Mitantara ireo mpitory ilay Fanjakana

Manaiky ny vaovao tsara ireo any Belzika

“IZA akory no efa nandre zavatra toy izany?” hoy ny biraon’ny sampan’ny Vavolombelon’i Jehovah any Belzika. (Ampitahao amin’ny Isaia 66:8). Io tany tsara tarehy io dia nanao filazana fa nahatratra tampon’isan’ny mpitory 24 464 izy tamin’ny taom-piasana 1989. Nisy fitomboana 4 isan-jato koa teo amin’ny antsalan’ny isan’ireo nandray anjara tamin’ny asa fitoriana isam-bolana.

◻ Neken’ny pretra katolika iray ny vaovao tsara ambaran’ny Vavolombelon’i Jehovah, ka hoy izy tamin’ireo mpiangona tao aminy nandritra ny lamesa iray ny alahady: “Raha tonga mitsidika anareo ny Vavolombelon’i Jehovah, dia sokafy midanadana be ny varavaranareo. Manana ny fahamarinana izy ireo!” Izany indrindra no nataon’ny ramatoa iray. Rehefa tonga tao aminy ny Vavolombelon’i Jehovah, dia nosokafany nidanadana ny varavarany ary nandray ny boky hoe La vie — Comment est-elle apparue? Evolution ou Création? izy. Tatỳ aoriana izy dia nanontany ny amin’ilay boky Azonao atao ny hiaina mandrakizay ao amin’ny paradisa eto an-tany. Natomboka ny fianarana ny Baiboly niaraka taminy, kanefa tsy nandray anjara tamin’izany ny vadiny. Niantso azy an-telefaonina àry ny rahalahy iray ary nanontany azy raha tiany ny hiara-hiaina amin’ny vadiny ao amin’ny izao tontolo izao tsara kokoa iray? Ho vokatr’izany, dia nandray anjara tamin’ny fianarana izy. Nanao tokantranomaso izy roa ireo tamin’izay, nefa nataony izay haha-ara-dalàna ny fanambadiany ary tsy ela dia natao batisa izy ireo.

◻ Nanova ny fiainan’ny tovovavy iray ny fahamarinana. Mbola tsy feno 14 taona akory izy dia nilaozan’ny rehetra. Nifankahita tamin’ankizilahy iray izy ary niara-nipetraka taminy, nanaraka fomba fiainana “punk”, tamin’ny fampiasana zavatra mahadomelina sy ny fampisehoana toe-tsaina tia herisetra. Avy eo dia namoy ny ainy tamin’ny lozam-pifamoivoizana ilay tovolahy. Izany dia nitarika ilay ankizivavy ho ao amin’ny fahaketrahana ara-tsaina mafy, hany ka nihevitra ny hamono tena izy. ‘Aiza re no hahitako fanafodin’ny zava-manahirana ahy e?” hoy izy nanontany tena. Nifankahita tamin’ny olona mpanao spiritisma iray izy ka nampino azy io fa azony natao ny nifandray tamin’ilay namany nody mandry. Niara-nanandrana ny “hypnose” (fampatoriana ataon’olona) sy ny “perception extrasensorielle” izy ireo. Tsy nahita tamin’izany ny fampiononana nantenainy izy ka latsaka tao anatin’ny fahaketrahana lalina indray. Nandritra ny volana maromaro izy dia nitokana tanteraka. Tamin’izay izy no nifankahita tamin’ny Vavolombelon’i Jehovah iray izay niezaka mafy mba hanampy azy teo amin’ny ara-panahy. Nandritra ny fotoana kelikely dia an-taratasy no nanaovana izany, ary tamin’ny farany, noho ny ezaka mafy sy herim-po lehibe avy aminy dia nihatsara ny zavatra. Ankehitriny izy dia afaka amin’ny herin’ireo demonia, ny fanandevozan’ny sigara ary ny fahatsiarovan-tena lalina ho meloka. Arakaraka ny fandehan’ny fotoana, ny fitomboan’ny fahalalany ny Baiboly ary ny fanahin’i Jehovah dia nanampy azy be dia be. Ireo fivoriana koa dia nampahery azy, satria nanomana izany tamim-pitandremana izy. Ankehitriny izy dia vita batisa ary manana ny toe-tsain’ny mpitory maharitra. Efa mitarika fampianarana ny Baiboly maromaro sahady izy, ka ny iray amin’ireo dia ataony amin-dreniny, izay manatrika fivoriana sasany ankehitriny. Marina tokoa fa nampian’i Jehovah izy!

◻ Ireo izay manararaotra ireo toe-javatra mitranga any an-tsekoly dia mahita fahombiazana tsara dia tsara eo amin’ny fanelezana ny vaovao tsara. Ny anabavy tanora iray tany Belzika dia voatendry tany am-pianarana mba hanao lahateny momba ny lohahevitra iray azony nofidina. Nanapa-kevitra ny hiresaka momba ny Vavolombelon’i Jehovah sy ireo zavatra inoany izy, ka naka ny fanazavana hita ao amin’ny bokikely hoe Ny vavolombelon’i Jehovah amin’ny taonjato faha-20 ho fototr’izay holazainy. Nanohina ny fon’ilay mpampianatra azy izany. Rehefa avy nanao ny lahateniny teo anatrehan’ny iray kilasy taminy izy, dia nomena lalana hanao fanontaniana ireo mpianatra. Maromaro tamin’izy ireo taorian’izay no nanontany azy ny amin’izay tokony hataony mba hiainana ao amin’ilay Paradisan’Andriamanitra noresahiny tao amin’ny lahateniny. Maro be, anisan’izany ilay mpampianatra azy, no nangataka ireo bokikely samihafa nananan’ilay anabavy. Ny mpianatra tany amin’ny kilasy hafa koa dia nangataka bokikely sy fanazavana fanampiny, ary ny mpampianatra fivavahana iray, rehefa avy nandinika ireo bokikely, dia nampirisika ny mpianany mba hamaky azy ireo.

Nahazo fitahiana ny herim-pon’io anabavintsika io. Bokikely 23 no voazara tamin’ny mpampianatra roa sy mpianatra maro be; ny iray tamin’ireo, izay nahare firesahana ny amin’ilay lahateny, dia nangataka ireo hevitra nampiasainy mba hanazavana ny asan’ny Vavolombelon’i Jehovah tamin’ny iray kilasy taminy.

Maro be no manaiky ny vaovao tsara any Belzika. Izy ireo dia mandray ny Tenin’Andriamanitra, ‘tsy ho tenin’olona, fa araka izay marina, dia ny tenin’Andriamanitra, izay miasa ao anatinareo izay mino koa.” — 1 Tesaloniana 2:13.