Mitantara ireo mpitory ilay Fanjakana
Novalian-tsoa ny fikarohana ny fahamarinana ao amin’ny Baiboly tany Isiraely
ANY ISIRAELY toy ny any an-toeran-kafa, dia olona mihamaro hatrany no mahatsapa ny maha-tsinontsinona ireo fiezahan’olombelona mikendry ny hanorina fiadanana maharitra sy hanome fanantenana ho an’ny hoavy. Ireo Vavolombelon’i Jehovah 370 ao amin’io tany kanto nanana fiainana tamin’ny lasa nisehoan-javatra be dia be io dia mampita fanantenana mamelombelona amin’ireo izay mitady an’Andriamanitra (Isaia 55:2, 3). Ny tatitra eto ambany avy any amin’ny sampan’ny Fikambanana Watch Tower any Tel-Aviv dia mampiseho fa mamaly soa ireo olona mikatsaka ny fahamarinana ao amin’ny Baiboly Andriamanitra.
“Tsy mitondra intsony fanorisorenana ho anay ireo mpivavaka mirehitra tsy amin’ny antony sy mahery setra, ary ny fiezahana nataony mba hanakorontanana ny fivorianay dia mitohy mifotitra amin’izy ireo. Vavolombelon’izany izay nitranga tamin’ity mpivady Rosiana be taona izay nifanerasera tamin’ny antoko advantista iray ity, nefa tsy afa-po tamin’izay nampianarina azy. Izy ireo dia tsy nahita toe-javatra na inona na inona mifanitsy amin’ny fanenjehana izay, araka ny faminaniana, dia tokony hampiavaka ny kristianisma marina. Indray andro izy ireo dia nahita gazety “roumain” tranainy izay niresaka ny amin’ny fanafihana mahery vaika nalefan’ny vahoaka tamin’ny 1985 hamelezana ny tranon’ny sampan’ny Fikambanana sy ny Efitrano Fanjakana any Tel-Aviv. Noho ny faniriany hahafantatra bebe kokoa ny amin’izany, dia nankany amin’io tanàna io izy ireo, ary nandritra ny adiny efatra, an-tongotra, dia nanao dingan-dava ny arabe mandra-pahitany ilay trano izay noresahina tao amin’ny lahatsoratr’ilay gazety. Faly izy ireo nahazo valiny tamin’ny sasany amin’ireo fanontaniana ary nijanona mba hanatrika ny fivoriana kristiana nalamina tamin’io takariva io. Nahita fahafinaretana rizareo nihaona tamina Vavolombelona miteny rosiana. Hatramin’izay dia mianatra tsy tapaka ny Baiboly izy. Arakaraka ny itomboan’ny fahalalan’izy ireo no iaikeny bebe kokoa fa nahita izay notadiaviny indrindra izy: ny fahamarinana!
“Inty misy toe-javatra hafa iray: ny Vavolombelona iray dia niresaka ny hafatry ny Fanjakana tamin’ny raim-pianakaviana tanora iray, nefa noho ity farany tsy niombon-kevitra tamin’ny fanazavana rehetra nomena azy, dia tsy nahaliana azy intsony ny hafatry ny Fanjakana. Taona vitsivitsy tatỳ aoriana, dia narary ny zanakavavin’io lehilahy io, ary nisy namana ninonino foana nilaza taminy fa ilay aretina dia nisy nifandraisana tamin’ny “mezouza” nipetraka teo amin’ny tataom-baravaran’ny tranony. Nanolotra hevitra azy izy ireo mba hitondra izany hodinihin’ny raby iray, ary nanapa-kevitra hanaraka io torohevitra io ralehilahy. Tetsy an-danin’izany, dia nivavaka tamim-pahatsorana tamin’Andriamanitra izy mba hanampy azy hahita ny fahamarinana.
“Teny an-dalana ho any amin’ilay raby dia nahazo hevitra tampoka ilay lehilahy mba handalo ao amin’ny trano famoaham-panafody haka fanafody iray nasain’ny dokotera nampiasaina. Iza moa no hitany tao? Tsy iza fa ilay Vavolombelona izay nitory taminy taona vitsivitsy lasa izay. Nilaza taminy ilay Vavolombelona fa tsy niomana ny ho tonga tao amin’ny toerana famoaham-panafody izy tamin’io takariva io, nefa nahatsiaro tampotampoka teo izy fa nila zavatra. Nipetraka izy roa lahy, niara-nidinika nandritra ny adiny roa teo ho eo, ary nanaiky hianatra ny Baiboly ilay raim-pianakaviana tanora. Nanomboka nanatrika ireo fivoriana izy, nandroso tamin’ny fomba tsy tapatapaka, ary nisoratra anarana tamin’ny sekolin’ny fanompoana teokratika. Tsy ela taorian’izay, dia nanomboka nandray anjara tamin’ny fitoriana izy, ary vita batisa izy amin’izao fotoana izao. Raha ny marina, dia tsy nankany amin’ilay raby mihitsy izy!”
Novalian-tsoa be dia be ireny olona nikatsaka ny fahamarinana ao amin’ny Baiboly ireny, satria nahita harena mbola sarobidy kokoa noho ny volamena tsara izy. — Ohabolana 3:13-18.