Valin’ny Fanontanianareo

◼ Inona avy no tokony hotandremantsika rehefa mitory amin’ny voafonja isika?

Valo tapitrisa, fara fahakeliny, ny voafonja maneran-tany. Liana amin’ny vaovao tsara ny sasany aminy. (1 Tim. 2:4) Misy biraon’ny sampana maharay taratasy 1 400 eo ho eo isam-bolana, avy amin’ny voafonja sy ny havany. Mangataka boky sy gazety, na mangataka ny hotsidihina izy ireo amin’izany. Maro ireo voafonja tena liana amin’ny vaovao tsara. Tsikaritra anefa fa misy voafonja mody miseho ho liana, satria te hanararaotra ny vahoakan’Andriamanitra fotsiny. Noho izany, dia tokony hanaraka ireto fampitandremana momba ny fitoriana amin’ny voafonja ireto ny rehetra.

Fitoriana an-taratasy matetika no atao amin’izy ireny. Tsy tokony hanoratra amin’ny lehilahy voafonja mihitsy ny anabavy, na dia mba hanomezana fanampiana ara-panahy aza no zava-kendreny. Rahalahy za-draharaha ihany no tokony hanao izany. Anabavy za-draharaha no mety hasaina hanoratra amin’ny vehivavy voafonja, izay tena liana amin’ny fahamarinana ara-baiboly. Tsy tokony handefasana vola na fanomezana ny voafonja, na dia mety hangataka izany aza izy.

Rehefa misy voafonja liana, dia tokony homena ny fiangonana eo akaikin’ilay fonja ny anarany sy ny adiresiny. Matetika no mahafantatra ny fomba handaminana ny toe-javatra mety hitranga ireo rahalahy za-draharaha eo an-toerana. Raha tsy fantatra ilay fiangonana, dia tokony halefa any amin’ny biraon’ny sampana ilay anarana sy adiresy.

Afaka mandamina fivoriana ahafahan’ny voafonja maromaro miara-mianatra ny rahalahy voatendry hanao izany. Tsy tokony hisy fivoriana manokana halamina anefa any am-ponja, mba tsy hifanerasera be loatra amin’ny voafonja ny mpitory. Ambonin’izany, dia tsy fahendrena ho an’ny mpitory ny mitsidika fonja sy mifanerasera akaiky amin’ny voafonja, nefa tsy nisy fandaharana natao.

Enga anie isika ho ‘hendry tahaka ny menarana, ary ho mora tahaka ny voromahailala’, rehefa mitory ny vaovao tsara amin’ny voafonja.—Matio 10:16.