Izao Tontolo izao Hanao Ahoana Amin’ny Hoavy?
INONA no manangasanga eny am-paravodilanitra? Izao tontolo izao voaova.
Izany, raha fintinina, no tsinjon’ireo fandaminam-pandinihan’ny fitondram-panjakana amerikana, araka ny “tatitra amin’ny ankapobeny natao ho an’ny prezidà ho amin’ny taona 2000”. Ao amin’ny fizarana voalohany amin’io tatitra io, nataon’ny Filan-kevitra momba ny fahatsaran’ny manodidina sy ny Antokon-draharaham-panjakana, dia izao no azo vakina: “Ny izao tontolo izaon’ny taona 2000 dia ho hafa noho ny amin’izao andro izao amin’ny zavatra tena lehibe.” Inona izany?
Ankoatra ny zavatra hafa, dia izao no ambaran’io tatitra io:
● “Hisy olona betsaka kokoa. Raha nisy olona roa teto an-tany tamin’ny 1975, dia hisy telo amin’ny 2000.”
● “Ho nitatra ny hantsana mampisaraka ny manankarena indrindra sy ny tsy manana indrindra.”
● “Tsy maintsy ho kely kokoa ny vola miditra hivelomana.”
● “Ho namoy foto-javatra ilaina eo amin’ny fiainana ny toerana manodidina.”
● “Hisondrotra ny vidin-javatra.”
● “Ho mora voa kokoa izao tontolo izao eo anoloan’ny loza aman’antambo araka ny natiora sy eo anoloan’ny fikorontanana avy amin’ny olombelona.”
● “Farany, tsy maintsy soritana fa amin’ny ambangovangony tsy miova ny politika amin’ny ankapobeny, dia ho hafa izao tontolo izao satria tsy ho nahay nanararaotra ny fotoana mety.”
Tsy isalasalana fa hiaiky ianao hoe tsy misy manintona mihitsy amin’izany fahatsinjovan-javatra izany. Azo antoka fa tsy antony mahatonga fifaliana izany.
Manasa antsika hifaly anefa ny Soratra Masina amin’izao teny izao: “Miravoravoa, ry jentilisa, mbamin’ny olony”. (Romana 15:10; jereo Deoteronomia 32:43). Ireo olona mahaforona ny vahoaka resahina ao amin’io andinin-teny io dia manolotra ho an’Andriamanitra ny fanompoam-pivavahana ankasitrahany. Manompo azy amin’ny “fanahy sy ny fahamarinana” izy ireo. (Jaona 4:23, 24.) Koa satria isika rehetra tsy maintsy misetra zava-manahirana be dia be amin’izao andro izao, moa ve isika tena manana antony hiheverana fa ho afaka hiaina eo amin’izao tontolo izao sabatra isika indray andro any?