Indray mitopy maso amin’ny vaovao
Ho azo atao ve ny hanome sakafo ny olona rehetra?
Moa ve ny tany afaka mamokatra sakafo ampy mba hanomezana fahafahampo amin’izay ilain’ny mponiny ankehitriny? Eny, ary ho afaka hamelona olona hafa an-tapitrisany maro koa izy raha inoana ny lahatsoratr’i Jack Cahill natonta tao amin’ny Toronto Star. Izao no nosoratany: Araka ny voalazan’ny Fandaminana momba ny hanina sy ny fambolena (O.A.A.), fiasana mifamatotra amin’ny Firenena mikambana, dia misy voan-javatra ampy volena eran’izao tontolo izao mba hanome ho an’ny mponina amin’ny planeta rehetra otrikaina 3 000 isan’andro, fatra izay mihoatra ny lany amin’ny ara-keviny any Amerika Avaratra ary mihoatra 50 isan-jato eo ho eo ny farany kely indrindra mahavelona.” Raha ny momba ny ho avy dia manazava i Cahill fa azo atao ny mamokatra sakafo ampy mba hamenoana ireo izay ilain’ny avy roa heny amin’ny mponina maneran-tany ankehitriny.
Izany dia mety ho hafahafa amin’ireo izay mahafantatra fa olona an-tapitrisany maro no mijaly noho ny hanoanana. Kanefa ilay lahatsoratra dia manipika fa “zava-manahirana momba ny hanoanana izany fa tsy an’ny tsy fisiana, ary ireo antony azo ampangaina dia ny fahantrana, ny politika, ny toe-karena sy ny fitsinjarana vilana”. Ireo fikambanana manam-pahaizana manokana dia mahatsapa fa tsy amin’ny fizarana sakafo no hahafahana mitondra fanafody maharitra amin’ilay zava-manahirana. Tokony “hampianarina kosa aza ny olona hamelon-tena irery”.
Nefa inona àry no fikambanana izay afaka misolo ny politika mba handaminana ny fitsinjarana ny sakafo sy ny fampianarana ny ankapoben’olona? Ny Fanjakan’Andriamanitra irery ihany no afaka hahavita izany. Marina tokoa fa amin’ireo soa hoentin’ny fanapahan’Andriamanitra ho an’ny tany dia misy ireo izay voalaza ao amin’ny Salamo 146:7, izay ilazalazana ilay Mpamorona ny olombelona amin’ireto teny ireto: “Izay manome rariny ho an’ny ampahorina, Izay manome hanina ho an’ny noana.”
Ny hasarobidin’ny lalàm-pifehezana
Ny sasany dia mihevitra ny fandroahana na fanonganana ireo mpanota, araka izay ataon’ny Vavolombelon’i Jehovah, ho toy ny fepetra feno halozana. Rehefa avy nanonta lahatsoratra momba io foto-kevitra io ny Times any Saint-Petersburg, any Etazonia, dia nampiseho valinteny nataon’ny mpamaky iray ho an’ireo izay “nahita ireo fepetra raisin’ny Vavolombelon’i Jehovah ho toa somary henjana loatra.” Niaiky izy hoe: “Voaroaka mihitsy ny tenako tamin’ity taona ity [tamin’ny aprily 1981] [...]. Nanao zavatra an-tsitrapo izay melohin’ny Baiboly aho. Ankoatr’izany dia nandainga aho momba ny ratsy natao sasantsasany ary tsy naneho fibebahana mihitsy.”
Nanao izao fanamarihana manaraka izao io mpamaky io momba ireo Vavolombelon’i Jehovah: “Voaroaka ny olona raha tsy manaraka ireo fotopoto-pitsipik’Andriamanitra ambony, araka izay anehoana izany mazava tsara ao amin’ny ‘Teniny’. Fahadisoan’izy ireo izany.” Teo dia nanaiky fa voamarina izany raha ny aminy. “Raha sarotiny” toy izany ireo fandaminana hafa, hoy ny nanampiny, dia ho kely kokoa ny tia tena mirona ho amin’ny fandikana lalàna, ary, ho vokatr’izany, dia ho kely kokoa ny fahoriana sy zava-manahirana eo amin’izao tontolo izao ankehitriny.”
Kanefa vitsy ireo fandaminana ara-pivavahana manana herim-po handray ity fepetra andidian’ny Soratra Masina ity momba ireo mpanota tsy mibebaka: “Esory aminareo ilay mpanao ratsy.” (I Korintiana 5:13). Io fandroahana io dia manana tombony amin’ny fanadiovana ny anaran’Andriamanitra amin’izay rehetra mety ho fitenenan-dratsy, amin’ny fiarovana ireo mpikambana hafa ao amin’ny kongregasiona amin’ny fiantohana fifaneraserana tsara ho azy ireo ary, araka izay azo atao dia hitarika ilay mpandika lalàna hanova ny fitondrantenany. Raha misy sasantsasany manohana fa noho “ny fitiavana an’i Kristy”, dia tokony holeferina amim-pihetseham-po ny maha-eo ny olona toy izany, ny tenan’i Jesosy kosa dia tsy hoe tsy nandidy ny ‘handroahana’ ireo mpanota tsy mety mibebaka. — Matio 18:15-17, Le livre, fanontana Farel.
Ambonin’izany, ireo soa raisina avy amin’io fepetra henjana io dia naseho tsara tamin’izay nitranga voalaza tetsy ambony. Marina tokoa fa io olona io dia nibebaka ary noraisina indray tao amin’ny kongregasionan’ny Vavolombelon’i Jehovah.