Mankalazà An’i Jehovah “Tontolo Andro”
1 Ny Salamo 145:2 dia mirakitra fampanantenana iray nataon’i Davida Mpanjaka tamin’i Jehovah, manao hoe: “Hankalaza Anao [tontolo andro, NW ] aho sy hidera ny anaranao mandrakizay doria.” Isika koa dia manana antony hankalazana sy hiderana ilay Raintsika any an-danitra! Ahoana anefa no ahafahantsika manahaka ny ohatr’i Davida amin’ny fanandratana ny fiandrianan’i Jehovah “tontolo andro”?
2 Aoka hofenointsika fankasitrahana an’i Jehovah ny fontsika: Ny fianarana tsy tapaka ny Tenin’Andriamanitra dia mandalina ny fankasitrahantsika noho izay efa nataon’i Jehovah sy ataony ary mbola hataony ho antsika. Arakaraka ny itomboan’ny fankasitrahantsika noho ireo asany mahatalanjona, dia hiboiboika teny momba ny hatsaram-pony isika. (Sal. 145:7, NW ). Hidera an’i Jehovah amim-pahadodonana isika amin’ny fotoana mety rehetra.
3 Miderà an’i Jehovah amin’ny resaka ifanaovana isan’andro: Rehefa mifampiresaka amin’ny mpifanila trano, mpiara-mianatra, mpiara-miasa, sy ny hafa izay ifampikasohantsika isan’andro isika, dia mety hahita fahafahana hizara ny fanantenantsika aminy. Mety haneho fanahiana ny amin’ny heloka bevava eo amin’ny fiaraha-monina ny mpifanila trano iray; mety hitebiteby ny amin’ny fampiasana zava-mahadomelina na ny faharatsiam-pitondran-tena ny mpiara-mianatra iray; mety hilaza hevitra ny amin’ny raharaha ara-politika iray ny mpiara-miasa iray. Afaka misarika ny saina ho amin’ireo fotopoto-pitsipika sy fampanantenana ao amin’ny Tenin’Andriamanitra, izay mampiseho ny lalam-pitondran-tena mety tokony harahina ankehitriny sy ny fanafody amin’ny farany ho an’ireny zava-manahirana ireny, isika. Ny teny toy izany izay atao amin’ny “fotoana mety” dia fankalazana! — Ohab. 15:23, NW.
4 Miresaha momba an’i Jehovah manontolo andro: Ny olona manana fankasitrahana lalina an’i Jehovah dia maniry hizara ny teny mahafaly amin’olon-kafa betsaka araka izay azo atao. (Sal. 40:8-10). Momba izany, dia tokony hanontany tena isika hoe: ‘Manao izay rehetra amelan’ny toe-javatra misy ahy hataoko ve aho?’ Maro no nahita fa, rehefa nanao fanitsiana sasany izy ireo, dia tonga mpisava lalana maharitra. Raha tsy mamela hanao izany ny toe-javatra amin’izao fotoana izao, moa ve isika afaka mirotsaka ho mpisava lalana mpanampy? Koa satria ny vanim-potoan’ny Fahatsiarovana ho avy dia fotoana fanitarana ny asa atao, ireo volana Martsa sy Aprily dia ho fotoana tsara dia tsara hampitomboana ny fanompoantsika, amin’ny fanaovana ny asan’ny mpisava lalana mpanampy.
5 Ampio ireo vaovao mba hiaraka amintsika hankalaza an’i Jehovah: Ny fankalazana ny Fahatsiarovana ny nahafatesan’i Jesosy dia mampahatsiaro antsika foana an’ireo antony tokony hahafeno fisaorana an’i Jehovah sy hiderana ny Anarany. Izy io dia tena fotoana tsara hampirisihana ireo olona ampianarintsika ny Baiboly mba hiaraka amintsika hiresaka ampahibemaso ny maha-mpanjaka an’i Jehovah. Ampirisiho mafy izy ireo mba hisaintsaina amim-bavaka momba izay voalaza eo amin’ny fehintsoratra faha-7-9, ao amin’ny pejy faha-173-175 amin’ny boky Fahalalana Izay Mitarika ho Amin’ny Fiainana Mandrakizay. Raha mahafeno fepetra izy ireo, dia tsy misy antony tokony hampiahotra azy, satria fotsiny hoe tsy ampy fanandraman-javatra izy ireo. Misy mpitory mahay maro vonona ny hampiseho amin’izy ireo ny fomba fanaovana ny asa fitoriana ilay Fanjakana. Raha misikina fahasahiana mba hilazana ny vaovao tsara ireo vaovao, dia afaka matoky izy ireo fa hanampy azy ireo i Jehovah. — Asa. 4:31; 1 Tes. 2:2, NW.
6 Hitondra soa mandrakizay ho an’ny tenantsika ary koa ho an’ny hafa isika, rehefa manao izay hankalazana an’i Jehovah tontolo andro.