Tsy ny Faran’izao Tontolo Izao ny Pesta Mainty
NISY sambon’ny mpandranto avy tany Atsinanana niditra ny seranan’i Messine, any Sicile, nandritra ny volana Oktobra 1347. Lehilahy narary sy efa ho faty no nivoy azy ireo. Nisy fivontosana mainty sy nitovy habe tamin’ny atody, nitsi-dra sy nana, tamin’ny tenan’izy ireo. Niaritra fanaintainana mafy ireo tantsambo ary maty tao anatin’ny andro maromaro nisehoan’ny famantarana aretina voalohany.
Nitsoriaka nanatevin-daharana ny biby mpikiky nonina teo an-toerana, ireo voalavo avy tamin’ireo sambo. Ireo voalavo dia nitondra parasy nisy basiliosy mahafaty ny olombelona. Tamin’izany no nielezan’ilay valanaretina fantatra hoe pesta, ny Pesta Mainty, ilay areti-mandringana ratsy indrindra teo amin’ny tantaran’i Eoropa hatreo amin’io fotoana io.
Nanana endriny roa ilay pesta. Ny iray, nifindra tamin’ny alalan’ny kaikitry ny parasy nitondra otrikaretina, dia niely nanerana ny ra ary nahatonga fivontosana sy fahaverezan-dra anaty. Ilay hafa, nifindra tamin’ny hafa tamin’ny alalan’ny kohaka na ny evina, dia nampiditra otrikaretina tao amin’ny havokavoka. Koa satria samy nisy ireo endriny roa ireo, dia niely haingana sy namely faran’izay mafy ilay aretina. Tao anatin’ny telo taona monja, dia namono ny ampahefatry ny mponin’i Eoropa izy io; angamba olona 25 tapitrisa no maty.
Tsy nisy nahalala, tamin’izany fotoana izany, ny fomba nifindrafindran’ilay aretina tamin’ny olona. Nino ny sasany fa voapoizina ny rivotra, angamba noho ny horohoron-tany iray na ny filaharan’ireo planeta tamin’ny fomba tsy nahazatra. Ny hafa nihevitra fa ny fijerena olona iray voan’ilay aretina fotsiny dia ampy hampaharary ny olona. Na dia samihafa aza ny fihevitry ny olona, dia mazava fa faran’izay mora nifindra ilay aretina. Nomarihin’ny dokotera frantsay iray fa toy ny hoe ny marary iray dia “afaka namindra otrikaretina tamin’izao tontolo izao”.
Tsy nahafantatra fisorohana mialoha na fitsaboana ny olona. Olona maro no nieritreritra faminaniana ara-baiboly, toy ilay voasoratra ao amin’ny Lioka 21:11, izay manambara mialoha ny hisian’ny areti-mandringana mandritra ny fotoan’ny farany. Na dia teo aza ny vola narotsaka tao amin’ireo fiangonana, dia mbola namely mafy ihany ilay pesta. Nanoratra toy izao ny lehilahy italiana iray tamin’izany fotoana izany: “Tsy nisy lakolosy naneno na olona nitomany, na nanao ahoana na nanao ahoana ny nafoiny, satria saika ny rehetra no nanampo ny ho faty (...) nilaza sy nino ny olona hoe: ‘Itỳ no faran’izao tontolo izao.’ ”
Kanefa, tsy izay no farany. Tany akaikin’ny faran’ny taonjato faha-14, dia nitsahatra ilay pesta. Nitohy ihany ny tantaran’izao tontolo izao.
[Sary nahazoan-dalana, pejy 3]
Archive Photos