 30 Martsa.
2. Ahoana no azo anolorana an’ilay fanasana?
2 Fomba hanolorana azy: Atolory an’ilay olona itorianao ilay fanasana mba ho hitany ny sary eo amin’ny pejy voalohany, ary milazà hoe: “Olona an-tapitrisany eran-tany no hiaraka hahatsiaro ny nahafatesan’i Jesosy, amin’ny 30 Martsa hariva. Tonga eto aho mba hanome fanasana ho anao sy ny fianakavianao. Asaina koa ireo namanao. Efa voalaza ato ny fotoana sy ny toerana hanaovana an’ilay fankalazana.” Afaka mamaky an’ilay didy ao amin’ny Lioka 22:19 ianao, raha mamela ny toe-javatra. Tadidio anefa fa kely ny fotoana hamitantsika ny faritanintsika, ka tsara raha atao fohy ny resaka.
3. Iza avy no azontsika asaina?
3 Ahoana raha lehibe ny faritany? Mety hilaza amin’ny mpitory ny anti-panahy hoe azo amelana fanasana eo am-baravaran’izay tsy tratra an-trano, amin’ny fitoriana voalohany. Raha mety, dia atolory miaraka amin’ny gazety ilay fanasana. Asao ny olona liana tsidihinao na ampianarinao Baiboly, ny havana, mpiara-miasa na mpiara-mianatra, mpiray tanàna, ary ny olom-pantatrao hafa.
4. Inona no hataontsika raha mankasitraka ny fitiavan’i Jehovah isika?
4 Miomàna mba handray anjara feno: Fotoana tsara hanompoana bebe kokoa ny vanim-potoan’ny Fahatsiarovana. Afaka manamboatra ny fandaharam-potoananao ve ianao, mba hanaovana ny asan’ny mpisava lalana mpanampy? Manan-janaka na manana mpianatra Baiboly efa mandroso tsara ve ianao? Raha izany, dia manatòna ny anti-panahy mba hahitana raha mahafeno fepetra ho mpitory tsy vita batisa izy, ka handray anjara amin’ilay ezaka manokana. Tia antsika i Jehovah ka nanome ny vidim-panavotana. Raha mankasitraka izany isika, dia hanatrika ny Fahatsiarovana, ary hanasa olona betsaka araka izay azo atao.—Jaona 3:16.