Avy Amin’ny Mpamaky

Fifindran’ny Hépatite Toa nisy fahadisoana tao amin’ilay hoe “Areti-mifindra Fahita Indrindra avy Amin’ny Ra” teo ambanin’ilay hoe “Fijerena An’izao Tontolo Izao” tao amin’ny nomerao tamin’ny 8 May 2000. Nilaza mantsy ianareo fa miely amin’ny alalan’ny firaisan’ny lahy sy ny vavy indrindra indrindra, na amin’ny alalan’ny ra misy otrikaretina, ny virosin’ny hépatite C [HCV]. Raha ny marina, dia toe-javatra maningana ny fifindran’ilay aretina amin’ny alalan’ny firaisana ary tsy mitranga raha tsy ao anatin’ny toe-javatra voafaritra tsara, toy ny mandritra ny fadimbolana, ohatra.

C. A., Frantsa

Toa nahatonga ny olona ho diso hevitra tokoa ilay izy, satria ny anjara asan’ny firaisan’ny lahy sy ny vavy eo amin’ny fielezan’ny hépatite C tokoa dia toa tsy lehibe toy ny anjara asan’ny fitsindronana zava-mahadomelina. Araka ny voalazan’ny “Harvard Health Letter” tamin’ny Febroary 1996, dia tsy atahorana firy, na tsy atahorana mihitsy ho voan’ny HCV ny vadin’ny olona voan’ny HCV. Na izany aza, ny lahatsoratra iray tao amin’ny nomeraon’ny “The New England Journal of Medicine” tamin’ny 19 Aogositra 1999 dia nanao tatitra momba ny fihanahan’ny HCV tany Etazonia nanomboka tamin’ny 1988 ka hatramin’ny 1994. Hoy izy io: “Ny fampiasana zava-mahadomelina sy ny tsy fitandremana mahakasika ny firaisan’ny lahy sy ny vavy, ireo no anton-javatra lehibe indrindra, tsy nifampiankina, izay nisy ifandraisany tamin’ny fifindran’ny HCV.” Hoy koa izy io: “Na dia mety ho tsy mampiely firy ny HCV aza ny fanaovana firaisana, (...) noho ny fisian’ireo olona maro be taizan’io aretina io dia bebe kokoa ny olona ho voan’ilay virosy amin’ireo izay miovaova olona anaovana firaisana.” — MPAMPANONTA.

Fitevehana Amin’ny Vatana Misaotra noho ilay lahatsoratra hoe “Manontany ny Tanora Hoe... Ahoana ny Amin’ny Fitevehana eo Amin’ny Vatana?” (8 Aprily 2000). Enina ambin’ny folo taona aho, ary nisy fotoana nieritreretako hoe mba hanao fitevehana amin’ny vatako aho. Na dia efa nanontany olona maromaro aza aho ny amin’izay fiheveran’izy ireo momba izany, dia mbola tsy azoko antoka ny amin’izay tokony hataoko. Ilay lahatsoratra mazava sy ahalalan-javatra anefa dia nanampy ahy hahatakatra fa tena tsy natao ho ahy ny fitevehana amin’ny vatana, na dia tena be mpanao aza.

E. C., Angletera

Mpihira tao amin’ny tarika iray mpanao punk rock aho taloha, ary hitako ho tonga tamin’ny fotoana tena nety mihitsy ilay lahatsoratrareo momba ny fitevehana amin’ny vatana. Mahatsikaiky tokoa ny hoe te hiseho ho manana ny maha izy azy ny olona nefa manaraka ny lamaody farany!

F. S., Etazonia