Aza Mamela ny Fahatezerana Hahatafintohina Anao

“MIERITRERETA tsara aloha!” “Avadiho impito aloha ny lela vao miteny!” “Aza maimay hamaly!” Efa mahazatra anao ve ireo teny ireo? Angamba mamerimberina azy ireo ianao mba hampitonena fahatezerana anaty. Ho fisakanana ny fipoahan’ny fahatezerana, dia mandeha manao dia an-tongotra kely ny olona sasany. Fomba tsotra hifehezana ny fahatezerana sy hitandroana ny fifandraisana amin’ny hafa ireo.

Tato anatin’ireo taona faramparany anefa, dia nampisafotofoto sain’olona maro ny torohevitra nifanipaka avy tamin’ireo matihanina, momba ny tokony hifehezana ny fahatezerana, na hisakanana ny fipoirany. Misy manam-pahaizana momba ny saina sasany, ohatra, nampandroso ny foto-pisainana hoe, “raha mety kokoa amin’ny fahasalamanao”, dia manampara ny fahatezeranao. Misy hafa mampitandrina fa ny fipoahan’ny fahatezerana tsy tapaka dia “famantarana ny amin’ny fahafatesana aloha be, mahery kokoa noho ireo anton-javatra hafa mitera-doza toy ny fifohana sigara sy ny tosi-dra ambony ary ny kôlesterôla ambony”. Milaza mazava toy izao ny Tenin’Andriamanitra: “Mitsahara amin’ny fahatezerana, ary mahafoiza ny fahavinirana; aoka tsy hirehitra ny fahatezeranao, fa ratsy no hiafaran’izany.” (Salamo 37:8). Nahoana ny Baiboly no manome torohevitra voafaritra tsara toy izany?

Mitarika ho amin’ny fanaovan-javatra tsy voafehy ny fihetseham-po tsy voafehy. Nanjary niharihary izany, vao tany am-piandohan’ny tantaran’ny olombelona. Toy izao no vakintsika: “Tezitra indrindra Kaina, sady nanjombona ny tarehiny.” Nitarika azy hanao inona izany? Nangeja sy nifehy azy aoka izany ny fahatezerany, hany ka nanamafy ny fony tsy hanaraka ny fananaran’i Jehovah mba hiova hanao ny tsara izy. Ny fahatezerany tsy voafehy, dia nitarika an’i Kaina ho amin’ny fahotana lehibe — ny famonoana ny rahalahiny. — Genesisy 4:3-8.

Voan’ny toy izany koa i Saoly, ilay mpanjakan’ny Isiraely voalohany, rehefa reny fa nahazo teny fiderana be i Davida. “Ny vehivavy mpandihy dia nihira hoe: Saoly nahafaty arivoarivo; fa Davida nahafaty alinalina. Dia tezitra indrindra Saoly, fa tsy sitrany izany teny izany”. Nanapaka aoka izany ny eritreritr’i Saoly ny fahatezerana, hany ka nitarika azy hanandrana hamono an’i Davida imbetsaka. Na dia nanao dingana voalohany mba hamitranana ny fisakaizana aza i Davida, dia tsy vonona ny hikatsaka fihavanana sy handravona ny fifampihavanana, i Saoly. Tamin’ny farany, dia namoy tanteraka ny fankasitrahan’i Jehovah izy. — 1 Samoela 18:6-11; 19:9, 10; 24:2-22; Ohabolana 6:34, 35.

Rehefa resin’ny fahatezerana tsy voafehy ny olona iray, dia tsy maintsy hilaza sy hanao zavatra handratra izay rehetra voakasika. (Ohabolana 29:22). Nanjary tezitra i Kaina sy i Saoly, satria samy nialona sy nitsiriritra. Kanefa, afaka mitranga noho ny antony maro samihafa ny fihetsika mampiseho fahatezerana. Ny fanakianana iray tsy amin’ny antony, ny teny iray manevateva, ny tsy fifankahazoan-kevitra, na ny fitondrana tsy ara-drariny, dia mety ho ilay pitik’afo hanapoaka fahatezerana.

Ny ohatr’i Kaina sy i Saoly dia nampiseho fa nanana toetra ratsy lehibe niombonana izy. Ny fanatitra nataon’i Kaina dia toa mampiseho tsy fananana finoana. (Hebreo 11:4). Ny tsy fankatoavan’i Saoly ny didy voalazan’i Jehovah mazava, sy ny fanandramany nanamarin-tena, taorian’izany, dia nitarika ho amin’ny famoizany ny fankasitrahan’Andriamanitra sy ny fanahiny. Mazava fa samy nanapaka ny fifandraisany tamin’i Jehovah izy roa lahy.

