Ampio ny Hafa Hahatakatra ny Hasarobidin’ny Baiboly
1 Nanome izay nilain’ireo mpianany i Jesosy. Mitatitra toy izao ny Lioka 24:45: “Nanokatra ny sain’ireo Izy hahalala ny Soratra Masina.” Fantany fa raha ta hanana ny fankasitrahan’ny Rainy izy ireo, dia tena nilain’izy ireo ny hianatra sy hahazo ny hevitry ny Tenin’Andriamanitra, ny Baiboly. (Sal. 1:1, 2). Mitovy zava-kendrena amin’izany ny asa fitoriantsika. Ny tanjontsika dia ny hanomboka fampianarana Baiboly, izay ahafahantsika ‘mampianatra ny olona hitandrina izay rehetra nandidian’i Jesosy’. (Matio 28:20). Amin’ny fitadidiana izany ao an-tsaina, ireto manaraka ireto dia fanoloran-kevitra sasany momba izay mety hitondra fanampiana rehefa manao fiverenana mitsidika ianao.
2 Raha niresaka tamin’ny olona izay nampiseho fahalianana tamin’ny Baiboly ianao, dia angamba mety handaitra mba hanombohana fampianarana iray itỳ tari-dresaka itỳ:
◼ “Saika ireo rehetra iresahanao dia hilaza aminao fa ho tiany ny hiaina ao amin’ny tontolo iray feno fiadanana sy mandry feizay. Raha izany no tian’ny olona rehetra, nahoana isika no ao anatin’ny tontolo iray izay feno fikorontanana sy herisetra aoka izany? [Avelao ilay olona hamaly.] Ny Baiboly dia mampiseho hoe iza no tompon’andraikitra amin’ny fahoriana eo amin’izao tontolo izao. Vakio ny 2 Korintiana 4:4. Hazavao fa Andriamanitra dia handringana ny Devoly sy hitondra tontolo iray hisy fiadanana sy fahasambarana haharitra. Vakio ny Apokalypsy 21:3, 4. Afaka miteny ianao avy eo hoe: “Amin’ny fitsidihako manaraka, dia ho tiako ny hampiseho aminao andinin-teny sasany izay manazava hoe nahoana ianao no afaka manantena tontolo iray tsy hisy fahoriana.”
3 Raha nampiasa tari-dresaka nivantana ianao mba hanombohana fampianarana ary nandray tsara ilay olona, dia ho azonao atao ny hilaza an’izao rehefa hiverina any ianao:
◼ “Rehefa niresaka isika teo aloha, dia nandinika antony sasany mahatonga ny fianarana ny Baiboly ho mahasoa. Ny ezaka amim-pahatsorana mba hanao izany bebe kokoa dia afaka manampy antsika hahatakatra izay nomanin’Andriamanitra ho antsika. [Vakio ny Jaona 17:3.] Izahay dia manana fandaharam-pampianarana Baiboly izay nanampy olona an’arivony maro hianatra bebe kokoa momba izay nampanantenain’Andriamanitra sy ny fomba ahafahantsika mampifaly azy.” Asehoy ny boky Fahalalana ka diniho ny lohatenin’ireo toko, ary hazavao ny fomba itarihantsika fampianarana Baiboly.
4 Raha afaka manampy olona tso-po hahatakatra ny maha-faran’izay sarobidy ny Tenin’Andriamanitra ianao, dia nanampy azy ireo tamin’ny fomba tsara indrindra azo atao. Ny fahendrena azon’izy ireo ianarana amin’ny alalan’ny fianarana ny zavatra raketiny dia afaka ny ho “hazon’aina”, izay hitondra fahasambarana lehibe ho azy ireo. — Ohab. 3:18.