Manome Hery i Jehovah
1 Amin’ny maha-vahoakan’i Jehovah, dia nomena antsika ny fanendrena hitory ny vaovao tsara, eo am-pihazonana ny fitondran-tenantsika ho “tsara (...) eo amin’ny jentilisa”. (1 Pet. 2:12; Matio 24:14). Noho ny fotoan-tsarotra mbamin’ny fahalementsika sy ny kileman-toetrantsika manokana, dia tsy ho afaka hanatanteraka an’io asa io na oviana na oviana amin’ny herintsika manokana isika. (2 Tim. 3:1-5). Sambatra toy inona moa isika afaka mitodika any amin’i Jehovah mba hahazoana fanampiana!
2 Niaritra fisedrana maro ny apostoly Paoly. (2 Kor. 11:23-27). Ahoana no nahafahany niatrika tamim-pahombiazana azy ireny sy namita ny asa nanendrena azy? I Jehovah dia nanome azy “hery mihoatra noho ny mahazatra”. (2 Kor. 4:7, NW). Nankasitraka an’izany fanampiana avy amin’Andriamanitra izany i Paoly rehefa nanoratra hoe: “Ho amin’ny zavatra rehetra dia manana tanjaka aho noho izy izay manome hery ahy.” (Fil. 4:13, NW). Hanampy antsika toy izany koa i Jehovah. Ahoana no ahafahantsika mahazo io fanampiana io?
3 Amin’ny tsy fitsaharana mivavaka: Nampirisika mafy antsika i Jesosy mba ‘hangataka sy hitady ary handondona hatrany’, ka tsy hitsahatra. (Lioka 11:5-10, NW). Ny fikirizantsika amin’ny vavaka dia mampiseho amin’i Jehovah ny halalin’ny fanahiantsika, ny firedaredan’ny faniriantsika, sy ny fahatsoran’ny antony manosika antsika. (Sal. 55:17; 88:1, 13; Rom. 1:9-11). Nanaiky ny maha-zava-dehibe ny fikirizana amin’ny vavaka i Paoly rehefa nampirisika mafy antsika mba ‘tsy hitsahatra hivavaka’. (1 Tes. 5:17, NW). Ny vavaka no iray amin’ireo fomba lehibe indrindra ahazoantsika ny fanampian’i Jehovah.
4 Amin’ny fanarahana fitarihan-dalana teokratika: Ny “teokrasia” dia midika hoe “fanapahan’Andriamanitra”, izay fitiavana. Mandray soa amin’ny fanapahany isika amin’ny fanekena ny fahefana feno fitiavan’i Jehovah sy amin’ny fanarahana ny toromariny eo amin’ny fanapahan-kevitra lehibe na madinika. “Ny mpanompo mahatoky sy malina” no mampiseho ny fanapahana teokratika eto an-tany. (Matio 24:45-47, NW). Ny fiaraha-miasa amin’ny fandaminana ampiasain’ny “mpanompo” dia tena zava-dehibe raha tiantsika ny hahazo ny fitahian’i Jehovah. (Ampitahao amin’ny Hebreo 13:17.) Hamaly soa ny tsy fivadihantsika aminy sy ny fahavononantsika hankato ny lalàny i Jehovah amin’ny fanomezana ny hery ilaintsika amin’ny fotoana mety. — Heb. 4:16.
5 Amin’ny fitoerana ho akaiky an’ireo rahalahintsika: Ny fitiavana no marika famantarana ny mpianatr’i Jesosy. (Jaona 13:34, 35). Noho ny toetra mampiavaka maro samihafa, dia mety hipoitra ny tsy fifanarahana eo amintsika noho ny tsy fitovian-kevitra manokana. Mila ny ho feno fangorahana miharo fitiavana isika, ka hifamela amim-pahatsorana. (Efes. 4:32, NW). Manjary azo atao noho izany ny ho akaiky hatrany an’ireo rahalahintsika ao amin’ny finoana sy ny hahazo fampaherezana amin’ny fiaretan’izy ireo tsy azo hozongozonina ao anatin’ny fisedrana. ‘Satria fantatsika fa izany fahoriana izany dia manjo ny rahalahintsika rehetra eran’izao tontolo izao’, dia manana ny tanjaka avy amin’Andriamanitra mba hisetrana fanerena mitovy amin’izany isika. — 1 Pet. 5:9.
6 Amin’ny fihazonana fahazarana tsara manao fianarana manokana: Ny fanatanjahana ny saintsika sy ny fontsika eo amin’ny ara-panahy dia mahatonga antsika hisoroka ny fanafihan’i Satana. (1 Pet. 5:8). Ny fahazarana tsara manao fianarana manokana dia hampitombo ny vatsintsika eo amin’ny fahalalana araka an’Andriamanitra. Afaka mahita soa avy amin’izy io isika rehefa miatrika zava-manahirana eo amin’ny fiainana andavanandro. Nanamafy i Paoly fa ny “fahalalana araka ny marina” dia mitana anjara toerana tena lehibe eo amin’ny fahazoantsika famonjena. (1 Tim. 2:3, 4, NW). Zavatra tena ilaina ny handraisantsika sakafo ara-panahy tsy tapaka.
7 Ny fandaharana rehetra tena ilaina mba hanampiana antsika hitoetra hatanjaka dia azo mora foana amin’ny alalan’ny kongregasiona kristiana. Ny fanohanana amin’ny fo manontolo ireo asan’ny kongregasiona dia hanome antoka fa ‘handeha isika, nefa tsy ho reraka’. — Isaia 40:29-31.