Kolokoloy ny Fahalianan’ny Olona Amin’ny Vaovao Momba Ilay Fanjakana
1 Nandritra ireo herinandro vitsivitsy farany, dia faly isika noho ilay tombontsoa nizara ny Vaovao Momba Ilay Fanjakana No. 35, mitondra ny lohateny hoe: “Hifankatia ve ny Olona Rehetra Indray Andro Any?” Miezaka mafy hitondra io Vaovao Momba Ilay Fanjakana io any amin’ny olona mendrika betsaka araka izay azo atao ireo mpitory hatraiza hatraiza. (Matio 10:11). Na dia natao hifarana ny alahady 16 Novambra aza ilay ezaka manokana, raha mbola misy faritany tokony hiasana, ireo loholona dia mety hangataka anareo hanohy hizara ny Vaovao Momba Ilay Fanjakana No. 35 raha mbola manana koa ny kongregasiona.
2 Nanaitra ny fahalianan’ny olona maro io Vaovao Momba Ilay Fanjakana io. Mahita izy ireo fa nanary ny firaiketam-po voajanahary ny olombelona amin’ny ankapobeny, ary noho izany dia manontany tena ny amin’izay fonosin’ny hoavy. (2 Tim. 3:3). Irintsika ny hanolokolo ny fahalianana hita.
3 Nisy vokany ny Vaovao Momba Ilay Fanjakana: Nandritra ilay ezaka manokana tamin’ny 1995 nizarana Vaovao Momba Ilay Fanjakana, dia tonga tany am-pivoriana tany amin’ny Efitrano Fanjakana ny vehivavy iray izay nahazo azy io, satria naniry ny hianatra bebe kokoa momba izay inoan’ny Vavolombelon’i Jehovah. Tany amin’ilay fivoriana izy dia tsy nisalasala nanaiky fianarana Baiboly ary taorian’izay dia nahalana izy vao tapaka fivoriana. Tsy ela, dia nanoratra tany amin’ny fiangonany taloha izy, namarana ny naha-mpikambana azy!
4 Ankehitriny, dia olona an-jatony maro ao amin’ny faritany no efa namaky ilay hafatra ao amin’ny Vaovao Momba Ilay Fanjakana No. 35. Nanao ahoana anefa ny fihetsik’izy ireo? Na dia nanohina azy ireo tsara aza izay novakiny, dia tsy hanao zavatra ny ankamaroany mandra-pitsidiky ny Vavolombelon’i Jehovah azy ireo indray. Manao fandaharana mba hiverina ve ianao? Tokony hanosika antsika hanao izany ny fiahiana amim-pitiavana ny mpiara-belona amintsika. Tokony hotsidihina indray ireo rehetra nampiseho fahalianana tamin’ny Vaovao Momba Ilay Fanjakana.
5 Inona no holazainao rehefa hiverina ianao? Mety hilaza vetivety ianao fa tena amin’ny fotoana ilana azy ilay hafatra ao amin’ilay Vaovao Momba Ilay Fanjakana, ary avy eo dia hametraka fanontaniana mampisaintsaina iray. Mihainoa amim-pitandremana rehefa milaza ny heviny ilay tompon-trano mba hahafahanao hahafantatra izay ao an-tsainy. Avy eo dia sariho ny saina ho amin’ny hevitra iray ao amin’ny bokikely Takina, izay mifanentana amin’ny hevitra iray asongadina ao amin’ny Vaovao Momba Ilay Fanjakana. Raha mahazo valiny tsara ianao, dia manandrama manomboka fampianarana Baiboly avy hatrany.
6 Indreto misy fanipazan-kevitra azonao andramana rehefa miverina any amin’ireo izay nampiseho fahalianana tamin’ny “Vaovao Momba Ilay Fanjakana” No. 35 ianao:
◼ “Mety ho tsaroanao angamba ilay fanazavana vita pirinty napetrako taminao vao haingana. Ny hafatra raketiny dia mahakasika raharaha lehibe mampizarazara ny olombelona amin’izao andro izao — ny tsy fisian’ny fitiavana ny hafa.” Sariho ny saina ho amin’ny porofo aseho ao amin’ny pejy faha-2 ao amin’ny Vaovao Momba Ilay Fanjakana, eo ambanin’ny lohateny hoe: “Nihamangatsiaka ny Fitiava-namana”. Avy eo dia manontania hoe: “Mihevitra ve ianao fa fikasan’Andriamanitra ny hiainan’ny olombelona toy izao?” Avelao ilay olona hamaly. Jereo ny lesona faha-5 ao amin’ny bokikely Takina, ary manandrama manomboka fampianarana Baiboly.
◼ “Fony isika nihaona voalohany, dia nametraka fanazavana sasany ho anao momba ny lohateny hoe ‘Hifankatia ve ny Olona Rehetra Indray Andro Any?’, aho. Mihevitra ve ianao fa mety hisy ny tontolo iray toy izany?” Avelao ilay olona hamaly. Jereo ny lesona faha-6 ao amin’ny bokikely Takina, ary vakio ny fehintsoratra faha-6. Avy eo dia vakio ny fampanantenan’Andriamanitra ao amin’ny Mika 4:3, 4. Atolory ilay bokikely sy ny fianarana.
◼ “Fony aho nitsidika anao farany, dia nametraka zavatra vita an-tsoratra mitondra ny lohateny hoe ‘Hifankatia ve ny Olona Rehetra Indray Andro Any?’, aho. Misy fanolorana fampianarana Baiboly maimaim-poana ao. Niverina aho mba hampiseho aminao ny boky fianarana izay ampiasaintsika. [Asehoy ny boky Fahalalana.] Itỳ boky itỳ dia manazava tsara momba ny fotoana, rehefa hifankatia ny olona rehetra, ary mamaly ireo fanontaniana hafa izay mety hapetrakao amin’ny tenanao, toy ny hoe: Nahoana isika no mihantitra sy maty? Nahoana Andriamanitra no mamela ny fijaliana hisy? Inona no manjo an’ireo olo-malalantsika nody mandry?” Avy eo dia manontania hoe: “Afaka mampiseho ilay fomba fianarana aminao ve aho?” Raha tsy manaiky ny fanoloranao ilay tompon-trano, dia anontanio izy raha tiany ny hamaky samirery ilay boky. Manaova fandaharana mba hiverina indray.
7 Raha vao voasa tanteraka amin’ny alalan’ny Vaovao Momba Ilay Fanjakana No. 35 ny faritany, dia afaka manolotra ny boky Fahalalana isika mandritra ny andro sisa amin’ny volana. Misy fomba fampiseho be dia be azo isafidianana mba hanolorana an’io boky io, hita ao amin’ny pejy farany amin’ny Fanompoantsika Ilay Fanjakana Desambra 1995, Martsa, Jona, sy Novambra 1996, ary Jona 1997.
8 Tokony hanosika antsika rehetra hanamafy ny ezaka ataontsika eo amin’ny asa fitoriana io fizarana manokana ny Vaovao Momba Ilay Fanjakana io. Noho ny fanampian’i Jehovah, dia afaka matoky isika fa hahita fahombiazana azo antoka io ezaka manokana io, mba hanampiana ny olona hahita ny fikasan’Andriamanitra ny amin’ny hifankatiavan’ny olombelona rehetra. Enga anie i Jehovah hanohy hitahy ny ezaka ataontsika amim-paharisihana eo am-panolokoloantsika ny fahalianan’ny olona amin’ny Vaovao Momba Ilay Fanjakana.