Fomba fampiseho izay mahatonga ny olona handray tsara
1 Ireo fomba fampiseho izay mahatonga ny olona handray tsara dia ireo izay mampiseho mazava fa mahakasika ilay tompon-trano ilay foto-kevitra, fa zavatra ilainy na azony ampiasaina izy io. Mandritra ny resaka manontolo ataonao, dia ampio ilay tompon-trano hahatsapa hoe “Mahakasika ahy ity”. Rehefa manomana fomba fampiseho iray isika, dia tokony hanontany tena hoe: ‘Foto-kevitra inona avy no tena ahin’ny olona indrindra ao amin’ny faritaniko? Inona avy ireo zavatra ilain’izy ireo? Amin’ny fomba ahoana no ahafahako manolotra ilay hafatra mba hampisehoana fa mihevitra ireo zavatra ilain’izy ireo i Jehovah?’ Tononina eto ambany ny zavatra sasantsasany izay heverin’ny olona amin’izao andro izao ho zava-dehibe aoka izany. Afaka mampiasa ny iray amin’izy ireo, na zavatra mitovitovy amin’izany, ao amin’ny fomba fampisehonao ve ianao? Mariho koa ny fomba ahafahana mampifamatotra hevitra sasany avy ao amin’ny boky Les Jeunes s’interrogent na Ny fahatanoranao amin’ny fomba fampiseho ampiasainao.
2 Fiahiana ny amin’ny tsy fisian’ny fahasambarana: “Miresaka amin’ny olona izay tena miahy marina ny amin’ny toetran’ny fiainana eto amin’ny manodidina antsika izahay. Na dia mety hanana ireo zavatra ara-nofo ilainy aza ny olona, dia maro no tsy tena sambatra eo amin’ny fiainany. Heverinao ve fa azo atao ny manana fiainana tena sambatra marina? [Avelao izy hamaly.] Ny iray amin’ireo fanalahidin’ny fahasambarana dia hita ao amin’ny Baiboly ao amin’ny Apokalypsy 1:3. [Vakio.] Ny fahazoanao izay lazain’ny Baiboly momba ny hoavy dia afaka mitondra fahasambarana ho anao. Mariho ny iray monja amin’ireo faminaniany.” Vakio ny Apokalypsy 21:3, 4 ary avy eo dia asehoy ny fanazavana ao amin’ny fehintsoratra faha-12 eo amin’ny pejy faha-190 amin’ny boky Ny fahatanoranao, na ao amin’ny fehintsoratra farany eo amin’ny pejy faha-307 amin’ny boky Les Jeunes s’interrogent.
3 Fiahiana ny amin’ny hoavy: “Miezaka mizara amin’ny mpiara-monina aminay fiheverana manorina ny amin’ny hoavy izahay. Izany ve no fomba iezahanao hijerena ny fiainana? [Avelao izy hamaly.] Araka ny Baiboly, dia manana antony tokony hanantenana ny hihatsaran’ny tarehin-javatra isika, raha manao izay voalaza ao amin’ny Apokalypsy 1:3.”
4 Fiahiana ny amin’ny fihazonana fahasalamana tsara: “Maro eto amin’ny manodidina antsika no mihevitra ny amin’ny fihazonana fahasalamana tsara. Na dia eo aza anefa ireo fitandremana ataontsika, dia mbola voan’ny aretina ihany isika. Ho tianao ve ny hiaina ao amin’ny tontolo iray izay hananan’ny rehetra fahasalamana sy havitrihana lavorary? Na dia toa mety ho sarotra inoana aza izany, ny bokin’ny Apokalypsy ao amin’ny Baiboly dia miresaka ny amin’izany fotoana izany ary milaza amintsika fa amin’ny hoavy tsy ho ela izy io.” Vakio ny Apokalypsy 21:3, 4. Avy eo dia azonao atao ny mampiseho ny fanazavana ao amin’ny fehintsoratra faha-13 eo amin’ny pejy faha-191 ao amin’ny boky Ny fahatanoranao.
5 Fiahiana ny amin’ny fandotoana sy ny tontolo iainana: “Rehefa niresaka tamin’ireo mpiara-monina aminay izahay, dia nahita fa maro no miahy ny amin’ny fandotoana ny rivotra fohintsika, ny rano sotrointsika ary ny sakafo hohanintsika. Heverinao ve fa ho afaka hamarana izany ireo fitondram-panjakana indray andro any? [Avelao izy hanome fanazavana.] Mampahery ny manamarika izay lazain’ny Baiboly fa hanjo ireo izay manimba ny tany.” Vakio ny Apokalypsy 11:18b. Asehoy fa ankoatra ny fanesorana ireo izay manimba ny tany, ny fikasan’Andriamanitra ho an’ny mpandefitra dia ny hanova ny tany ho paradisa, araka ny asehon’ny Salamo 37:10, 11 na ny Isaia 65:21, 22.
6 Ho an’ireo mirona kokoa ho amin’ny fivavahana: “Manao izao fanontaniana izao amin’ireo mpiara-monina aminay izahay: Heverinao ve fa natao ho azo izay voalazan’ny Baiboly, sa tokony hijanona ho zava-miafina foana izy io? [Avelao izy hanome fanazavana.] Maro no mitovy hevitra aminao. Mariho izay lazain’ny Baiboly mihitsy ao amin’ny Apokalypsy 1:3.”
7 Eo am-piezahanao amim-pahatsorana hanohina ny fon’ireo mihaino anao, ireo izay noana ny fahamarinana sy ny rariny dia handray izany tsara. — Matio 5:3, 6, NW.