Fitarihana Ireo Mpianatra ho Amin’ilay Fandaminana ao Ambadik’ilay Anarantsika
1 “Hafatra lazaina amin’ny fiteny maherin’ny 200 izy io. Hafatra re any amin’ny tany maherin’ny 210 izy io. Hafatra entina manokana any amin’ny olona izy io, any amin’izay rehetra mety hahitana olona. Izy io dia tapany amin’ilay ezaka fitoriana lehibe indrindra hita teto amin’itỳ tontolo itỳ, hafatra mampiray olona an-tapitrisany maro maneran-tany. Ny Vavolombelon’i Jehovah dia voalamina mba hanatanteraka io asa io nandritra ny zato taona mahery!”
2 Izany no fanombohan’ilay fitantarana ao amin’ilay vidéo hoe Ny Vavolombelon’i Jehovah — Ilay Fandaminana ao Ambadik’ilay Anarana. Mamaly ireto fanontaniana ireto izy io: Iza marina moa ny Vavolombelon’i Jehovah? Ahoana no andaminana sy itarihana ary anohanana ara-bola ny asany? Ataon’izy io latsa-paka ao amin’ny mpijery ny hoe “ny Vavolombelon’i Jehovah maneran-tany dia nampiofanina mba ho fandaminana iray hanampy ny mpiara-belona aminy hamboly finoana ny Baiboly”. Mampirisika ny mpijery hahita ilay fandaminana ao ambadik’ilay anarantsika koa izy io. Rehefa avy nahita io vidéo io ny vehivavy iray izay nianatra, dia latsa-dranomasom-pifaliana sy fankasitrahana. Hoy izy: “Ahoana no tsy ahitan’iza na iza fa io no ilay fandaminan’i Jehovah, ilay Andriamanitra marina?” — Ampitahao amin’ny 1 Korintiana 14:24, 25.
3 Ny vehivavy iray hafa dia nianatra ny Baiboly efa ela be, na dia tapatapaka aza. Tsy nety nanaiky anefa izy fa fampianaran-diso ny Trinite. Avy eo dia nampisehoana ilay vidéo-ntsika izy sy ny vadiny. Tena nanohina azy ireo ilay famelabelarana ka nijery azy io indroa izy ireo tamin’io alina io. Tamin’ny fianarany nanaraka, dia naneho ny faniriany ho tonga Vavolombelona ilay ramatoa. Nilaza izy fa nifantoka be loatra tamin’ny finoany ny Trinite, ka tsy nijery ilay fandaminantsika sy ny olona ao anatiny. Tamin’ny alalan’ilay vidéo, dia takany fa nahita ilay fandaminana marin’Andriamanitra izy. Naniry hanomboka hitory isan-trano avy hatrany izy. Rehefa nohazavaina taminy ireo dingana nilainy hatao alohan’ny hahatongavany ho mpitory tsy vita batisa, dia hoy izy: “Koa inona àry no andrasantsika hanaovana azy ireo?” Niala tamin’ny fiangonany izy, nanomboka ny asa fanompoana teo amin’ny saha, ary nanjary havanana tsara tamin’ny fampisehoana fa tsy marina ny Trinite.
4 Efa voaporofo tsara fa manao fandrosoana ara-panahy tsara kokoa, no sady mandroso ho amin’ny fahamatorana haingana kokoa ireo mpianatra ny Baiboly, rehefa manaiky ny fandaminan’i Jehovah ka mifanerasera aminy. Zava-dehibe ny manamarika fa, rehefa avy natao batisa ireo olona 3 000 tamin’ny Pentekosta, dia “naharitra tamin’ny fampianaran’ny Apostoly sy ny [fifaneraserana, NW, f.a.p.]” izy ireo. (Asa. 2:42). Tena ilaina ny hanampiantsika ireo mpianatra hanao toy izany koa ankehitriny. Amin’ny fomba ahoana?
5 Raiso ilay andraikitra: Tsy maintsy takatry ny mpanao mpianatra tsirairay fa andraikiny ny mitarika ilay mpianatra ny Baiboly ho amin’ny fandaminan’Andriamanitra. (1 Tim. 4:16). Ny fotoam-pianarana tsirairay dia tokony hoheverina ho dingana iray mankany amin’ilay andro mahafaly hanamarihan’ilay vaovao ny fanoloran-tenany ho an’i Jehovah amin’ny alalan’ny batisa ao anaty rano. Ny iray amin’ireo fanontaniana hapetraka aminy amin’ny fotoan’ny batisa dia hoe: “Moa ve takatrao fa ny fanoloran-tenanao sy ny batisanao dia mampahafantatra anao ho iray amin’ny Vavolombelon’i Jehovah mifandray amin’ny fandaminan’Andriamanitra tarihin’ny fanahiny?” Noho izany, dia zava-dehibe ny hahatakarany fa tsy afaka manompo an’Andriamanitra izy raha tsy mifanerasera amin’ilay tena kongregasiona kristiana. — Matio 24:45-47; Jaona 6:68; 2 Kor. 5:20.
