Vaovao Momba Ilay Fanjakana Manokana Iray ho An’ny Rehetra
1 Nanomboka tamin’ny 24 Aprily isika dia nizara ilay Vaovao Momba Ilay Fanjakana manokana izay nanaitra ny fahalianan’ny olona velom-panahiana hatraiza hatraiza! Tsy hoe tonga amin’ny fotoana ilana azy fotsiny ny hafatra raketiny fa mahadodona koa. Nampiseho ny fanohanany tamin’ny fo manontolo ny mpitory tao amin’ny kongregasiona rehetra, satria naniry ny hahazoan’ny olona an’arivony maro an’io hafatra io. Miezaka ny handray anjara amin’ny fomba feno ve ianao?
2 Nisy Vaovao Momba Ilay Fanjakana nalefa ho an’ny kongregasiona tsirairay avy, mba hanomezana 50 eo ho eo ho an’ny mpitory tsirairay avy ary 250 eo ho eo ho an’ny mpisava lalana tsirairay avy. Firy no azonao nozaraina? Raha tsy afaka nahavita betsaka araka izay nantenainao ianao, efa noheverinao ve ny fomba hanaovan-javatra bebe kokoa, alohan’ny hifaranan’ilay fizarana amin’ny 14 May? Ahoana ny amin’ny firotsahana ho mpisava lalana mpanampy? Afaka manararaotra ireo fivoriana ho amin’ny fanompoana fanampiny hatao mandritra ny herinandro, toy ireo ho an’ny fitoriana amin’ny takariva ve ianao?
3 Handinika amim-pitandremana ireo loholona raha toa ka voasa araka ny nikendrena azy ny faritany. Raha tsy ho azon’ilay kongregasiona atao ny hiasa ny tapany sasany amin’ny nanendrena azy, ireo loholona dia tokony hifandray amin’ireo kongregasiona eo akaiky mba hitady fanampiana. Ny ezaka ataontsika amin’ny fo manontolo, omban’ny fiaraha-miasa tsara eo amin’ireo kongregasiona, dia tokony hahavitana ilay asa.
4 Azo inoana fa nahita fifaliana fanampiny tamin’io asa io ianao satria maro be aoka izany no afaka nandray anjara, anisan’izany ny mpitory vaovao sy ny tanora. Antenaina fa haharitra io toe-tsaina falifaly io, ka hampirisika ny rehetra hanohy hatramin’ny farany, amin’ny alalan’ny fiverenana mitsidika an’ireo izay nandray tsara. Nampirisihina mafy isika mba hihazona fandraisana an-tsoratra isan-trano tsara, amin’ny fanamarihana an’ireo izay naneho fahalianana. Ny tapany farany amin’ny volana May dia ho fotoana tsara dia tsara hifantohana amin’ny fanaovana fiverenana mitsidika mba hanombohana fampianarana vaovao.
5 Inona no azontsika lazaina rehefa miverina isika? Mety ho hitanao fa handaitra ny filazana hoe: “Tsaroanao angamba ilay fanazavana vita pirinty napetrako taminao tsy ela izay; antenaiko fa nanana fahafahana namaky azy iny ianao ary nisaintsaina ny amin’ilay fanazavana. Azo antoka fa niteraka resaka be teo amin’ny fiaraha-monina misy antsika ny hafatra raketiny, satria mahakasika raharaha iankinan’ny aina izay atrehin’ny olombelona rehetra.” Asio firesahana ny sasany amin’ireo fanambarana mampisaintsaina eo amin’ny pejy faharoa, ary avy eo dia anontanio hoe: “Inona no heverinao fa ilaintsika hatao mba hahazoana antoka fa voaomana ho amin’izay hoentin’ny hoavy isika?” Avelao ilay olona hamaly. Raha misy fahalianana, dia miresaha momba ny lafin-javatra hafa eo amin’ny pejy faha-2-4 amin’ilay Vaovao Momba Ilay Fanjakana, ary manolora fampianarana Baiboly na, raha tsy azo atao izany, dia ireo gazety farany indrindra.
6 Raha miasa ao amin’ny faritanin’ny kongregasiona hafa iray ianao, dia ataovy azo antoka ny hanome an’ilay kongregasiona ny anaran’izay olona liana rehetra hitanao mba hahafahan’ireo mpitory ao aminy hanao fiverenana mitsidika. Toy izany koa fa, raha omena fitsidihana sasany hokolokoloina ianao, dia ataovy azo antoka ny hiverina avy hatrany.
7 Ny fizarana manokana an’io Vaovao Momba Ilay Fanjakana io dia niteraka fahataitairana be ary nanosika antsika rehetra mba hanamafy ny ezaka ataontsika eo amin’ny asa fitoriana ilay Fanjakana. Afaka matoky isika fa hahita fahombiazana lehibe tokoa izy io, hampitombo ny fahatakaran’ny olona hatraiza hatraiza ny amin’ny anarana lehiben’i Jehovah sy ny fikasany. (Isaia 12:4, 5). Arakaraka ny ahafahantsika manao bebe kokoa, no hitomboan’ny fifaliantsika. — Sal. 126:3.