Ampiasao amin’ny fomba tsara ireo zavatra vita an-tsoratra
1Ny fandaminan’i Jehovah hita maso dia mikarakara antsika amin’ny fanomezana karazana boky maro be, mba hanampiana antsika amin’ny asa fitoriana sy fanaovana mpianatra. (Matio 28:19, 20) Ny fankasitrahantsika an’ireny zavatra vita an-tsoratra omen’ny Fikambanana ireny, dia tokony hanosika antsika hampiasa azy tsara eo amin’ny fanompoana.
2 Rehefa manatanteraka ny fanompoana isika, dia irintsika ny hanampy ireo olona mampiseho ny toetry ny ondry mba handroso amin’ny lalana mitarika ho amin’ny fiainana. Afaka manampy antsika hanao izany ireo zavatra vita printy. Rehefa mifanakalo hevitra ny amin’ny Soratra masina amin’ny olona iray liana isika, dia mety ho hitantsika fa misy foto-kevitra iray manokana manintona azy. Raha mifankazatra tsara amin’ireo fanazavana sarobidy ao amin’ireo zavatra vita an-tsoratra isan-karazany isika, dia ho afaka hampifanaraka ny fampisehoana sy ny zavatra atolotsika amin’izay mifanentana amin’ny fahalianan’ilay olona iresahantsika. Mety hitaky ny hanaovantsika fiverenana mitsidika miaraka amin’ny zavatra vita an-tsoratra mety izany.
MANOLORA IZAY ILAINA
3Amin’ny fiasana amin’ny fomba feno ny faritanintsika, isika dia hahita olona liana amin’ny Baiboly amim-pahatsorana, izay haniry hahafantatra bebe kokoa momba azy. Ireo bokintsika dia afaka manampy azy ireny handroso amin’ny fahazoana ny hevitry ny Baiboly. Raha toa kosa isika ka miresaka amin’ny olona iray izay tsy manam-pinoana ny Baiboly sady mihevitra fa misy hevitra mifanipaka ao na tsy mifanaraka amin’ny siansa, dia hety kokoa ny hampisehoana ny boky “La Bible, Parole de Dieu ou des Hommes?” Io boky io dia mandrodana tanteraka ireo fanakianana ataon’ny olona ny amin’ny Baiboly ary manome fanazavana marina ny amin’ny tokony hanekena ny Baiboly ho tenin’Andriamanitra. Na koa, azonao atao ny mampiseho ny boky “L’humanité à la recherche de Dieu”, amin’ny fampiasana ireo toko faha-15 sy faha-16.
4 Olona maro no miatrika zava-manahirana eo amin’ny fiainany ao an-tokantrano. Mety hanana fahalalana kely ny amin’ny torohevitra ao amin’ny Baiboly izy, na ny amin’ny fomba fampiharana azy. Mba hanampiana azy ireny hiatrika ireo zava-manahirana eo amin’ny fiainana sady hahita fanafodiny mandaitra, dia azontsika atao ny manolotra ny boky “Fiainam-pianakaviana” na angamba manasongadina ny toko faha-5 ka hatramin’ny faha-8 amin’ny boky “Bonheur”. Tsy ho tonga vetivety foana akory ny fiovana, kanefa afaka manantitrantitra isika fa tena misy vokany tsara ny torohevitry ny Baiboly.
5 Rehefa mitsidika olona manan-janaka, dia hevero ny fanolorana ireo boky voaomana manokana ho an’ny tanora. Angamba azonao ampiasaina ny boky “Les Jeunes s’interrogent”. Mpitory maro no nanampy tsy an-kanavaka ray aman-dreny sy ankizy toy izany tamin’ny fampisehoana “Ny Bokiko misy fitantarana ao avy ao amin’ny Baiboly” na ny boky “Ecoutez le Grand Enseignant”.
6 Mora entina koa ireo taratasy mivalona, ary azo ampiasaina mba hanombohana resadresaka rehefa miasa isan-trano na rehefa manao fanambarana tsy ara-potoana. Ilay taratasy mivalona mitondra ny lohateny hoe “Manantena inona ny olon-tiana nodimandry”? dia tena manome fampiononana, sady mirakitra fanazavana sarobidy. Moa ve ianao mitondra maromaro amin’ireny taratasy mivalona samy hafa ireny any aminao? Moa ve ianao efa nanomana fanazavana mba hampidirana azy ireny?
7 Raha mbola mizara ny vaovao tsara amin’ny hafa isika dia maniry hampiasa tsara ireo boky maro manampy amin’ny fianarana ny Baiboly atolotry ny “mpanompo mahatoky sy malina.” (Matio 24:45-47, MN) Ny sakafo ara-panahy tondraka toy izany dia manome taratry ny fahalalahan-tanan’i Jehovah sy ny fiahiany ny olombelona rehetra.