Ampifanohero amin’ny an’i Davida, izay nanana antony tokony hahatezitra noho ny fitondran’i Saoly azy, ny fihetsik’izy ireo. Nifehy ny fihetseham-pony i Davida. Nahoana? Hoy izy: “Sanatria amiko eo anatrehan’i Jehovah, raha hanao izany zavatra izany amin’ny tompoko izay voahosotr’i Jehovah ka haninjitra ny tànako aminy, fa voahosotr’i Jehovah izy.” Mazava fa nieritreritra ny fifandraisany tamin’i Jehovah i Davida, ary hita taratra teo amin’ny fifampiraharahany tamin’i Saoly izany. Nametraka tamim-panetren-tena ireo raharaha teo am-pelatanan’i Jehovah izy. — 1 Samoela 24:7, 16.

Eny tokoa, zava-dehibe no tafiditra amin’ny fahatezerana tsy voafehy. Nampitandrina toy izao ny apostoly Paoly: “Tezera, fa aza manota”. (Efesiana 4:26). Na dia manana ny toerany aza ny fahatezerana ara-drariny, dia eo foana ilay loza hoe mety ho ny vato mahatafintohina antsika ny fahatezerana. Tsy mahagaga àry raha tsy maintsy mandresy io zava-tsarotra io isika, dia ny fifehezana ny fahatezerantsika. Ahoana no ahafahantsika manao izany?

Ny fomba tena lehibe iray dia ny fambolena fifandraisana matanjaka amin’i Jehovah. Mampirisika anao mba hamboraka ny ao am-ponao sy ny ao an-tsainao aminy, izy. Lazao aminy izay mampalahelo anao sy izay mampanahy anao, ary mangataha fo tony mba handresena ny fahatezerana. (Ohabolana 14:30). Matokia fa “ny mason’ny Tompo dia mitsinjo ny marina, ary ny sofiny mihaino ny fitarainany”. — 1 Petera 3:12.

Afaka mamolavola sy mitari-dalana anao ny vavaka. Amin’ny fomba ahoana? Afaka ny hisy vokany lalina eo amin’ny fifampiraharahanao amin’ny hafa izy io. Tadidio ny fomba nifampiraharahan’i Jehovah taminao. Araka ny lazain’ny Soratra Masina, i Jehovah dia “tsy mba manao amintsika araka ny fahotantsika”. (Salamo 103:10). Tena ilaina ny toe-tsaina tia mamela heloka, mba tsy “ho resin’ny fitak’i Satana” ianao. (2 Korintiana 2:10, 11). Fanampin’izany, ny vavaka dia natao hanokafana ny fonao ho vonona handray ny tari-dalana avy amin’ny fanahy masina, izay afaka mandrava fomba fiaina miorim-paka mafy. I Jehovah dia manome amim-pifaliana ‘fiadanana izay mihoatra noho ny hevitra rehetra’, izay afaka manafaka anao amin’ny fangejan’ny herin’ny fahatezerana. — Filipiana 4:7, NW.

Ny vavaka anefa, dia tsy maintsy omban’ny fandinihana tsy tapaka ny Soratra Masina, mba ‘hamantarantsika izay sitrapon’i Jehovah’. (Efesiana 5:17; Jakoba 3:17). Raha sarotra amin’ny tenanao manokana ny mifehy ny fahatezeranao, dia miezaha mafy mba hahazo ny fomba fihevitr’i Jehovah momba ilay raharaha. Jereo indray ireo andinin-teny mifandray manokana amin’ny fifehezana ny fahatezerana.

Manolotra izao fampahatsiahivana lehibe izao ny apostoly Paoly: “Aoka isika hanao soa amin’ny olona rehetra, indrindra fa amin’ny mpianakavin’ny finoana.” (Galatiana 6:10). Afantohy amin’ny fanaovana soa ho an’ny hafa ny eritreritrao sy ny zavatra ataonao. Ny fanaovan-javatra tsara sy mahasoa toy izany dia hampirisika ho amin’ny fanehoana fahaiza-miombom-pihetseham-po amin’ny hafa sy ny fitokisana aminy, ary hanalefaka ny tsy fahazoan-kevitra izay miteraka fahatezerana mora foana.

Milaza toy izao ny mpanao salamo: “Ampitoero eo amin’ny teninao ny diako; ary aza avela hanapaka ahy izay mety ho faharatsiana. Be fiadanana izay tia ny lalànao, ary tsy misy mahatafintohina azy.” (Salamo 119:133, 165). Afaka ny ho marina aminao koa izany.

[Efajoro, pejy 9]

Ireo Dingana Hifehezana ny Fahatezerana

□ Mivavaha amin’i Jehovah. — Salamo 145:18.

□ Mandiniha ny Soratra Masina isan’andro. — Salamo 119:133, 165.

□ Aoka ianao ho be atao eo amin’ny fanaovan-javatra mendrika. — Galatiana 6:9, 10.