Avy Amin’ny Mpamaky

Tapaka Lalan-dra Valim-bavako ilay fitohitohizan-dahatsoratra hoe “L’accident vasculaire cérébral” (8 Febroary 1998, frantsay). Teo am-panatrehana fivoriambe kristianina izahay mivady, taona vitsivitsy lasa izay, raha tapaka lalan-dra ny vadiko. Rehefa niezaka nanoratra teny fohy ho ahy izy, dia nivilana teo amin’ilay taratasy ny tanany; ny ilany havanana iray manontolo no voa. Nanampy ahy betsaka ilay lahatsoratra, ka tsy ho voatanisako eto izany. Mahafinaritra ny mahafantatra fa tsy nanadino anay i Jehovah.

F. S. H., Etazonia

Ora vitsivitsy monja talohan’ny nahazoako io gazety io, dia niezaka nanazava tamin’ny vadiko izay tsapako aho, nefa tsy nahomby. Tsy afaka nilaza ny fihetseham-poko araka ny nitiavako azy mantsy aho, noho izaho tapaka lalan-dra. Efa intelo izao no namakiako io gazety io. Namaky azy io koa ny vadiko.

R. Z., Italia

Tapaka lalan-dra ny raiko, dia maty, tamin’ny herintaona. Mpanompo nahatoky teo anatrehan’i Jehovah, nandritra ny taona maro, izy. Nanampy ahy hahatakatra ny fihetsiny talohan’ny nahafatesany ilay lahatsoratra. Nanampy ahy hahatakatra tsara kokoa izay zavatra nodiavin’ny raiko ireo fanazavana momba ny fiovan’ny fihetseham-po, ary koa ny antony mety tsy hahafahan’ny olona iray tapaka lalan-dra hiresaka tsara.

V. C., Etazonia

Tapaka lalan-dra aho tamin’ny herintaona, ary mbola mitsabo ny ilako havia izay malemy foana aho hatramin’izao. Hanaisotra ny zava-miafina sy ny tahotra sasany mifandray amin’io aretina io ireo lahatsoratra ireo. Diso ny fiheverana hoe ny olona be taona ihany no tapaka lalan-dra. Vao 47 taona aho tamin’izaho voa.

A. A., Angletera

Nanampy ahy betsaka hahatakatra ny nanjo an’i Lucia, zanako vavy, ilay lahatsoratra. Voan’ny lozam-pifamoivoizana mantsy izy, fony izy roa volana, ary naratra mafy ny lohany. Tsy afaka milaza ny fihetseham-pony izy. Nanampy ahy hahatakatra ny antony anefa ilay lahatsoratra.

N. K., Slovakia

Mpitsabo mpanampy nahazo diplaoma aho, ary nahazo filazam-pahaizana momba ny fampianarana ny marary hampiasa indray ny rantsambatany, ary tena efa za-draharaha amin’ny fikarakarana marary tapaka lalan-dra. Ny tena nankasitrahako indrindra tao amin’io lahatsoratra io dia ny fomba nilazalazany izay zavatra iaretan’ny fianakaviana manana marary tapaka lalan-dra: tena nahay niombom-pihetseham-po tamin’izy ireo ilay lahatsoratra.

L. C., Etazonia

Voan’ny accident ischémique transitoire (ra tsy mikoriana tsara ao amin’ny atidoha) ny reniko. Raha ny toe-batany no jerena, dia azo lazaina hoe sitrana tanteraka izy. Namela voka-dratsy lalina sy naharitra teo amin’ny sainy anefa ilay izy. Natanjaka sy natoky tena foana izy, nefa dia nanjary faran’izay marefo ankehitriny. Misaotra noho ny nanasongadinanareo ny vokatr’io aretina io eo amin’ny saina.

R. C., Italia

Indroa tapaka lalan-dra ny reniko, roa taona lasa izay. Tamin’ilay voalohany, dia nanjary very tadidy izy, ary tamin’ilay faharoa, dia lasa nalemy ny ilany havanana. Tsy manam-paharetana aminy aho indraindray, ka manao teny mampalahelo azy. Nampirisika ahy hahatakatra tsara kokoa izay manjo azy ilay lahatsoratrareo.

R. T. S., Brezila