Mitantara ireo mpitory ilay Fanjakana
◻ NY “fanenjehana mafy” ny kongregasiona kristiana voalohany dia natao hampielezana mpianatr’i Kristy maro. (Asa. 8:1) Tsy nahomby anefa izany fanenjehana izany satria ireo izay niely dia “nandeha nitory teny tontolo eny.” (Asa. 8:4) Nanohy nitory i Filipo, ary “ny vahoaka betsaka dia niray hevitra nihaino izay nolazain’i Filipo.” (Asa. 8:6) Toy ny tsy nahombiazan’ny fanenjehana natao tamin’ny taonjato voalohany no tsy nahombiazany koa tany amin’ny tanàna kely iray any amin’ny faritra avaratr’i Thailand.
Nanomboka nitory tao amin’io tanàna kely io ny mpitory maharitra manokan’ny Vavolombelon’i Jehovah iray, nefa tsy nihaino mihitsy ny mponina tao tamin’ny voalohany. Rehefa niresaka tamin’ilay mpitory teny teo an-toerana anefa izy dia nitangorona nanodidina azy ny olona mba hihaino. Nisy olona vitsivitsy nanjary nahatsapa fa nahalala tsara kokoa ny Baiboly noho ny mpitondra fivavahany ilay Vavolombelona, hany ka nanomboka nianatra ny Baiboly niaraka tamin’ilay mpitory maharitra izy ireo na dia tsy nitsahatra nanenjika aza ny sasany. Novonoina ny ganaganany sasany, notandindomin-doza ny fiainan’ilay mpitory maharitra, ary nisy nandoro ny tranon’ny olona liana iray. Nilaza toy izao io lehilahy io: “Afaka mandoro ny tranoko izy ireo, saingy tsy afaka mandoro ny foko.” Nandeha lalana lavitra tamin’ny bisikileta ireo izay niara-nianatra tamin’ilay Vavolombelona mba hanatrehana ireo fivoriana any amin’ny Efitrano Fanjakana. Vita batisa ny efatra tamin’izy ireo, ary mbola manatrika fivoriana miaraka aminy ny enina hafa.
Valisoa noho ny Fanaovana ny marina
◻ Nanjary fantatra fa olona manao ny marina ireo rahalahy any Zambia, ary nandray fitahiana izy ireo noho izany, sady nanampy ny hafa hahafantatra ny fahamarinana. Ny loholona iray, izay mpitory maharitra mandavantaona, dia nandeha fiara fitateram-bahoaka, ary nandre Vavolombelona iray niresaka ny amin’ny fitsanganana amin’ny maty tamin’ny olona sasany tao anaty fiara. Nanontany azy io toy izao ny mpandeha iray: “Nahoana ianareo Vavolombelona no manizingizina fa ny fivavahanareo ihany no marina?” Noraisin’ilay rahalahy ny fitenenana ary nilaza tamin’ilay mpandeha izy fa hamaly soa ireo Vavolombelony i Jehovah noho izy ireo mampianatra ny fahamarinana avy ao amin’ny Baiboly.
Taorian’ny misasakalina tamin’iny dia lava iny, dia tonga teo amin’ny fanakanan-dalana iray ilay fitateram-bahoaka. Avy be ny orana tamin’izay. Niditra ny fiara ny miaramila iray ary nanontany raha nisy Vavolombelon’i Jehovah tao. Nisy telo tao. Avy eo dia niteny izy hoe: “Eny àry, mijanòna amin’ny toerany ny Vavolombelona, fa ny sisa mivoaha miaraka amin’ny entanareo.” Nivoaka tany amin’ny orana avokoa ny hafa rehetra, ary taorian’ny fisavana dia niverina niaraka tamin’ny entany sy ny fitafiany kotsa.
Nilaza toy izao ilay miaramila nony tafaverina tao anaty fiara: “Ny antony namelako ny Vavolombelona hijanona dia noho izy ireo olona manao ny marina. Nahita fanandraman-javatra betsaka izahay ary nahatsapa fa izy ireo no hany olona manao ny marina; rehefa manontany azy ny amin’izay ao anaty entany izahay dia ny marina no lazainy anay.” Rehefa nanohy ny diany ilay fiara dia nanontany ilay rahalahy hoe: “Fivavahana inona no marina?” Nisy olona anankiray namaly hoe: “Ilay tsy lenan’ny orana.”
Eny, manampy hahafantatra ny fivavahana marina ny fanaovana ny marina, ary azo antoka fa mahazo ny valisoany izy io!