Apokalypsy — Fanalahidy Iray ho Amin’ny Fahasambarana Marina
1 Ireo tenin’ny apostoly Jaona ao amin’ny Apokalypsy 1:3 dia vaovao tsara ho antsika satria milaza amintsika ny fomba hahitana fahasambarana izy. Nanoratra toy izao izy: “Sambatra izay mamaky sy ny mihaino ny tenin’ity faminaniana ity ka mitandrina izay voasoratra ato anatiny”. Ny boky Ny Fanambarana — Akaiky ny Fiafarany Malaza! dia nanampy olona maro hahita fahasambarana be dia be. Manana antony tsara anolorana azy io amin’ny hafa isika.
2 Mety ho afaka hanomboka resaka amin’itỳ fanontaniana itỳ ianao:
◼ “Heverinao ve fa ny bokin’ny Apokalypsy ao amin’ny Baiboly dia natao ho takatry ny saina, sa izy io natao hitoetra ho misitery foana? [Avelao ilay olona hamaly.] Maro no mitovy hevitra aminao. Mariho izay lazain’ny Baiboly ato amin’ny Apokalypsy 1:3. [Vakio.] Koa mety ho takatry ny saina izany ny Apokalypsy, ary ny fahalalana izay raketiny dia afaka mitondra fahasambarana ho antsika. Ahoana no hetezan’izany?” Diniho ireo hevitra eo amin’ny fehintsoratra faha-2 ao amin’ny pejy faha-6, ary avy eo dia milazà hoe: “Itỳ zavatra vita an-tsoratra itỳ dia manolotra fandinihana ny bokin’ny Apokalypsy isan’andininy. Tena ho mendrika ny hanokananao fotoana mba hamakiana azy izy itỳ. Mahafaly ahy ny mametraka itỳ boky itỳ aminao.”
3 Koa satria maro no miahy ny amin’ny fahazoana izay ilainy ara-nofo, itỳ manaraka itỳ dia mety hampipoitra fahalianana:
◼ “Inona no heverinao fa zavatra ilaintsika lehibe indrindra? [Avelao ilay olona hamaly.] Misy olona maro miaiky fa mila zavatra ara-nofo bebe kokoa isika.” Avadiho ho eo amin’ny pejy faha-73 ilay boky ary diniho ireo hevi-dehibe ao amin’ilay faritra voafefy mitondra ny lohateny hoe “Ny fitiavana ny zavatra ara-nofo ampifanoherina amin’ny fahendrena”. Tohizo amin’ny filazana hoe: “Izany dia mampiseho fa asongadina be loatra ny zavatra ara-nofo; tokony hiahy bebe kokoa ny amin’izay ilaintsika ara-panahy isika. Ny fahalalana marina no zavatra tena ilaintsika. Fahalalana ny amin’inona anefa?” Vakio ny Jaona 17:3, ary hazavao ny fomba hahafahan’ny fahalalana an’Andriamanitra hitarika ho amin’ny fiainana mandrakizay. Lazao fa hametraka ilay boky ianao ary hiverina ka hampiseho ny fomba ampihariharian’izy io fanazavana mahatalanjona ny amin’ny fikasan’Andriamanitra, dia ny hanome fahafaham-po izay rehetra ilain’ny taranak’olombelona.
4 Koa satria maro no miahy ny amin’ny fahoriana eo amin’izao tontolo izao, dia mety ho azonao atao ny hanandrana an’itỳ:
◼ “Izay olona rehetra niresahako dia miahy ny amin’ny hoavy. Mihevitra ny mpitondra sasantsasany eo amin’izao tontolo izao fa eo an-tokonan’ny fotoam-piadanana vaovao iray isika. Ahoana ny fihevitrao ny amin’izany? [Avelao ilay olona hamaly.] Na dia eo aza ny ezaka rehetra ataon’ny olombelona, dia mitombo hatrany ny herisetra sy ny fahoriana maneran-tany. Ny Baiboly dia mampiharihary ny hany vahaolana maharitra ho an’ireny zava-manahirana ireny. [Vakio ny 2 Petera 3:13. Avadiho ho eo amin’ilay sary eo amin’ny pejy faha-302 ilay boky, dia hazavao ny fomba hitondran’ny Fanjakan’Andriamanitra any an-danitra fiadanana sy filaminana maharitra eto amin’itỳ tany itỳ.] Itỳ zavatra vita an-tsoratra itỳ dia hanampy anao hahita ny fomba hahafahanao ho anisan’izany fitambaran’olona vaovao izay hifaly amin’ny fiainana mandrakizay eo ambany fanapahan’ny Fanjakan’Andriamanitra izany.”
5 Raha sendra olona be atao ianao ka tsy maintsy manao resaka fohy, dia mety ho azonao atao ny hilaza toy izao:
◼ “Koa satria ianao tsy manana afa-tsy fotoana kely, dia ho tiako ny hametraka itỳ taratasy mivalona [na lahatsoratra ao amin’ny gazety] itỳ izay mitondra ny lohateny hoe [mifantena taratasy mivalona na lahatsoratra mifanaraka tsara]. Mampirisika anao aho hamaky azy itỳ. Amin’ny fotoana manaraka handalovako eto, dia ho tiako ny hahafantatra izay fihevitrao ny amin’izy io.”