Fanontanian’ny mpamaky
◼ Azo atao ve ny manafoana Fanambaram-pahatokiana iray?
Mahakasika fandaharana vonjimaika tsy azo ampiharina any amin’ny tany maro be io fanontaniana io. Noho izany, aoka hojerentsika aloha hoe ahoana ny amin’io fanekena ampahibemaso io.
Ny Tilikambo Fiambenana tamin’ny 15 oktobra 1977 dia niresaka fahasahiranana iray hita any amin’ny tany sasany tsy anekena ho ara-dalàna ny fisaraham-panambadiana, na dia avelan’Andriamanitra atao aza amin’ny toe-javatra hentitra ambaran’ny Soratra masina (Matio 19:9). Any amin’ny tany hafa indray, dia hasarotin’ny lalàna aoka izany ny fisaraham-panambadiana ka mila miandry taona maro indraindray alohan’ny hahazoana rariny. Nanazava àry io gazety io fa, any amin’ny tany sasany ihany, ny Vavolombelon’i Jehovah no afaka mameno Fanambaram-pahatokiana. Handeha hojerentsika, amin’ny ohatra iray, ny fisian’izany fandaharana izany:
Vao nanomboka nahafantatra ny fahamarinana momba an’i Kristy ny vehivavy iray. Kanefa niara-niaina tamin’ny lehilahy iray izy, angamba mety ho efa niterahany, ary efa ela nisarahan-toerana tamin’ny vadiny ara-dalàna io. Ity ramatoa vao liana ny Baiboly ity dia mahatoky amin’ilay sakaizany, izay maha-vonona azy hovadina; nefa tsy azo atao izany, satria ny lalàna tsy mamela azy io hisaram-panambadiana. Noho izany, raha toa mampiaiky ireo loholon’ny kongregasiona fa ny firaisany amin’io lehilahy io, raha tsy nisy izany fitrangan-javatra izany, dia hankasitrahan’Andriamanitra, dia havelany hanao sonia Fanambaram-pahatokiana iray izy. Amin’izany fanekena izany izay hekeny eo anatrehan’Andriamanitra ho tsy azo ravana, no hanambarany ho efa nanao izay rehetra azony natao mba hanao izay haha-ara-dalàna ny fanambadiany, ary hanomezany toky ny hivady raha vao hanana fahafahana hanao izany, izay hanafoana amin’izay ny Fanambarana ho nanome azy fahafahana ho mpikambana iray ao amin’ny kongregasiona kristiana.
Kanefa, misy fanontaniana iray mipetraka: Rehefa nekena izy — na olona hafa na iza na iza mitovy toerana aminy — ho ao anatin’ny kongregasiona noho io fandaharana io, moa ve misy fomba hafa ankoatra ny fanambadiana, mahafoana ny Fanambaram-pahatokiana?
Ao anatin’io, ilay mpanao sonia dia ‘manaiky fa mamatotra azy eo anatrehan’Andriamanitra sy ny olona ny firaisany, fa tokony hohazoniny sy hohajainy mifanaraka tanteraka amin’ny fotopoto-pitsipiky ny Tenin’Andriamanitra izany’. Araka izany, ao amin’ny toe-tsain’ny kongregasiona, izany firaisana izany dia mamatotra ilay olona mitovy amin’ny fanambadiana ara-dalàna. Kanefa, ny fahafatesan’ny vady dia manapaka ny fanambadiana, ary koa ny firaisana natao manan-kery noho ny Fanambarana karazan’izany (Romana 7:2). Ambaran’ny Baiboly koa fa raha meloka ho nanao fijangajangana (pornéia) — fahalotoam-pitondrantena momba ny lahy sy ny vavy ivelan’ny fanambadiana — ny olona manambady iray, dia afaka mangataka fisarahana ilay vadiny (Matio 5:32; 19:9). Torak’izany koa, fa mety hanafoana ny firaisana natao manan-kery noho ny Fanambaram-pahatokiana ny fahalotoam-pitondrantena momba ny lahy sy ny vavy, raha manapa-kevitra amin’izany ilay vady tsy diso. Ny kristiana ao anatin’ny toe-javatra toy izany dia tokony hitondra ny porofon’ny tsy fahatokian’ilay vady any amin’ny loholona. Hanafoana ny Fanambarana izany; ary, mifanaraka amin’ny Soratra masina no hahafahan’ilay vady tsy diso amin’ny fatorana rehetra.
