Fitadiavana Fampianarana Baiboly Amin’ny Fo Rehetra
1 Mihamitombo ny porofo manamarina fa eo am-pifaranana ny andron’itỳ tontolo tranainy itỳ. (2 Tim. 3:1-5, NW). Inona no hevitr’izany? Midika izany fa ain’olona maro no tandindomin-doza. Kanefa, azontsika atao ny manampy ny sasany mba hahazo famonjena. (Ohab. 3:27). Ho fikendrena izany, dia tokony hiezaka amin’ny fo rehetra isika hanomboka sy hitarika fampianarana Baiboly.
2 Zavatra tsara be dia be no notanterahina tamin’ny fizarana ireo zavatra vita an-tsoratra miorina amin’ny Baiboly avoakantsika. Nefa, ny fanampiana manokana amin’ny alalan’ny fitarihana fampianarana Baiboly tsy tapaka any an-tokantrano no tena ilain’ny olona indrindra. Ahoana no azontsika anampiana azy ireny hahatsapa izany?
3 Azontsika atao ny manao fanontaniana izay mahakasika ny olona maro be. Ny fanontaniana toy ireny dia mety hifantoka amin’ny antony mampikororosy tanteraka ny toe-pitondran-tena, ny mahatonga ny fiainam-pianakaviana hiovaova erỳ, ny mahatonga ny herisetra sy ny heloka bevava ho fandrahonana toy izao, ny antony amelan’ny Andriamanitra be fitiavana iray hisian’ny toe-piainana amin’izao fotoana izao, sy ny toy izany. Aoka ianao ho mailaka hanamarika ireo zava-manahirana sy ireo fisehoan-javatra izay mahaliana indrindra ny olona ao amin’ny faritaninao. Lazao ireo valiny mazava omen’ny Baiboly amin’ireo fanontaniana ireo. Asehoy ny fomba mety hanampian’ny zavatra vita an-tsoratra zaraintsika azy ireny, hahafantatra izay lazain’ny Baiboly momba ireo raharaha ireo sy ny zava-manahirana lehibe hafa mahakasika antsika rehetra.
4 Zava-dehibe ny hampidirana an’ilay tompon-trano ao anatin’ny resadresaka. Aoka ianao ho mailaka ny hahay hanavaka izay mampanahy azy. Velabelaro manodidina izay zavatra mahaliana na mampitebiteby azy ny resaka ataonao. Tariho ny sainy ho amin’ny fanazavana ao amin’ny boky na bokikely na gazety na taratasy mivalona izay manazava ny fanafody atolotry ny Baiboly amin’ireo zava-manahirana ny taranak’olombelona. Alohan’ny handaozanao azy, dia manaova fanontaniana iray na roa izay inoanao fa hampitombo ny fiandrasany amim-pifaliana ny fitsidihanao manaraka. Rehefa miverina ianao, dia ampahatsiahivo ireny fanontaniana ireny, ary avy eo dia ampiasao ny zavatra vita an-tsoratra mba hanampiana azy hahita ny valiny omen’ny Baiboly.
5 Mety hanova ny fiainan’ny olona ny fanombohantsika fampianarana aminy sy ny fitarihana izany tsy tapaka. Ilaintsika ny maneho fahalianana amim-pahatsorana amin’ny fanahian’ireo izay mifanena amintsika eny amin’ny asa fanompoana na amin’ny toerana tsy nampoizina. Mitaky fiomanana tsara ny fanairana tsikelikely ny fahalianan’izy ireny. Mitaky faharetana ny fiverenana mitsidika azy hatrany mandra-pahatsapany ny ilana hisakafoanana ara-panahy tsy tapaka. Mitaky fiahiana feno fitiavana ny tenan’ireny olona ireny izany. Tsy maintsy maniry amim-pahatsorana ny hanampy azy ireny isika, mba hahavoavonjy azy amin’ny fandringanana efa mananontanona. Tokony hatao antom-bavaka tsy tapaka sy amin’ny fo rehetra ny asa fampianarana Baiboly tontosaintsika. — 1 Tes. 5:17.
6 Mampahery indrindra ny mahita fa olona efa ho iray tapitrisa no tonga mpianatra vita batisa tao anatin’ireo telo taona lasa. (Matio 28:19, 20). Mitarika fampianarana Baiboly eo amin’ny efatra tapitrisa sy sasany eo ho eo izao isika isam-bolana, ary mampiseho ny fiahiantsika ny fiainan’ny hafa izany. Ahoana ny aminao? Efa nanomboka niezaka tamin’ny fo rehetra mba handray anjara amin’ny asa fampianarana Baiboly any an-tokantrano ve ianao? Tadidio fa miankina amin’ny fahatokiantsika amin’io lafiny io ny aintsika sy ny an’ny hafa. — Ezek. 3:17-19.