Fanontanian’ny Mpamaky
Koa satria olona tena nisy ilay mpisorona fahiny nantsoina hoe Melkizedeka, nahoana ny Baiboly no milaza fa “tsy manana tantaram-pirazanana” izy?
Io filazana io dia ao amin’ny Hebreo 7:3. Mariho ilay andinin-teny ao anatin’ireo teny manodidina azy:
“Fa io Melkizedeka io, izay mpanjakan’i Salema sy mpisoron’Andriamanitra Avo Indrindra, ilay nitsena an’i Abrahama, rehefa niverina avy nandresy ny mpanjaka maro izy ka nitso-drano azy, sady nomen’i Abrahama ny ampahafolon’ny zavatra rehetra aza (voalohany, raha adika ny anarany, dia Mpanjakan’ny fahamarinana, dia vao Mpanjakan’i Salema koa, izany hoe: Mpanjakan’ny fiadanana; tsy manan-dray, tsy manan-dreny, tsy manana tantaram-pirazanana, tsy manana voalohan’andro na faran’ny fiainana, fa natao tahaka ny Zanak’Andriamanitra), — izy dia mitoetra ho mpisorona [tsy manam-piafarana, NW ].” — Hebreo 7:1-3.
Araka ny voalaza eo, dia olona tena nisy i Melkizedeka, tena nisy sahala amin’i Abrahama izay nanana fifandraisana nivantana taminy. (Genesisy 14:17-20; Hebreo 7:4-10). Koa satria izany no izy, dia tsy maintsy nanana ray aman-dreny izy, ray iray sy reny iray, ary nety ho nanana taranaka i Melkizedeka. Noho izany, tamin’ny naha-olombelona azy, dia nanana tantaram-pirazanana, na tetirazan’ny fianakaviana izy. Nanam-piafarana koa ny fiainany ara-nofo. Tamin’ny fotoana iray dia maty i Melkizedeka, mifanaraka amin’ny filazan’ny apostoly Paoly ao amin’ny Romana 5:12, 14. Koa satria anefa tsy fantatsika hoe oviana i Melkizedeka no maty, ka noho izany dia nitsahatra tsy nanompo tamin’ny naha-mpisorona, dia nanompo tsy nisy farany fantatra izy tamin’izany lafiny izany.
Ao amin’ny Hebreo i Paoly dia nanome fanazavana ny amin’i Melkizedeka rehefa niresaka ny amin’ny anjara asan’i Jesosy Kristy tamin’ny naha-Mpisoronabe ambony azy. Rehefa nanondro an’i Melkizedeka ho tandindona, na modely iray nampiseho an’i Jesosy tamin’io anjara fisoronana io i Paoly, dia nilaza hoe: “Jesosy (...) [dia] tonga Mpisoronabe ‘mandrakizay araka ny fanaon’i Melkizedeka’ ”. (Hebreo 6:20). Amin’ny heviny ahoana?
Tsy maintsy nahatakatra i Paoly fa ny fitantaran’ny Baiboly dia tsy manome tsipiriany mikasika ny tetirazan’ny fianakavian’i Melkizedeka — ireo razambeny na izay nety ho taranany. Tsy ao anatin’ireo fitantarana ao amin’ny Baiboly fotsiny izany filazana izany. Raha raisina avy amin’izay fantatr’i Paoly na izay fantatsika àry, dia azo lazaina amin’ny fomba mety hoe i Melkizedeka dia “tsy manana tantaram-pirazanana” (Fandikan-teny Malagasy 1992; Kat.), “tsy manana tetiarana” (W. J. Conybeare), na “tsy manana tetirazan’ny fianakaviana”. — J. B. Phillips.
Tamin’ny fomba ahoana i Jesosy no toy izany? Ekena aloha fa fantatsika hoe i Jehovah Andriamanitra no Rain’i Jesosy ary i Maria avy tamin’ny fokon’i Joda no reniny olombelona. Na dia izany aza, dia nisy fitoviana teo amin’i Melkizedeka sy i Jesosy. Ahoana izany? I Jesosy dia tsy teraka tao amin’ny fokon’i Levy, dia ilay fokon’ny mpisorona teo amin’ny firenen’Isiraely. Tsia, tsy tonga mpisorona avy tamin’ny alalana tetirazan’olombelona i Jesosy. Toy izany koa i Melkizedeka izay tsy tonga mpisorona “araka ny lalàn’izay didy momba ny nofo”, izany hoe, teraka tao amin’ny foko sy fianakavian’ny mpisorona. (Hebreo 7:15, 16). Tsy tonga mpisorona tamin’ny alalan’ny ray olombelona izay mpisorona koa i Jesosy, fa “nantsoin’Andriamanitra manokana ho mpisoronabe araka ny fanaon’i Melkizedeka” kosa. — Hebreo 5:10, NW.
Ankoatra izany, i Jesosy dia tsy nanana taranaka na mpandimby teo amin’ny fisoronany. Tamin’io lafiny io koa, dia tsy nanana tantaram-pirazanana izy. Hanatanteraka mandrakizay ny asam-pisoronany izy amin’ny maha-mpampianatra tia manampy azy. Nanazava ny amin’io fanompoana tsy manam-piafarana io i Paoly tamin’ny filazana hoe:
“Fa Izy [Jesosy] kosa dia manana fisoronana tsy dimbasana, satria maharitra mandrakizay Izy; koa amin’izany dia mahavonjy tokoa izay manatona an’Andriamanitra amin’ny alalany Izy, satria velona mandrakizay hanao fifonana ho azy.” — Hebreo 7:24, 25.
Ny fandinihantsika ny tenin’i Paoly ao amin’ny Hebreo 7:3 àry dia tokony ho bebe kokoa noho ny ampahana fahalalana fotsiny tokony hampirimina ao an-dohantsika. Izy io dia tokony hanamafy ny fankasitrahantsika ilay fandaharana feno fitiavana nataon’i Jehovah Andriamanitra mba hahazoantsika famelan-keloka mandrakizay sy hanamafy ny fankasitrahantsika ilay fomba nalaminy mba handraisantsika fanampiana sy fitarihana tsy hanam-piafarana.