Mitantara Ireo Mpitory Ilay Fanjakana
Fanampiana ho An’ireo “Mangetaheta” any Rosia
“SAMBATRA ny noana sy mangetaheta ny fahamarinana; fa izy no hovokisana”, hoy i Jesosy. (Matio 5:6). Ireo fanandraman-javatra manaraka dia mampiseho mazava ny fomba itondran’ny Vavolombelon’i Jehovah fanampiana, mba hanalana hetaheta ara-panahy ny olona maro any Rosia, izay nameperana ny fahalalahana ara-pivavahana nandritra ny 70 taona mahery.
▪ Ny vehivavy iray atao hoe Valentina dia nanana fanontaniana ara-baiboly lehibe izay tsy voavaly nandritra ny taona maro. Ohatra, nanontany tena izy hoe: ‘Tamin’iza i Jesosy no nivavaka?’ Nanjohy hevitra izy fa tsy maintsy ho nivavaka tamin’ny olona iray ambony kokoa noho ny tenany i Jesosy, ary nanontany tena ny amin’ny anaran’Izy Io izy.
Nitsidika ny Eglizy Ortodoksa Rosiana izy. Kanefa, tsy nahita valiny tamin’ny fanontaniany izy tao amin’io fivavahana io. Tsy afa-po izy, dia nandeha tany amin’ny fiangonana protestanta nefa tsy nahita valiny mazava koa tany. Tsy nahafantatra toeran-kafa mba haleha i Valentina, ka nanomboka namaky ny Baiboly, ary niezaka hahazo valiny samirery — tsy nisy vokany. Nivavaka izy mba hahazo fanampiana.
Fotoana kelikely tatỳ aoriana, dia nandondòna tao am-baravarany ny Vavolombelon’i Jehovah. Nasehon’izy ireo taminy avy ao amin’ny Baiboly fa Jehovah no anaran’Andriamanitra. Ela ny ela ka fantany hoe tamin’iza i Jesosy no nivavaka! Nanomboka niara-nianatra ny Baiboly tsy tapaka tamin’ny Vavolombelona izy. Matetika izy no niari-tory nandritra ny alina manontolo namakiana zavatra vita an-tsoratra navoakan’ny Fikambanana Watch Tower sady nitady ireo andinin-teny tao amin’ny Baiboly. Tsy ela i Valentina dia tonga tamin’ny fanatsoahan-kevitra fa nahita ny fahamarinana ny tenany. Tao anatin’ny telo volana, dia nanomboka nandray anjara tamin’ny asa fitoriana izy, ary roa volana taorian’izany, dia natao batisa. Novalian-tsoa ny fikarohany tamim-pahatsorana ny fahamarinana.
▪ Nandeha aotobisy ny Vavolombelona iray mba hitory tany amin’ny faritra lavitra iray. Niresaka momba ireo fampanantenan’ny Baiboly tamin’ny tovovavy iray izy nandritra ny dia, nefa tsy liana ilay tovovavy. Roa volana tatỳ aoriana dia nanao dia fanindroany tany amin’io faritra io ihany ilay Vavolombelona mba hanao lahateny ampahibemaso. Taorian’ilay lahateny dia nanatona ny mpitsidika iray izy ka nanontany hoe: “Efa nisy niresaka taminao momba ny vaovao tsara avy ao amin’ny Baiboly ve? Namaly ilay lehilahy hoe: “Eny, ianao.” Nihevitra ilay Vavolombelona fa nivazivazy izy. Nanazava anefa ilay tovolahy fa roa volana izay, dia sendra nahare ny resaka nifanaovan’ilay Vavolombelona sy ilay tovovavy nandritra ny dia tamin’ny aotobisy izy. “Naniry hahafantatra bebe kokoa aho, nefa nidina tamin’ny aotobisy ianao, ary nihevitra aho fa tsy hahita Vavolombelon’i Jehovah intsony mihitsy. Avy eo, tany amin’ny toeram-piasako dia nihaona tamin’ny lehilahy iray izay niara-nianatra ny Baiboly tamin’ny Vavolombelona aho. Koa dia izao izaho eto izao!”
Nanomboka nianatra ny Baiboly ilay lehilahy sy ny vadiny. Taorian’ny fotoana tena fohy, dia afaka nahatakatra izy fa nifanohitra tamin’ireo fotopoto-pitsipiky ny Baiboly ny asany. Satria izy naniry hihazona feon’ny fieritreretana tsara teo anatrehan’Andriamanitra, dia niova asa izy. Ankehitriny izy dia miresaka amin’ny hafa momba ny Fanjakan’Andriamanitra amin’ny toe-javatra rehetra. Manao fandrosoana amin’ny fianarany ny Baiboly koa ny vadiny.
Ireo Vavolombelon’i Jehovah ao amin’io faritany midadasik’i Rosia io dia faly mandray anjara amin’ny filazana amin’ireo olona tso-po rehetra hoe: “Avia. Ary aoka ho avy izay mangetaheta; ary izay mety, aoka izy hisotro maimaimpoana amin’ny ranon’aina.” — Apokalypsy 22:17.