Kolokoloy Amim-pahaiza-manavaka ny Fahalianana Mandritra ny Vanin-taonan’ny Fety
1 Amin’ny volana Desambra, dia azo inoana fa ho sahirana amin’ireo raharaha momba ny fety ny maro amin’ireo naneho fahalianana ny hafatra nentintsika taminy. Noho izany, rehefa manolokolo fahalianana isika, dia hila ny hahay hanavaka ary angamba ho vonona ny hilaza haingana sy mivantana ny anton-diantsika, raha tsy hoe maneho ny faniriana hiresaka ela kokoa angaha ilay tompon-trano.
2 Eritrereto mialoha izay holazainao: Tokony ho azontsika mazava tsara ao an-tsaina foana izay tiantsika holazaina. Izany dia mitaky ny hijerentsika ireo fanamarihana noraisintsika an-tsoratra tamin’ny fitsidihana teo aloha. Izany dia hanampy antsika hitadidy ireo hevitra nodinihina nandritra ilay resaka sy izay fanontaniana tsy novaliana ka navela tamin’ilay tompon-trano.
3 Raha nampiasainao ilay fanoloran-kevitra eo amin’ny fehintsoratra faha-5 ao amin’ilay lahatsoratra hoe: “Mizarà Fahalalana Marina Momba an’i Jesosy Kristy”, rehefa miverina ianao, dia azonao atao ny milaza hoe:
◼ “Amin’izao faran’ny taona izao, dia olona maro no mieritreritra momba ny nahaterahan’i Kristy. Fony isika niara-niresaka farany, dia nampanantena ny hilaza zavatra mahaliana iray aminao momba ilay tanàna nahaterahan’i Jesosy, aho. Fantatrao ve fa ny Baiboly dia efa naminany 700 taona mialoha fa ho teraka ao Betlehema i Jesosy?” Avelao izy hamaly. Avy eo, rehefa avy namaky ny Mika 5:1 ianao, dia azonao atao ny milaza hoe: “Tena faminaniana mahavariana tokoa io, sa tsy izany? Na dia mahaliana aza anefa io zava-misy ara-baiboly io, fantatrao ve fa misy faminaniana hafa ao amin’ny Baiboly tanteraka koa amin’izao andro izao?” Raha manam-potoana ilay olona, dia hanohy ilay resaka isika. Fa raha sahirana kosa izy, dia afaka manolotra ny hiverina mba hiara-miresaka bebe kokoa momba izany aminy isika.
4 Raha ilay taratasy mivalona hoe “Ho Tafita Velona ve Ity Tontolo Ity?” no napetraka, dia ho azontsika atao ny hilaza izao manaraka izao:
◼ “Mariho izay ambara eto amin’ny pejy faha-3, eto ambanin’ny lohateny kely hoe ‘Ilay famantarana’. Izy io dia mahakasika ireo faminaniana nolazain’i Jesosy fa hanamarika ireo andro farany. [Miaraha mandinika faminaniana roa na telo amin’ilay tompon-trano.] Hanaiky ve ianao fa misy porofo fa tanteraka amin’izao androntsika izao ireo faminaniana ireo?” Raha manavaka fahalianana marina ianao ka mamela hanao izany ny fotoana, dia mety ho tianao ny hanoro hevitra azy handinika ny boky Lehilahy Niavaka. Asehoy azy fa manome tsipirian-javatra betsaka kokoa momba ilay famantarana nomen’i Jesosy ny toko faha-111. Raha ilay taratasy mivalona fotsiny no napetraka taminy, amin’ny fiverenanao manaraka, dia azonao atao ny mitarika ny resaka ho amin’ny taratasy mivalona hafa iray na ho amin’ny bokikely iray toy ny bokikely Ny Fitondram-panjakana Izay Hitondra ny Paradisa na “Indro, Havaoziko ny Zavatra Rehetra”.
5 Fanolorana fampianarana Baiboly any an-tokantrano: Raha mametraka ny boky Lehilahy Niavaka amin’ilay tompon-trano isika na raha efa manana iray amin’izany izy, dia ho tsara ny hampisehoana aminy ny fomba fanaovantsika fampianarana Baiboly any an-tokantranon’ny olona, amin’ny fampiasana ny toko faha-111. Afaka mampiasa fomba mitovy amin’ny ampiasaina any amin’ny Fianarana ny Bokin’ny Kongregasiona isika. Raha mandroso ilay fianarana, dia azontsika atao ny mifindra amin’ny iray amin’ireo bokikely na tonga dia amin’ny boky Hiaina Mandrakizay.
6 Aoka isika ho vonona foana ny hanolokolo ny fahalianana rehetra hitantsika. Tsy maintsy mahay manavaka isika, ka hiezaka foana ny hanokatra ny lalana ho amin’ny fiverenana mitsidika amin’ny fanaovana fanontaniana mahaliana amin’ny faran’ny resaka tsirairay. Izany dia hanampy antsika mba “ho vonona tsara ho amin’ny asa tsara rehetra”. — 2 Tim. 3:17.