6 Manohiza mampianatra ilay mpianatra momba ny kongregasiona eo an-toerana sy ilay fandaminana iraisam-pirenena ao ambadiky ny Vavolombelon’i Jehovah. Ataovy isaky ny fotoam-pianarana Baiboly tsirairay izany, ka manomboka amin’ilay voalohany indrindra. Dieny eo am-boalohany mihitsy, dia asao ho amin’ireo fivoriana ilay mpianatra ary aza mitsahatra manasa azy. — Apok. 22:17.
7 Ampiasao ireo fiasana omena antsika: Ny zavatra vita an-tsoratsika tsara hampiasaina indrindra hitarihana fampianarana Baiboly dia ny bokikely Inona no Takin’Andriamanitra Amintsika? sy ny boky Fahalalana Izay Mitarika ho Amin’ny Fiainana Mandrakizay. Samy manasongadina ny ilana hifanerasera amin’ny kongregasiona izy roa ireo. Hoy ny ambaran’ny faran’ny lesona faha-5 ao amin’ny bokikely Takina: “Mila ny tsy mitsahatra ny hianatra momba an’i Jehovah sy hankato ireo zavatra takiny ianao. Ny fanatrehana fivoriana any amin’ny Efitrano Fanjakanan’ny Vavolombelon’i Jehovah eo an-toerana dia hanampy anao hanao izany.” Ny boky Fahalalana dia mamerimberina mampirisika ilay mpianatra hifanerasera amintsika any amin’ireo fivoriana. Ny toko faha-5, fehintsoratra faha-22, dia mampita izao fanasana izao: “Mampirisika anao amim-pitiavana [ny Vavolombelon’i Jehovah] mba hiaraka aminy hanolotra fanompoam-pivavahana ho an’Andriamanitra ‘amin’ny fanahy sy ny fahamarinana’. (Jaona 4:24).” Hoy ny ambaran’ny toko faha-12, fehintsoratra faha-16: “Eo am-panohizanao izany fianarana izany sy eo am-panaovanao ho fahazarana ny fanatrehana ireo fivorian’ny Vavolombelon’i Jehovah, dia vao mainka hihamafy hatrany ny finoanao.” Hoy ny toko faha-16, fehintsoratra faha-20: “Ataovy ho fahazaranao ny hanatrika ireo fivorian’ny Vavolombelon’i Jehovah.” Hoy ny teny anampiny: “Izany dia hanampy anao hahazo ny hevitry ny fahalalana an’Andriamanitra ary avy eo dia hampihatra azy io eo amin’ny fiainanao ka hitondra fahasambarana ho anao. Ny maha-anisan’ny firahalahiana kristiana maneran-tany anao dia hanampy anao hitoetra ho akaiky an’i Jehovah.” Ny toko faha-17 dia miresaka amin’ny fomba lalina ny fomba hahitan’ny olona iray tsy fananana ahiahy marina eo anivon’ny vahoakan’Andriamanitra. Rehefa miara-mianatra amin’ny hafa isika, dia andraikitsika ny manantitrantitra ireo fizarana ireo.
8 Ny bokikely Ny Vavolombelon’i Jehovah — Tafaray mba Hanao ny Sitrapon’Andriamanitra Maneran-tany dia fiasana tena tsara izay natao mba hampahafantarana ny olona ilay hany fandaminana hita maso ampiasain’i Jehovah ankehitriny mba hanatanterahana ny sitrapony. Ny fanazavana misy tsipiriany raketiny momba ny fanompoantsika sy ireo fivoriana ary ny fandaminana dia hampirisika ny mpamaky hiara-manolotra fanompoam-pivavahana ho an’Andriamanitra amintsika. Raha vantany vao tafaorina ny fampianarana Baiboly iray, dia anoroana hevitra ny hanomezantsika io bokikely io hovakin’ilay mpianatra samirery. Tsy ilaina ny hiarahana mianatra azy io aminy, toy ny tamin’ny lasa.
9 Ny sasany amin’ireo vidéos novokarin’ny Fikambanana dia fiasana faran’izay tsara mba hitarihana ireo mpianatra ho amin’ilay fandaminana ao ambadik’ilay anarantsika. Ho tsara indrindra raha afaka mijery an’ireto izy ireo: 1) La Société du Monde Nouveau en action (Ny Fitambaran’olon’ny Tontolo Vaovao Miasa), izay famerenana ilay sarimihetsika tamin’ny 1954, ary mamoaka tsara ilay toe-tsaina mirindra sy mandaitra ary feno fitiavana iasan’ny fandaminan’i Jehovah; 2) Unis grâce à l’enseignement divin (Tafaray Noho ny Fampianarana Araka An’Andriamanitra), izay mampiseho ilay firaisan-tsaina feno fiadanana niharihary tamin’ireo fivoriambentsika niraisam-pirenena tany Eoropa Atsinanana, Amerika Atsimo, Afrika ary Azia; 3) To the Ends of the Earth (Hatrany Amin’ny Faran’ny Tany), izay nanamarika ny tsingerin-taona faha-50-n’ny Sekoly Ara-baibolin’i Gileada An’ny Watchtower, ary mampiseho ny vokatra azon’ireo misionera teo amin’ny asa fitoriana maneran-tany; 4) Jehovah’s Witnesses Stand Firm Against Nazi Assault (Miorina Mafy ny Vavolombelon’i Jehovah Manoloana ny Fanafihana Nazia), izay milaza ny tantara mampientana momba ny herim-po sy ny fandresen’ny Vavolombelona teo anoloan’ny fanenjehana mahery vaikan’i Hitler azy; ary, mazava ho azy, 5) Ny Vavolombelon’i Jehovah — Ilay Fandaminana ao Ambadik’ilay Anarana.
