Mitantara ireo mpitory ilay Fanjakana
‘Aoka ho masina ianareo’
ANDRIAMANITRA dia mananatra ny kristiana toy izao: “Tsy mitondra tena araka ny filanareo fahiny tamin’ny tsi-fahalalanareo, fa araka ny fahamasinan’Ilay niantso anareo, dia aoka mba ho masina koa hianareo amin’ny fitondrantena rehetra, satria voasoratra hoe: ‘Ho masina hianareo, satria masina Aho.’ ” (I Petera 1:14-16). Ny fitondrantena masina toy izany koa dia fanambarana tsara ho an’ny hafa (I Petera 2:12). Araka ny hasehon’ny fitantarana manaraka, maneran-tany dia misy olona tso-po mitondra ireo fiovana izay hahafahany mampifanaraka ny fitondrantenany amin’io torohevitra io.
◻ Tany Ekoatera, ny lehilahy iray dia nijanona tsy nianatra rehefa voaroaka ilay Vavolombelona nampiofana azy noho ny fahalotoana teo amin’ny maha-lahy sy maha-vavy. Ny hetahetany ho an’ny zavatra ara-panahy dia nitarika azy handalina fivavahana hafa. Nametraka ny safidiny tamin’ny Eglizy evanjelika izy ary nandroso tao amin’izany ka tonga pastoran’ny fiangonany mihitsy. Kanefa nanenjika azy ny fieritreretany, satria niara-niaina tamin’ny vehivavy iray izy nefa tsy nivady ara-dalàna. Rehefa niresaka ny amin’izany tamin’ny pastoran’ny fiangonana hafa izy, dia nanome toky azy ireo fa tsy misy maha-ratsy mihitsy an’izany. Nahatsapa anefa io lehilahy io fa tsy tsara ny nataony, satria ilay Vavolombelona izay nampianatra azy dia voaroaka noho ny fahalotoana ara-pitondrantena indrindra. Tsy nety ho azony hoe nahoana ny fiangonany no tsy nanome tsiny azy noho izany. Tatỳ aoriana dia nifanena tamin’ny Vavolombelon’i Jehovah ilay sakaizany, ka nanomboka nianatra Baiboly tamin’izy ireo. Nanaraka azy koa ilay lehilahy mba hianatra. Manatrika fivoriana izao izy roa, sady mandroso amin’ny fahalalana ireo fotopoto-pitsipika ao amin’ny Baiboly, ka mandray ireo fandaharana ilaina mba hivadiana, mba hahafahana manompo an’i Jehovah amin’ny fo madio sy mendrika.
◻ Ao amin’ity zava-mitranga hafa iray ity, avy any Ekoatera koa, ny Vavolombelona iray dia mitantara hoe: “Tamin’ny febroary 1984, ny vehivavy lehibe iray dia nangataka anay mba hianatra Baiboly miaraka aminy.’ Inona no nanosika azy hanao izany dingana izany? Tonga Vavolombelon’i Jehovah ny anadahiny, ka nanaitra azy fatratra ny fitondrantenany tsara. Nandritra ny fianarana faharoa dia voaresaka ny amin’ny fifohana sigara, iray tamin’ireo fahalemeny. Kanefa, rehefa niverina ilay mpitory mba hampianatra ny herinandro nanaraka, dia nanambara taminy tamim-pireharehana ilay vehivavy fa vantany vao fantany ny hevitry ny Baiboly ny amin’ny sigara dia tsy nanendry na dia sigara iray intsony aza izy! Nanan-java-nanahirana hafa iray koa izy: feno sary ara-pivavahana ny tranony. Taorian’ny namakiany ny Deoteronomia 7:26 hoe: “Ary aza mitondra fahavetavetana ho ao an-tranonao, (...) fa zavatra voaozona (izany)”, anefa dia nodorany daholo izany.
Hatramin’izay, dia nanatrika ireo fivoriana izy ary tsy diso amin’izany na dia ny iray aza. Tsy ela tatỳ aoriana, dia afaka nandresy ny vato misakana lehibe indrindra taminy izy: nanapaka ny fifandraisany maloto tamin’ny lehilahy iray manambady. Hatramin’izao, ary voalohany indrindra teo amin’ny fiainany, dia afaka nanandrana ny tena fahasambarana izy, ary nanompo an’i Jehovah tamin’ny fieritreretana madio. Natao batisa tamin’ny aprily 1985 izy, ary tamin’izay fotoana izay dia efa nitarika fampianarana Baiboly efatra izy. Ny zavatra nokendreny nanaraka dia ny ho tonga mpitory maharitra, satria izany, araka ny heviny, no fomba tsara indrindra ho azy, hanaporofoany ny fankasitrahany an’i Jehovah izay nanafaka azy tamin’ny “fiainana tsinontsinona sy maloto”.
◻ Ny vokatra tsaran’ny fitondrantena feno fitiavam-pivavahana dia azo nodinihina tao amin’ny kilasimandrin-jazavavy iray tany Kenya, izay nahamarihana ny fitondrantena tsaran’ny Vavolombelona iray tamin’ny fomba niavaka. Nampiditra mpampianatra sivy io sekoly io, lehilahy avokoa izy ireo, ary ny iray taminy dia Vavolombelon’i Jehovah. Nefa voaroaka tsirairay izy ireo noho ny nijangajangany tamin-jazavavy mpianatra. Tamin’ny farany, tsy nisy afa-tsy iray sisa no tavela tamin’izy sivy: dia ilay Vavolombelon’i Jehovah!
Tsy azo lavina fa azon’ny olona manana fiainana maloto atao ny miova. Rehefa tonga ‘masina isika amin’ny fitondrantenantsika rehetra’, dia tsy vitan’ny hoe manome fanambarana tsara fotsiny ho an’ny hafa, fa mampifaly koa ny fon’i Jehovah. Amin’ny fanaovana toy izany, dia mametraka ny tenantsika ho eo amin’ny lalan’ny fiainana mandrakizay isika. — Ohabolana 27:11.
[Efajoro, pejy 21]
“Fa Izaho no Jehovah Andriamanitrareo, dia manamasina ny tenanareo, ka dia ho masina hianareo, satria masina Aho.” — Levitikosy 11:44.
[Efajoro, pejy 21]
“Aoka isika hanadio ny tenantsika ho afaka amin’ny fahalotoana rehetra, na amin’ny nofo na amin’ny fanahy.” — II Korintiana 7:1.