Fizarana Voalohany
Tena Miahy Antsika ve Andriamanitra?
1, 2. Fanontaniana inona no ataon’ny olona momba an’Andriamanitra, ary nahoana?
NISY fotoana teo amin’ny fiainanao, nety ho efa nanontanianao hoe: ‘Raha misy Andriamanitra iray izay tena miahy antsika, nahoana izy no mamela ny fijaliana be dia be toy izao hisy?’ Samy efa nandia fahoriana avokoa isika rehetra na mahalala olona nandia izany.
2 Marina tokoa fa, nandritra ny tantara, ny olona dia nijaly noho ny fanaintainana sy ny alahelo nateraky ny ady, ny halozana, ny heloka bevava, ny tsy rariny, ny fahantrana, ny aretina ary ny fahafatesan’olon-tiana. Tamin’izao taonjato faha-20 misy antsika izao fotsiny, ireo ady dia namono olona maherin’ny 100 tapitrisa. Nisy ana hetsiny tapitrisa maro hafa naratra na namoy fonenana na fananana. Zavatra mahatsiravina maro aoka izany no nitranga tamin’izao fotoana misy antsika izao, ka niteraka alahelo mafy, ranomaso be ary fahatsapana ho tsy misy fanantenana, eo amin’ny olona maro tsy hita isa.
3, 4. Ahoana no fihevitry ny maro momba ny famelan’Andriamanitra ny fijaliana hisy?
3 Ny sasany nanjary feno fankahalana ka mihevitra fa, raha misy Andriamanitra iray, dia tsy tena miahy antsika izy. Na mety hihevitra koa izy ireo fa tsy misy Andriamanitra. Ny lehilahy iray nijaly noho ny fanenjehana ara-pirazanana izay niteraka ny fahafatesan’ny namany sy ny fianakaviany tamin’ny Ady Lehibe Voalohany, ohatra, dia nanontany toy izao: “Taiza Andriamanitra tamin’ny fotoana nilantsika azy?” Ny lehilahy hafa iray, izay tafita velona tamin’ny famonoan’ny Nazia olona an-tapitrisany maro tamin’ny Ady Lehibe Faharoa, dia ory aoka izany noho ny fijaliana hitany ka nanao hoe: “Raha afaka milelaka ny foko ianareo, dia hanapoizina anareo izany.”
4 Araka izany, dia maro ireo olona tsy mahatakatra ny antony amelan’ny Andriamanitra tsara iray ny hitrangan’ny zava-dratsy. Manontany izy ireo raha tena miahy antsika izy, na koa raha misy mihitsy aza izy. Ary maro amin’izy ireo koa no mihevitra fa ho anisan’ny fiainan’olombelona foana ny fijaliana.
[Sary, pejy 2, 3]
Akaiky ve ny tontolo vaovao iray tsy hisy fijaliana?