Tariho ho amin’ny fandaminan’i jehovah ireo olona mianatra ny Baiboly
1 Mila ny mahafantatra ny fandaminan’ilay “andiany iray” noresahin’i Jesosy ao amin’ny Jaona 10:16 ireo olona mianatra ny Baiboly. Tsy maintsy mahatakatra izy ireo fa miankina amin’ny faneken’ny tenany ho anisan’ny fandaminan’i Jehovah ny famonjena azy. (Apok. 7:9, 10, 15). Noho izany, isika dia tokony hanomboka hitarika ireo miara-mianatra ny Baiboly amintsika ho amin’ny fandaminana raha vantany vao natomboka ny fianarana ny Baiboly.
2 Ampio ireo miara-mianatra ny Baiboly aminao mba hahafantatra ireo zavatra maro mampiavaka ny fandaminan’i Jehovah eto an-tany. Manaraka ny ohatra tamin’ny taonjato voalohany ny vahoakan’i Jehovah rehetra ka anisan’ny kongregasiona izay voaforon’ireo loholona, mpikarakara momba ny asa ary mpitory tsotra. Amin’izao andro izao, ireo mpikambana ao amin’ireo kongregasiona dia mankafy ny fanatrehana fivoriana dimy ao anatin’ny herinandro. Misy fivoriamben’ny fizaran-tany sy fivoriamben’ny distrika maromaro alamina ara-potoana mandritra ny taona, ary ireo dia manolotra fampianarana manokana ary koa fahafahana hifanerasera amin’ireo Vavolombelona hafa avy any amin’ny faritra samy hafa. Misy koa mpitory maharitra, misionera ary mpiandraikitra mpitety faritany, ary Kolejy foibe iray izay mitarika ny asa maneran-tany. Amin’ny fomba ahoana no mety hampahafantaranao ireo miara-mianatra ny Baiboly aminao ireo endrika samihafan’ny fandaminan’i Jehovah? Amin’ny fomba ahoana no hahafahanao hanampy azy ireo hahita fa miorina amin’ny Baiboly ny firafitry ny fandaminana?
Ampiasao ilay bokikely hoe Vavolombelon’i Jehovah tafaray
3 Misy fanazavana feno momba ny fandaminan’i Jehovah ilay bokikely hoe Vavolombelon’i Jehovah tafaray. Amin’ny alalan’izy io ianao dia afaka mampahafantatra miandalana ny fandaminan’Andriamanitra amin’ireo miara-mianatra ny Baiboly aminao, ary manampy azy hahatakatra ny fomba fiasany. Ny fomba iray tsara hanombohana dia ny firesahana ny amin’izay atao any amin’ny Efitrano Fanjakana. Izany dia hampirisika ilay mpianatra hamonjy ireo fivorian’ny kongregasiona. Alohan’ny hanasana azy ho any amin’ny lahateny ampahibemaso voalohany, dia diniho indray aloha ny fanazavana eo amin’ny pejy faha-14 sy faha-15. Sintony ho amin’ireo sary ny sainy. Lazalazao ny amin’ny toerana misy ilay Efitrano Fanjakana eo an-toerana sy ny toetoetrany. Azonao aseho azy mihitsy aza ny sarin’ilay Efitrano Fanjakana alehanao.
4 Rehefa ambara any amin’ny kongregasiona ny fitsidihan’ny mpiandraikitra ny fizaran-tany, dia iaraho mandinika amin’ilay mpiara-mianatra ny Baiboly aminao ny pejy faha-20 sy faha-21. Ampiasao ireo fanontaniana eo amin’ny faran’ny pejy faha-21 mba hampisongadinana ireo hevi-dehibe. Iaraho mandinika aminy ny fototra ara-baiboly iorenan’io fandaharana arahintsika amin’izao andro izao io amin’ny fampiasana ny fehintsoratra voalohany eo amin’ny pejy faha-20. Hahatonga ny fitsidihan’ilay mpianatrao ny Efitrano Fanjakana voalohany hisy vidiny izany fanazavana izany.
5 Tahaka izany koa, alohan’ny fivoriamben’ny distrika, na ny fivoriamben’ny fizaran-tany, na ny andro fivoriambe manokana hatrehinao, dia diniho izay voalaza eo amin’ny pejy faha-19. Sintony ho amin’izay tafiditra ao amin’ny fivoriambe lehibe ny sainy, ary mariho ny maha iraisam-pirenena izany araka ny asehon’ireo sary eo amin’ny pejy faha-18. Rehefa hanome fanazavana momba ilay sary mampiseho ny famoahana boky vaovao iray ianao, dia azonao ampiomanina izy fa handinika ny pejy faha-24 sy faha-25 amin’ny manaraka ianareo. Mba hanazavana ny asan’ny mpitory maharitra, dia diniho ireo hevitra eo amin’ny pejy faha-22 sy faha-23.
Ataovy mifanentana amin’izay ilaina ny fanazavanao
6 Araka ny hitanao, dia tsy ilaina ny manomboka amin’ny fiandohan’ilay bokikely hoe Vavolombelon’i Jehovah tafaray. Tsia fa, arakaraka ny tarehin-javatra sy ny zavatra ilaina, dia mandiniha hevitra voafaritra tsara avy ao amin’ilay bokikely ka hanampy ilay mpianatra hankasitraka ny fandaminan’i Jehovah ary hampirisika azy hifanerasera amin’ny kongregasiona eo an-toerana.
7 Raha miresaka amim-piaikena ianao rehefa mandinika ireo zavatra ireo dia hamela soritra maharitra amin’izany eo amin’ilay mpianatrao. Aoka ianao hafana fo. (Asan’ny apostoly 18:25) Ary koa, ataovy izay hahazoana antoka fa ianao, “izay mampianatra ny sasany”, dia manome ohatra tsara raha ny amin’ny fampisehoana fankasitrahana ny fandaminan’i Jehovah. (Rom. 2:21) Raha manao izany ianao, dia mety hanampy ny hafa ho anisan’ilay andiany iray tarihin’i Jesosy ho any amin’ny fiainana mandrakizay.