Toromarika ho An’ireo Manana Anjara Amin’ny Fivoriana Momba ny Fanompoana
Hotsorina ny teny ampiasaina ao amin’ny fandaharana ho an’ny Fivoriana Momba ny Fanompoana manomboka amin’ity Fanompoantsika Ilay Fanjakana ity. Hosoloana an’ireto toromarika ireto ny tao amin’ilay lahatsoratra hoe “Omano Tsara ny Fivoriana Momba ny Fanompoana”, tao amin’ny Fanompoantsika Ilay Fanjakana Mey 2009.
◼ Lahateny: Mamelabelatra loha hevitra avy ao amin’ny loharanon-kevitra iray ny mpandahateny, ka izay tena ilain’ny fiangonana no ifantohany. Tsy mandray anjara ny mpanatrika.
◼ Fanontaniana sy valiny: Mitovy amin’ny Fianarana Ny Tilikambo Fiambenana ity anjara ity. Manao teny fampidirana sy famaranana fohy ilay mpitarika, ary mametraka fanontaniana isaky ny fehintsoratra. Tsy tokony hibodo resaka izy. Azo vakina ireo andinin-teny fototra, raha ampy ny fotoana. Tsy vakina ny fehintsoratra, raha tsy hoe misy toromarika momba izany angaha.
◼ Lahateny misy fiaraha-midinika: Lahateny andraisan’ny mpanatrika anjara izy ity. Tsy lahateny ranoray ilay izy, nefa koa tsy fanontaniana sy valiny fotsiny.
◼ Fampisehoana sy fanadinadinana: Rehefa misy toromarika hoe asio fampisehoana dia tokony hanisy fampisehoana ilay rahalahy hanao ity anjara ity, ka tsy voatery hoe izy no hanao ilay fampisehoana. Tokony ho olona mahay sy fakan-tahaka no hofidiny amin’izany, ary horesahiny mialoha be ireo olona ireo, raha azo atao. Tsy mety raha mpitory vaovao na tsy za-draharaha no ampanaovina fampisehoana, satria fotsiny hoe tiana hiaka-tsehatra izy. Mety ho azo atao olona itoriana anefa ny sasany aminy, raha tena tsy mahita. Tokony hitodika any amin’ny mpanatrika ny mpanao fampisehoana. Tokony hiakatra eny amin’ny lampihazo ireo olona atao fanadinadinana, fa tsy eny am-pitoerana fotsiny no hiteny. Tokony hatao famerenana mialoha ny fampisehoana sy ny fanadinadinana. Tsy hofoanana ny fampisehoana na ny fanadinadinana, na dia tsy maintsy manafohy ny anjarany aza ilay rahalahy satria mihoatra ny fotoana. Tokony hanontany ny anti-panahy mpandrindra na anti-panahy hafa ny mpanampy amin’ny fanompoana alohan’ny hifidianany an’ireo mpandray anjara.
Raha misy anjara hafa noho ireo, dia araho tsara ny toromarika momba izany. “Hatao amim-pahamendrehana sy amim-pilaminana” ny Fivoriana Momba ny Fanompoana, raha samy manaraka ireo voalaza ireo ny rahalahy rehetra.—1 Kor. 14:40.