Mitantara ireo mpitory ilay Fanjakana
Nisy tanora italiana namorona fahafahana hanao fanambarana
IREO izay mankamamy ny fikasana mahatalanjon’Andriamanitra dia mahita fahafinaretana amin’ny fampahafantarana ny namany ny fanantenana kanto ny amin’ilay Fanjakana. Mba hahatongavana amin’izany, dia matetika no ilain’izy ireny ny manararaotra ny fahafahana rehetra atolotra azy; izany no asehon’ity fitantarana avy any Sardaigne ity:
◻ “Niverina avy any amin’ny fitoriana tamin’ny aotobisy ny mpitory iray 12 taona. Tamin’ireo mpandeha dia nisy zatovo roa sy zazavavy iray, samy 18 taona teo ho eo. Rehefa nipetraka teo akaikin’ilay zazavavy ilay zazalahy, dia nanomboka namaky ny Réveillez-vous! noho ny fanantenana ny hanaitra ny fahalianany. Izany no nitranga: nanontaniany azy izay novakiny. Rehefa avy nanazava taminy izy fa izany dia lahatsoratra nivaofy ny amin’ny fanafodin’ireo fahasahiranana hitan’ny tanora, dia nanampy teny izy fa nitondra zavatra be dia be ho azy ny vakiteniny ary mety ho toy izany koa ny aminy. Nanaiky an-tsitrapo ireo gazety ilay zazavavy.
“Tamin’izay ireo tanora roa hafa izay nihaino ny resaka dia nangataka gazety. Raha mbola nanome ny fandraisana anjara an-tsitrapo an’ilay zazalahy izy, dia nanelanelana ilay mpamily fiarakodia ka nilaza tamin’izy ireo mba tsy handanilany foana ny volany amin’ny zavatra tsinontsinona toy izany. Namaly azy ireo tanora fa fantatr’izy ireo izay nataony, ary nahaliana ireo gazety ireo. Tamin’izay dia nampijanona ny aotobisiny teo amoron-dalana ilay mpamily ary namono ny maotera, mba hahitana hoe inona izany zavatra nahaliana izany. Mba nangataka vitsivitsy tamin’izany koa izy.
“Nilaza toy izao ilay Vavolombelona tanora izay nitantara izany zava-nitranga izany: ‘Faly tokoa aho nanomboka nitory tao amin’ny “bus”.’ ”
◻ Ny Vavolombelona tanora hafa iray dia nanararaotra ny tarehin-javatra nitranga tao anatin’ny faritry ny sekoly. Mitantara toy izao izy: “Nampianatra anay fomba fianarana hafa tanteraka noho ny fomba mahazatra ny mpampianatra anay. Rehefa avy nandinika ireo hevitra fantatra izahay, dia tokony hamorona drafitra mampiseho ireo hevi-dehibe sy ireo hevitra tsy dia lehibe loatra, avy eo dia nanao famelabelarana tsy voasoratra mialoha momba ilay foto-kevitra.
“Nahazatra ahy tokoa io fomba io, hoy ny fanantitranteran’ilay mpianatra. Manoro hevitra ny amin’izany ny Manuel pour l’Ecole du ministère théocratique.’ Tsy ela dia voamarik’ilay mpampianatra fa izaho irery no nampihatra io fomba io tamim-pahombiazana, ary nanontaniany ahy ny hoe nahoana ny asako no tsy nitovy tamin’ny an’ny hafa. Nohazavaiko taminy fa nianatra an’io fanao io aho tao amin’ny Sekolin’ny fanompoana teokratika. Faly izy ka nanasa ahy hanao fampisehoana ho an’ny iray kilasy, tamin’ny alalan’ny Manuel pour l’Ecole du ministère théocratique, ary dia nataoko izany.
“Rehefa nody tany an-trano aho, dia nitantara izany tamin’ny fianakaviako. Ny raiko, izay tsy Vavolombelona, dia nilaza foana fa manakantsakana ny fianarana ny maha-Vavolombelon’i Jehovah; nanery azy hiova hevitra ny fitantarako.”
Tombotsoa lehibe toy inona moa ny anareo, ry tanora, ary ianareo izay efa be taona kokoa, manohana sy mampahafantatra ny anaran’i Jehovah! — Salamo 148:12, 13.