Aoka isika hampiasa amin’ny fomba tsara ny fahafahana kristiana
“NANTSOINA” ho amin’ny fahafahana ny kristiana, kanefa mahazo izao fampitandremana manaraka izao izy ireny: “Aza mitondra ny fahafahanareo ho fanaronana ny ratsy.” (Galatiana 5:13; I Petera 2:16). Tena hampalahelo tokoa raha toa ny kristiana iray ka mampiasa amin’ny fomba ratsy ny fahafahana kristiana ary miverina amin’ny fanandevozana. Aoka haka ohatra iray isika.
Ao amin’ny fivavahana maro, dia nampianarina fa fahotana ny fisotroana zavatra misy alikaola. Ny fahalalana marina ny Baiboly dia manafaka an’ilay olona amin’io hevi-diso io; ny fimamoana tokoa fa tsy ny fandraisana alikaola no melohin’ny Baiboly (ampitahao amin’ny Salamo 104:14, 15 ny I Korintiana 6:10 sy I Petera 4:3). Mety ho azon’izany kristiana afaka izany atao àry izao indraindray ny misotro zavatra misy alikaola. Kanefa raha manomboka ‘mitondra ny fahafahany ho fanaronana ny ratsy’ izy, dia mety hihoatra ny fatra, ho tonga eo amin’ny somary filana alikaola foana, ary hanjary ho andevony aza.
Araka izany, rehefa avy nafahana tamin’ny fiheveran-diso momba ny fialam-boly, ny fomba fitafy, ny fifampitondrana amin’ny hafa ny kristiana dia tsy hisetra fahalatsahana ao amin’ny faran’izay mifanohitra indrindra amin’izany, dia ny fanokanana fotoana na vola ho amin’ny zavatra nandrarana taloha ary anomezan-dalana izao. Izany dia ho fanararaotana loatra ny fahafahana kristiana sy fisetrana vokany ratsy.
Aoka isika hitory fanantenana fanafahana
Hatramin’ny nanorenana ny Fanjakana mesianikan’Andriamanitra tamin’ny 1914 indrindra no nanatona ny fahatanterahany ny fampanantenan’Andriamanitra fa “izao zavatra ary rehetra izao aza dia hovotsorana amin’ny fahandevozana, dia ny fahalòvana, ho amin’ny fahafahana izay momba ny voninahitr’ireo zanak’Andriamanitra”. (Romana 8:21.) Efa nafahan’i Kristy tamin’ny fanapahan’i Satana ny lanitra (Apokalypsy 12:7-12). Tsy ho ela izy dia hanafoana an’i Babylona Lehibe izay nanandevo ny olombelona tamin’ny alalan’ireo fampianarana ara-pivavahan-diso. Avy eo, amin’ny Hara-Magedona, adin’Andriamanitra, no hanafahany ny olona amin’ireo fitondram-panjakan’olombelona tsy tanteraka izay hotorotoroiny (Daniela 2:44; Apokalypsy 18:21; 19:11-21). Hanafaka ny olombelona mihitsy aza izy amin’ilay fototry ny fanandevozana azy ireo lehibe indrindra, dia Satana, rehefa hanao izay tsy hahafahany hiasa intsony mba “tsy hamitahany ny firenena maro intsony mandra-pahatapitry ny arivo taona”. — Apokalypsy 20:2, 3.
Amin’ny faran’ny Fanjakana arivo taona, Kristy dia ho nanafaka tanteraka ny olombelona tamin’ny vokatra manimban’ny fihetsiketsehana ho fanafahana nandramana natao tamin’ny voalohany tany Edena. Ireo antokom-pirazanana natao ratsy fitondra taloha dia tsy hijaly intsony noho ny tsy rariny sy ny fanavakavahana. Ny vehivavy dia ho nohamaivanina tamin’ny fanamparam-panapahan’ny lehilahy sasany, ny marary amin’ny aretiny, ny olona be taona amin’ny vokatra mahosan’ny fahanterana ary, ny kanto indrindra, ny olona misaona amin’ny fahoriany rehefa ho nafahana avy ao am-pasana ireo olon-tsy foiny efa maty. — Apokalypsy 20:13 ka hatramin’ny 21:5; jereo koa Salamo 146:5-10.
Amin’ny fitoriana izany hafatr’Andriamanitra momba ny fanafahana izany amin’izao androntsika izao, ny Vavolombelon’i Jehovah dia mampiasa amin’ny fomba mahasoa ny fanafahana kristiana nampiharina taminy. Tsy haneho fahiratan-tsaina firy izy raha manohana fihetsiketsehana ho fanafahana araka ny olombelona izay tsy afaka mitondra, raha tsara indrindra, afa-tsy fanafodiny tapany ary raha ny marina, dia mampiala ny saina amin’ny tena fanantenana fanafahana.
Eritrereto kely! Ho azonao atao ny hahita fanafahana izay hitondra ho anao fitahiana tsy azo ampitahaina amin’ny fahafahana noresahin’i Patrick Henry. Ary ambonin’izany, aorian’ny Hara-Magedona dia ho afaka handray soa mandrakizay avy amin’izany ianao!