Mandraisa Soa Avy Amin’ny Sekolin’ny Fanompoana Teokratika Amin’ny 1996 — Fizarana Faha-2
1 Fotoana fohy taorian’ny nanombohana ny Sekolin’ny Fanompoana Teokratika tamin’ny 1943, ny iray amin’ny sampan’ny Fikambanana dia nanao tatitra toy izao: “Io fandaharana tena tsara dia tsara io dia nahomby, tao anatin’ny fotoana fohy, tamin’ny fanampiana rahalahy maro izay nihevitra fa tsy ho mpandahateny ampahibemaso mihitsy ny tenan’izy ireo, hanjary tena mahomby eny ambony lampihazo sy mahita vokatra eny amin’ny saha.” Ilay sekoly dia manohy manome fampiofanana faran’izay tsara, izay ilaintsika rehetra.
2 Famakiana Baiboly: Tsy ireo nomena anjara fitenenana ihany no mandray soa avy amin’ilay sekoly. Raha ny marina, dia manana anjara isika rehetra — ny famakiana Baiboly isan-kerinandro. Ny fandaharana amin’ny sekoly dia mampiseho hoe toko inona ao amin’ny Baiboly no tokony hovakina isan-kerinandro. Misy fampahatsiarovana araka ny Soratra Masina maro izay manantitrantitra ny maha-zava-dehibe ny famakiana ny Baiboly isan’andro. (Josoa 1:8; Sal. 1:2; Asa. 17:11). Tena ilaina ho amin’ny fahasalamana tsara ara-panahy ny famakiana Baiboly; mamahana ny saina sy ny fo izany. Raha mamaky ny Baiboly mandritra ny dimy minitra isan’andro isika, fara fahakeliny, dia ho afaka ny haharaka tsara. Amin’ny faran’ilay taona, dia ho efa nahavaky toko 150 mahery tao amin’ny Tenin’Andriamanitra isika. Raha ataontsika mora raisina ny Baiboly iray, dia tokony ho afaka hamaky tapany ao aminy isan’andro isika.
3 Lahateny fampianarana: Mba hampirisihana ireo rahalahy ho amin’ny fanompoana tsy amim-pivadihana sy amin-jotom-po, ilay mpandahateny izay manao ny lahateny fampianarana, dia mila mampiasa fomba fampianatra tsara ka hampita fahazoana hevi-javatra ary hanorina fankasitrahana an’i Jehovah sy ny Teniny ary ny fandaminany. Ireo loholona sy mpanampy amin’ny fanompoana dia afaka manatanteraka izany amin’ny fiomanana tsara, amin’ny fanorenana ilay lahateniny manodidina ny loha hevitra, amin’ny fitenenana amim-piekena mafy sy amin’ny fanaovana izay hahavelombelona ilay zavatra dinihina. (Heb. 4:12). Zava-dehibe ny tsy ihoaran’ilay mpandahateny ny fotoana voatokana ho azy. Ny boky “Ny Soratra Rehetra” dia feno andinin-teny ao amin’ny Baiboly sady mampiseho hevitra araka ny Soratra Masina mandrisika maro be izay azontsika andraisan-tsoa ara-panahy.
4 Hevitra misongadina ao amin’ny Baiboly: Ireo rahalahy omena itỳ anjara itỳ dia tokony hifantina andininy voafaritra tsara izay azo ampiharina amin’ny fomba azo tsapain-tanana ho tombontsoan’ny kongregasiona. Izany dia mitaky famakiana ireo toko voatondro sy fisaintsainana azy ireny ary fikarohana andininy voafantina mba hahitana hevitra izay hanazava ny hevitr’ireo andinin-teny ireo. Any amin’ny faran’ny Index des Publications de la Société Watch Tower, dia misy ny “Index Biblique”, izay afaka manampy mba hahitana fanazavana andinin-teny ara-baiboly voafaritra tsara. Ireo rahalahy manao io anjara io dia tokony haneho fahaiza-mitsara zavatra tsara ka tsy hanampy zavatra tsy misy ifandraisana amin’izany. Tsy tokony hanomana zavatra mihoatra noho izay mety ho vita amin’ny fomba ara-dalàna ao anatin’ny enina minitra izy ireo.
5 Isika rehetra dia afaka mandray soa avy amin’ny Sekolin’ny Fanompoana Teokratika. Afaka manampy antsika hanatsara ny fahaizantsika miteny sy mampianatra izy io. Ny fanararaotana amin’ny fomba feno io fandaharana io dia azo antoka fa hanampy antsika hanao izay ‘hisehoan’ny fandrosoantsika amin’ny olona rehetra’. — 1 Tim. 4:15.