Vavolombelon’i Jehovah Manerana Izao Tontolo Izao — Brezila
I BREZILA dia tany goavana amin’ny lafiny maro. Amin’ny velarana sy ny mponina, dia izy no tany lehibe indrindra fahadimy eo amin’izao tontolo izao. Mandrakotra saika ny antsasaky ny velaran-tanin’i Amerika Atsimo izy io, ary fonenan’ny olona maro kokoa noho ny an’ireo firenena hafa rehetra ao amin’io kontinenta io mitambatra. Manana ny alan’ny tany mafana sady mando midadasika indrindra eo amin’izao tontolo izao koa i Brezila. Mikoriana mamakivaky io ala io ilay ony mahery indrindra eto an-tany — i Amazone.
Goavana koa i Brezila amin’ny heviny hafa. Manakaiky ny 400 000 ny isan’ny mpitory ny vaovao tsaran’ny Fanjakan’Andriamanitra ao aminy, ary tamin’ny taona lasa dia nihoatra ny 1 000 000 no nanatrika ny Fahatsiarovana ny nahafatesan’i Kristy. Io tany io, noho izany, dia miavaka indrindra raha ny amin’ny asa fitoriana ilay Fanjakana. Manazava io hevitra io ny fanandraman-javatra hita vao haingana.
Fanompoana tany amin’izay nilana fanampiana bebe kokoa
I Antonio sy ny vadiny dia nanao ny fanapahan-kevitra sarotra tamin’ny fandaozana ny havany sy ny asa iray azo antoka sady nahazoam-bola ampy tsara tao São Paulo, mba hanompo tany amin’izay nilana mpitory ilay Fanjakana bebe kokoa, tany amin’ny fanjakan’i Minas Gerais. Nahatafiditra antokona mpiasa tao amin’ny trano iray fanadiovan-tsiramamy ny faritanin’izy ireo. Tamin’ny andro voalohany nanaovany fanambarana tao, dia nanomboka fampianarana ny Baiboly sivy izy. Tao anatin’ny 18 volana, dia nitarika fampianarana mihoatra ny 40 izy!
Tamin’ny voalohany, dia natao tao amin’ilay trano fanadiovan-tsiramamy mihitsy ireo fivoriana. Kanefa, naniry hahita tena Efitrano Fanjakana ireo mpitory vaovao. Koa tamin’izany, dia nisy fiarabe iray nohofana mba hitondra olona 75 tany amin’ny kongregasiona akaiky indrindra. Avy eo dia nisy fivoriambe iray; 45 tamin’ireo mpianatra ny Baiboly vaovao no nanatrika sady nadinadinina. Dimy ambin’ny folo tamin’ireo no natao batisa tamin’io fotoana io. Mazava ho azy fa nikoriana tsy hay notohaina ny ranomasom-pifaliana!
Nampiasaina tamin’ny dia sahala amin’izany io kompania fitaterana io ihany, ary nanome sarany nahena ireo mpitondra. Ho fanehoam-pankasitrahana, i Antonio dia nanolotra fitaovana fianarana ny Baiboly iray tamin’ny tompon’ilay kompania. Nanaiky hanomboka hianatra ny Baiboly tamin’io takariva io ihany izy, ary vita batisa taorian’ny volana maromaro nianarana tamim-pahazotoana. Tamin’ny voalohany, dia nanohitra ilay fianarana ny vadiny, kanefa tamin’ny farany dia nihanalefaka ny fihetsiny. Amin’izao fotoana izao, izy koa dia Vavolombelon’i Jehovah vita batisa.
Tamin’ny Febroary 1992, dia kongregasiona iray nisy mpitory marisika 22 no noforonina. Tamin’ny 1994, dia nitombo io isa io ka nahatratra 42, nisy mpisava lalana maharitra, na mpitory ny vaovao tsara manontolo andro, 4. Vokatr’izany, dia nanatsoaka hevitra toy izao i Antonio: “Izahay mivady dia nahita fa raha ‘mizaha toetra an’i Jehovah’ isika araka ny ambaran’ny Malakia 3:10, dia ‘hampidina fitahiana manana amby ampy ho antsika’ ” izy.
Fanolorana zavatra vita an-tsoratra ara-baiboly
Ny antony hafa iray ahitan’ny asa fitoriana fandrosoana goavana toy izany any Brezila angamba, dia satria manolotra zavatra vita an-tsoratra ara-baiboly, isaky ny misy fahafahana hanao izany, ny Vavolombelona. Ohatra, ny kongregasiona iray dia nanoratra tany amin’ny biraon’ny sampan’ny Fikambanana Watch Tower, nangataka boky Manontany ny Tanora — Valiny Mandaitra 250. Nahoana no nisy fanafarana be toy izany?
Nanazava toy izao ilay taratasy: ‘Nanapa-kevitra ny hampiasa an’io boky io ho toy ny fitaovam-pampianarana tao amin’ny kilasy iray ny sekoly iray tao an-tanàna. Ny fanapahan-kevitry ny manam-pahefana tao an-tsekoly dia vokatry ny fanambarana tsy ara-potoana nataon’ny ray aman-drenin’ny mpianatra izay Vavolombelon’i Jehovah sy nataon’ny iray tamin’ireo mpanara-maso tao an-tsekoly. Enga anie i Jehovah hanohy hitahy ireo mpanompony eo am-panomezan’izy ireo fampianarana tsara dia tsara amin’ny alalan’io boky io.’ Eny, ary enga anie i Jehovah hanohy hitahy ny fandrosoana tsara dia tsaran’ny asa fitoriana ilay Fanjakana ao amin’ny tany goavan’i Brezila.
[Efajoro, pejy 8]
ANTONTAN’ISAN’ILAY TANY
Taom-piasana 1994
TAMPON’ISAN’NY MPITORY: 385 099
AMIN’NY ARA-KEVINY: Vavolombelona 1 ho an’ny olona 404
MPANATRIKA NY FAHATSIAROVANA: 1 018 210
ANTSALAN’NY MPITORY MPISAVA LALANA: 38 348
ANTSALAN’NY FAMPIANARANA NY BAIBOLY: 461 343
ISAN’NY NATAO BATISA: 24 634
ISAN’NY KONGREGASIONA: 5 928
BIRAON’NY SAMPANA: CESÁRIO LANGE
[Sary, pejy 9]
Fiara misy fanamafisam-peo iray nampiasaina tao São Paulo, tany amin’ny 1940 tany ho any
Fanaovana fanambarana tao amin’ny Botanical Garden, tao Rio de Janeiro
Biraon’ny sampana ao Cesário Lange