Koa satria hitan’ny kongregasiona fa ny Fanambaram-pahatokiana dia fanekena ara-tsaina mahery toy ny fanambadiana, inona no mitranga raha miova ny fepetra nanakana ny fanambadiana? Raha amin’ilay ohatra narosontsika teo, ka eken’ny fitondram-panjakana ny fisaraham-panambadiana, na maty ilay vady ara-dalàn’ilay lehilahy noresahina, ka ekeny ny hanambady ilay vehivavy kristiana? Amin’izany toe-javatra izany, dia tsy ho azon’ilay anabavy atao intsony ny hiantehitra amin’ny Fanambaram-pahatokiana amin’ny fanambarana fa manelingelina azy ny hanambady taorian’ny taona maro toy izany, na koa hoe tsy iriny ny hamoy tombontsoa ara-nofo sasany. Mifanaraka amin’ny Fanambarany, dia tokony handray ny fepetra ilaina izy haha-ara-dalàna ny firaisany. Raha tsy izany, dia hanafoana ny fanambarana ny kongregasiona; tokony hisaraka amin’ilay sakaizany ilay anabavy, na ho voaroaka.
Inona indray no mitranga, anefa, raha tsy mety mivady ilay sakaiza tsy mpino? Azo ambara fa, rehefa nosoniavina ny Fanambarana, ny firaisana dia heverin’ny kongregasiona ho fanekena manome antoka tanteraka amin’ny fitondrantena. Tsy ho lasa faharatsiam-pitondrantena akory izany noho ny tsy fetezan’ny iray amin’ny mpivady hanaiky ny maha-ara-dalàna azy fotsiny. Tsy voatery hisaraka amin’ny vadiny àry ilay anabavy; hanohy hitoetra ho mahatoky aminy izy, sady haharitra amin’ny fiezahany handamina ny toerany. Manitsy izay voambara tao amin’ny “Fanontanian’ny mpamaky” tamin’ny 1 febroary 1986 izany. Jereo Mpitsara 11:35; Lioka 18:1-5.
Mazava loatra, fa samy hafa ny toe-javatra raha toa izy roa mpivady ka nanao sonia fanambarana ary tonga kristiana. Amin’izay, izy dia samy nanaiky ampahibemaso hivady raha miova ny lalàna; hofoanan’ny fanambadiany ny Fanambarana. Tokony halaminy ao anatin’ny fe-potoana ara-drariny ny toerany; na koa hisaraka izy, raha te-hitoetra eo anivon’ny kongregasiona (jereo “Fanontanian’ny mpamaky” tao amin’ny Tilikambo Fiambenana 1 martsa 1983). Raha tonga amin’ny fisarahana izy, dia mbola hakamban’ny Fanambaram-pahatokiana araka ny lalàm-pitondrantena foana, ka tsy afaka hanana firaisana amin’olon-kafa noho izany. — Jereo I Korintiana 7:10, 11.
Na dia tsy azo ampiharina amin’ny tany maro aza izany fandaharana izany, ny fotopoto-pitsipika navoakantsika tamin’ity fandinidinihana mifandray amin’ity Fanambaram-pahatokiana ity, dia manan-kery amin’ny toerana rehetra: “Aoka hanan-kaja amin’ny olona rehetra ny fanambadiana, ary aoka tsy ho voaloto ny fandriana, fa ny mpijangajanga sy ny mpaka vadin’olona dia hohelohin’Andriamanitra.” — Hebreo 13:4.