Nahazo Fanahy Masina ny Mpianatra

Pentekosta taona 33 tamin’izay, ary nisy olona avy any amin’ny faritra samy hafa tonga hankalaza an’izany tao Jerosalema. Efa folo andro izay i Jesosy no niverina any an-danitra. Nivory tao amin’ny efitra iray ambony rihana ny mpianatr’i Jesosy 120 teo ho eo. Nisy zavatra mahagaga nitranga tampoka avy eo. Nahazo fanahy masina ry zareo. Nisy feo mafy, hoatran’ny rivotra mahery nifofofofo, heno eran’ilay trano. Dia iny fa nisy zavatra hoatran’ny lelafo teo ambony lohan’ny tsirairay tamin-dry zareo, dia lasa nahay niteny tamin’ny fiteny isan-karazany izy rehetra.

Henon’ny olona tonga tao Jerosalema ilay feo, ka lasa haingana ry zareo nijery an’izay nitranga. Gaga be ry zareo naheno ny mpianatra nahay ny fitenin-dry zareo. Dia hoy ry zareo: ‘Fa angaha moa tsy avy any Galilia ireo olona ireo? Fa ahoana koa no nahaizan-dry zareo ny fitenintsika?’

Dia nitsangana teo anoloan’ireo olona ireo i Petera sy ny apostoly hafa. Noresahin’i Petera tamin-dry zareo hoe novonoina i Jesosy, ary efa natsangan’i Jehovah. Hoy koa i Petera: ‘Efa eo ankavanan’Andriamanitra any an-danitra izao i Jesosy, dia nandatsaka ny fanahy masina izy, araka ny efa noteneniny. Izany no mahatonga an’izao zavatra mahagaga hitanareo sy henonareo izao.’

Tena tian’ny olona ny tenin’i Petera, ka hoy ry zareo: ‘Inona kay no tokony hataonay?’ Dia hoy izy: ‘Mila mibebaka ianareo, dia hatao batisa amin’ny anaran’i Jesosy. Hahazo fanahy masina koa ianareo.’ Olona 3000 teo ho eo no natao batisa tamin’iny andro iny. Taorian’izay, dia lasa be dia be vetivety kely teo ny mpianatra tao Jerosalema. Dia nampian’ny fanahy masina ny apostoly mba hamorona fiangonana betsaka kokoa, amin’izay ry zareo afaka mampianatra an’ireny mpianatra ireny an’izay notenenin’i Jesosy.