10 Mamera tanjona miandalana momba ireo fivoriana: Tsy maintsy hazavaina amin’ireo mpianatra fa samy ilaintsika na ny fampiofanana manokana azo amin’ny fianarana Baiboly any an-tokantrano, na ny fiaraha-midinika toy ny any an-dakilasy omena any amin’ireo fivorian’ny kongregasiona. (Jaona 6:45). Mila ny mifanindran-dalana ny fandrosoan’ny mpianatra vaovao iray eo amin’ny fianarany momba ny Soratra Masina sy momba ny fandaminana. Mba hahatongavana amin’izany, dia tsy misy toy ny fanatrehana ireo fivoriana. (Heb. 10:23-25). Manomboha avy hatrany manasa ilay olona ho any amin’ireo fivorian’ny kongregasiona. Ny olona vao liana sasany dia manomboka manatrika fivoriana na dia alohan’ny hananany fianarana Baiboly tsy tapaka aza. Mazava ho azy fa maniry hanome ny ohatra tsara ny tenantsika, amin’ny fanatrehana ireo fivoriana tsy tapaka. — Lioka 6:40; Fil. 3:17.
11 Manomeza fanazavana ampy momba ireo fivoriana sy ny fomba itarihana azy ireo, mba tsy ho hendratrendratra ilay mpianatra, rehefa manatrika ny fivoriany voalohany izy. Koa satria tena saikatsaikatra ny olona sasany mandeha voalohany any amin’ny toerana vaovao aminy, dia mety ho tsara ny hiarahanao amin’ilay mpianatra ho any amin’ny Efitrano Fanjakana, rehefa hanatrika ny fivoriany voalohany izy. Tsy hahatsiaro tena ho hendratrendratra loatra izy, raha miaraka aminy ianao, rehefa miarahaba an’ireo mpikambana ao amin’ny kongregasiona. Ambonin’ny zavatra rehetra, dia mahaiza mandray tsara ny vahininao, ka ataovy izay hahatsiarovany tena ho raisina an-tanan-droa sy tsy ho sakodiavatra. — Matio 7:12; Fil. 2:1-4.
12 Ampirisiho ilay mpianatra hanatrika andro fivoriambe manokana, fivoriamben’ny fizaran-tany, na fivoriamben’ny distrika, raha vao misy fahafahana ho amin’izany. Angamba ianao ho afaka hampiditra azy ao amin’ny fandaminanao fitaterana ho any.
13 Ampio tsikelikely hampitombo fankasitrahana lalina ilay mpianatra: Hoy ny hazavain’ny boky Voalamina mba Hanatanteraka Tsara ny Fanompoantsika, pejy 92: “Raha hita taratra eo amin’ny resadresaka ifanaovanao amin’ireo olona liana ny fankamamianao manokana amin’ny fomba lalina ny fandaminan’i Jehovah, dia ho mora kokoa ho azy ireo ny hitombo fankamamiana ary hanosika azy ireo izany hanao fandrosoana bebe kokoa eo amin’ny fahafantarana an’i Jehovah.” Miresaha amin’ny fomba manorina foana, fa tsy amin’ny fomba tsy manorina na oviana na oviana kosa, momba ny kongregasionanao eo an-toerana. (Sal. 84:10; 133:1, 3b). Ao amin’ireo vavaka ataonao amin’ilay fampianarana Baiboly, dia miresaha momba ny kongregasiona sy ny ilan’ilay mpianatra hifanerasera tsy tapaka aminy. — Efes. 1:15-17.
14 Tena tiantsika ireo vaovao hampitombo fankasitrahana lalina an’ilay fiarahana mahafinaritra sy ilay tsy fananana ahiahy ara-panahy hita eo anivon’ny vahoakan’Andriamanitra. (1 Tim. 3:15; 1 Pet. 2:17; 5:9). Amin’ny maha-Vavolombelon’i Jehovah antsika, dia aoka isika hanao izay rehetra azontsika atao mba hitarihana ireo mpianatra ny Tenin’Andriamanitra ho amin’ilay fandaminana ao ambadik’ilay anarantsika.
[Teny notsongaina, pejy 3]
Mandroso ara-panahy haingana kokoa ireo mpianatra, rehefa ny tenany ihany no mahita ilay fandaminana
[Teny notsongaina, pejy 4]
Aza mangataka andro manasa ireo mpianatra hanatrika fivoriana