Mitantara Ireo Mpitory Ilay Fanjakana
‘Sambatra Izay Noana Ara-panahy’
HOY i Jesosy hoe: “Sambatra ireo izay mahatsapa fa mila zavatra ara-panahy.” (Matio 5:3, MN). Ny olona toy izany dia hikatsaka fanazavana mitondra fiainana avy ao amin’ny Tenin’Andriamanitra, ny Baiboly, ary hitondra azy ireo ho amin’ny fiainana mandrakizay ny fandraisana izany fahalalana izany. — Matio 4:4; Jaona 17:3.
◻ Nisy olona iray noana ara-panahy tany amin’ny tany afrikana iray, nandeha an-tongotra adiny efatra tao anatin’ny hatsiaka sy ny haizina mba hahazoana iray amin’ilay boky hoe Ny Bokiko misy fitantarana avy ao amin’ny Baiboly. Raha vao tonga tao amin’ilay vohitra nitorian’ny Vavolombelon’i Jehovah izy dia diso fanantenana aoka izany tamin’ny fahitana fa efa voapetraka ny boky farany. Nijanona tao amin’ilay tanàna nandritra ny telo andro izy mandra-pahazo fanampin’ireo boky, ary avy eo dia faly izy tamin’ny farany rehefa nahazo an’io fanazavana ara-panahy tsara dia tsara io.
Nandritra ny volana nitoeran’izy ireo tao amin’io faritra mitokana io, dia nahazara boky 55 sy bokikely 365 ary gazety 145 ireo Vavolombelona ary nahazo famandrihana 5 izy ireo. Tena tohina tokoa ny fon’izy ireo rehefa handeha satria samy niantsoantso avy taorian’izy ireo toy izao tamin’ny fiteny “kpelle” ny olon-dehibe mbamin’ny ankizy: “Homba anareo anie i Jehovah!” Misy fiezahana betsaka atao mba hanolokoloana ny fahalianana.
Nisy olona hafa iray tao amin’io tany io ihany noana ara-panahy koa. Mpitahiry volan’ny fiangonany izy sady mpiandraikitra ny fialam-boly ao amin’ny faritra misy azy. Rehefa nitsidika azy ny Vavolombelona, dia niaiky tamin-dranomaso izy fa tsy mahatratra ireo fepetra takin’ny Baiboly amin’ny kristianisma ny fiangonana. Nasehon’ireo Vavolombelona azy avy tao amin’ny Baiboliny ny fomba famantarana ny fivavahana marina. Avy eo izy dia nanatrika fivoriana roa tao amin’ny Efitrano Fanjakana ary taorian’izay dia nanontany hoe: “Izay hitako sy reko dia tena nampiaiky ahy fa ity no fahamarinana.” Nanohina azy ireo fivoriana sy ny fitondrantenan’ireo izay tonga tao. Hitany fa tsy zavatra noforonina akory izay nolazain’ireo Vavolombelona nitsidika azy fa tena zava-misy tokoa. Hatreo izy dia nanao dingana tamin’ny fanapahana ny fifandraisany tamin’ny fiangonana, ary niafara tamin’ny fanambarana tsara tao amin’ilay fitambaran’olona izany.
◻ Noana ara-panahy ny katekista tanora melaneziana iray any Nouvelle-Calédonie. Nahita iray tamin’ilay boky hoe Ny fahamarinana izay mitarika ho amin’ny fiainana mandrakizay teo ambony latabatra, tao an-tranon’ny reniny izy ary namaky ny toko faha-2 sy faha-3. Nanohina azy ny andinin-tenin’ny Baiboly ao amin’ny Eksodosy 20:4, 5 sy ny Jaona 4:23, 24 noresahina tao. Rehefa nandinika izay voalazan’ireo andinin-teny ireo izy dia nanontany ny pretrany ny amin’ny antony aneken’ny Eglizy katolika ny fampiasana sary eo amin’ny fanompoam-pivavahana. Nialan’ilay pretra ilay fanontaniana. Nandeha tany amina fivavahana “kristiana” maromaro hafa ilay lehilahy, nefa tsy nisy nanome valiny nahafapo ny fanontaniany izy ireny. Farany, dia nanapa-kevitra izy ny hanatrika fivoriana iray an’ny Vavolombelon’i Jehovah niaraka tamin’ny reniny, izay efa naneho fahalianana ny fahamarinana. Tena nanohina azy fatratra ny fitiavana hitany teo anivon’ireo Vavolombelona sy ny fampianaran’izy ireo miorina amin’ny Baiboly.
Na dia lavitra be aza ny nisy azy, dia nisakana izay fiara nandalo foana izy handehanana any amin’ireo fivoriana, niandany haingana tamin’ny fahamarinana, ary vita batisa. Mpikarakara momba ny asa izy izao. Tonga Vavolombelon’i Jehovah koa ny reniny sy ny roa amin’ireo anabaviny ara-nofo. Nitory tamin’ny foko nisy azy ilay tovolahy ary nanomboka fampianarana Baiboly maro be. Izao dia maromaro amin’izy ireo no manatrika ny fivoriana ao amin’izany faritra izany. Izany rehetra izany no nitranga, dia noho ny nanamarihan’ny tovolahy iray boky iray manazava ny Baiboly teo ambony latabatra, sy ny nianarany izany ary ny ninoany sy nampiharany izay nianarany.
Manana fandaharan-pisakafoana ara-panahy lehibe atao i Jehovah amin’izao andro izao, ary olona sesehena no mandray soa avy amin’izany. Nilaza izany ara-paminaniana tamin’ny fomba nety i Isaia rehefa niteny hoe: “Indro, ny mpanompoko hihinana, fa hianareo [mpikambana ao amin’ny fivavahan-diso] kosa ho mosarena.” (Isaia 65:13). Sambatra isika raha mandray soa avy amin’ny fandaharana nataon’i Jehovah mba hanomezana fahafahampo ny hanoanantsika ara-panahy.